ވިިޔަފާރިވެރިން އަމިއްލައަށް ޑޮލަރު ހޯދައިގެން ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ޓެލެގްރަފިކް ޓްރާންސްފާ (ޓީޓީ) ހެދުމުން ސަޕްލަޔަރާ ހިސާބަށް ފޯރަން ދެ ހަފްތާ ނަގާ ކަމަށް ރައްޔިތުންގެ މަޖިލީހުގެ ކުރީގެ ނައިބުރައީސް އީވާ އަބްދުﷲ ރޭ ވިދާޅުވެއްޖެ އެވެ.
"އެމްޑީޕީން ޑޮލަރެއް ނެތް" ނަމުގައި ބޭއްވި ޕެނަލް ޑިސްކަޝަންގައި އީވާ ވިދާޅުވީ ޓީޓީ ހެދުމުން ސަޕްލަޔަރާ ހިސާބަށް ފައިސާ ނުލިބި ދެ ހަފްތާ ފާއިތުވުމުން އޭގެ އުނދަގޫ ވިޔަފާރިތަކުން ތަހަންމަލުކުރަން ޖެހޭނެ ކަމަށެވެ.
"ޑޮލަރު ހޯދައިގެން އައިސްފައި ޓީޓީއެއް ހެދީމަވެސް ވިޔަފާރިވެރިން މިހާރު އެބަ ބުނޭ ދެ ހަފްތާވާއިރުވެސް ސަޕްލަޔަރާ ހަމައަށް ޓީޓީގެ އެ ފައިސާ ނުލިބެއޭ. ގާތްގަނޑަކަށް ދެ ހަފްތާގެ ޑިލޭއެއް ވިޔަފާރިއެއްގައި އުޅުނީމަ ހުރިހާ ވިޔަފާރިވެރިންނަށްވެސް އެނގޭނެ އެއީވެސް ހަމަ ތަހަންމަލުކުރަން އުނދަގޫ،" އީވާ ވިދާޅުވި އެވެ.
"ދެ ހަފްތާ ވަންދެން ސަޕްލަޔަރަށް ފައިސާ ނުލިބުނީމަ މިސާލަކަށް ކާގޯ ގެނެސްގެން ޕޯޓުގައި ބާއްވައިގެން އުޅޭ ވިޔަފާރިއެއް. ދެ ހަފްތާވަންދެން ޑެމަރޭޖް އަރަންދޭންވީ. ދެ ހަފްތާވަންދެން ޑެމަރޭޖް އަރާއިރު ހަމަ އެހެން ހުރިހާ ހަރަދެއް ދާނީ ހިނގަމުން. މުވައްޒަފުންނަށް މުސާރަ ދޭންޖެހޭނެ. ޔޫޓިލިޓީސްތައް ދައްކަންޖެހޭނެ. ގުދަންކުރާ ތަނަށް ފައިސާ ދައްކަންޖެހޭނެ."
އެއްލައްކަ ރުފިޔާގެ ޓީޓީ ހަދާ ވިޔަފާރިތަކަށް ބޭންކް ރޭޓުގައި ލިބެނީ އޭގެ ތެރެއިން 25 ޕަސަންޓުކަން ފާހަގަކުރައްވާ އީވާ ވިދާޅުވީ ބާކީ 75 ޕަސަންޓަށްވާ ޑޮލަރު ކަޅު ބާޒާރުން ގަންނަން އިތުރަށް ހަތަރު ލައްކަ ރުފިޔާ ހޭދަކުރަންޖެހޭ ކަމަށެވެ.
އީވާ ވިދާޅުވީ އެއް ލައްކަ ޑޮލަރުގެ ޓީޓީ މަހެއްގެ މައްޗަށް ހަދާ ވިޔަފާރިތަކުން އަހަރަކު ފަސް މިލިއަން ރުފިޔާ އިތުރަށް އެބަ ހަރަދުކުރަން ޖެހޭނެ ކަމަށާއި އޭގެ
"އެއް ލައްކަ ޑޮލަރުގެ ޓީޓީއަކަށް ފައިސާ ހޯދަން އޭނަ ގާތްގަނޑަކަށް އެބަ މަހަކު ހަތަރު ލައްކަވަރު އިތުރަށް ހަރަދުކުރަންޖެހޭ. އެ ހަތަރުލައްކަ އަހަރު ނިމޭއިރު އެބަ ކައިރިކުރޭ ގާތްގަނޑަކަށް ފަސް މިލިއަނާ. ހަމަ އެއްކަލަ ޑޮލަރުގެ ޓީޓީއަށް. އޭގެ މާނައަކީ ފަސް މިލިއަނާ ގާތަށް އަހަރަކު ހަރަދުކުރަންޏާ ކޮންމެ ވިޔަފާރިއަކަށްހޭ އެވަރެއްގެ ހިޓެއް ނެގޭނީ،" އީވާ ވިދާޅުވި އެވެ.
ޑޮލަރުގެ އަގު ބޮޑުވެ އިގްތިސޯދަށް ހީނަރުކަމެއް މިއަދު އައި ނަމަވެސް، ގައުމުގެ ތަރައްގީ އާއި ގައުމުގެ އިގްތިސޯދަށް ދިގުރާސްތާއަށް އަސަރުކުރާނެ ކަމަށް އީވާ ވިދާޅުވި އެވެ. އޭނާ ވިދާޅުވީ އެ އަސަރު އެންމެ ބޮޑަށް ކުރާނީ އެންމެ ހާލުގައި އުޅޭ ގޭބިސީތަކަށް ކަމަށެވެ.
އަދަދު އަށް އެނގިފައިވާ ގޮތުގައި ބައެއް ވިޔަފާރިތަކަށް ބީއެމްއެލް މެދުވެރިކޮށް ޓީޓީ ނެހެދޭތާ ގިނަ ދުވަސްތަކެއް ވަނީ ވެފަ އެވެ. އޭގެއިތުރުން ޓީޓީ ހެދުމަށްފަހުވެސް ސަޕްލަޔަރާ ހިސާބަށް ފައިސާ ޖަމާވާން ގިނަ ދުވަސްތައް ނަގާކަން އެނގިފައިވެ އެވެ.
ޑޮލަރުގެ އަގު 21ރ. އަށްވުރެ މައްޗަށް ޖެހިލާފައިވާއިރު، ބެންކް ރޭޓުގައި ޑޮލަރު ލިބެނީ ހަދާ ޓީޓީތަކުގެ 25 ޕަސަންޓަށެވެ. އެގޮތުން ބާކީ 75 ޕަސަންޓަށްވާ ޑޮލަރު ވިޔަފާރިތަކުން ކަޅު ބާޒާރުން ގަންނަމުންދާއިރު، ކަޅު ބާޒާރުން ޑޮލަރު ހޯދަންވެސް ދަތިތަކެއް އަންނަނީ ދިމާވަމުން ކަމަށް ވިޔަފާރިތަކުން ބުންޏެވެ.
