އައިލެންޑް އޭވިއޭޝަންއަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ އިން ދައްކަން ޖެހޭ ފައިސާ ދެއްކުމަށްޓަކައި ސެޓްލްމަންޓް އެއްބަސްވުމެއް ހަދައިފި އެވެ.
އެމްޑީޕީ އިން އައިލެންޑް އޭވިއޭޝަނަށް 3.6 މިލިއަން ރުފިޔާ ދޭންޖެހެ އެވެ. އެ ފައިސާ ދައްކަން ޖުލައި، 2025، ގައި ކޯޓުން އޮތީ ހުކުމްކޮށްފަ އެވެ. ސެޓްލްމަންޓް އެގްރީމެންޓު ހެދީ މެއި 24، ގަ އެވެ.
ސެޓްލްމަންޓު އެގްރީމެންޓު ހެދުމަށްފަހު އައިލެންޑް އޭވިއޭޝަނުން ވަނީ އެ މައްސަލަ ކޯޓަށް ވައްދައި، އެގްރީމަންޓާ އެއްގޮތަށް ފައިސާ ދައްކަން އެމްޑީޕީއަށް އަމުރުކޮށްދިނުމަށް އެދިފަ އެވެ. ދައުވާ ކުރާ ފަރާތުން އެދުނު ގޮތަށް ކޯޓުން ވަނީ އެ މައްސަލައިގައި ހުކުމްކޮށްފަ އެވެ.
އެމްޑީޕީ އިން އައިލެންޑް އޭވިއޭޝަނަށް ދައްކަންޖެހޭ ފައިސާއަކީ 2023 ވަނަ އަހަރުގެ ރިޔާސީ އިންތިހާބުގެ ކެމްޕެއިނަށް އެއިރުގެ ރައީސް އިބްރާހިމް މުހައްމަދު ސޯލިހު ހިންގެވި ކެމްޕެއިނުގައި ބޯޓު ޗާޓަރު ކުރެއްވުމަށާއި ދަރަންޏަށް ނެގި ޓިކެޓުތަކަށްވާ ފައިސާ އެވެ.
އެ ފައިސާ ދައްކަން ހުކުމްކޮށް، އޭގެ ފަހުން ހުކުމާ އެއްގޮތަށް އެ ފައިސާ ދައްކަން ތަންފީޒީ މަރުހަލާގައި ސިވިލް ކޯޓުން ވަނީ ހުކުމްކޮށްފަ އެވެ. ސެޓްލްމެންޓް އެގްރީމެންޓެއް ހަދާފައި މި ވަނީ އޭގެ ފަހުންނެވެ.
ވެރިކަމުގައި އޮންނަ ފަރާތަކުން އައިލެންޑް އޭވިއޭޝަންގެ ބޯޓުފަހަރު ކުއްޔަށް ނެގުމަކީ އަބަދުވެސް ހިނގަމުން އަންނަ ކަމެވެ. މި ސަރުކާރުން ވެސް އެކި ކެމްޕެއިނުތަކަށް އެ ކުންފުނީގެ ބޯޓުފަހަރު ވަނީ ކުއްޔަށް ނަގައިފަ އެވެ.
