ރައީސުލްޖުމްހޫރިއްޔާ މުހައްމަދު މުއިއްޒުގެ މައްޗަށް ކުރެވުނު ކޮރަޕްޝަންގެ ތުހުމަތަކާ ގުޅިގެން އެމަނިކުފާނު އެންޓި ކޮރަޕްޝަން ކޮމިޝަނަށް ހާޒިރުކުރުމާ ބެހޭގޮތުން އެ ކޮމިޝަނުން ނެރެފައި އޮތް ނޫސްބަޔާނެއް ޑިލީޓުކޮށްފި އެވެ.
މީގެ ކުރިން ހައުސިން މިނިސްޓަރުގެ މަގާމުގައި މުއިއްޒު ހުންނެވި ދުވަސްވަރު އެމަނިކުފާނުގެ މައްޗަށް ކުރެވުނު ތުހުމަތަކާ ގުޅިގެން 2021 ވަނަ އަހަރު މުއިއްޒު އޭސީސީއަށް ހާޒިރުކުރި އެވެ. އެގޮތުން، މާޗު 23، 2021, ގައި މުއިއްޒު އޭސީސީއަށް ހާޒިރުކުރުމުން އެއީ ސިޔާސީ ގޮތުން ކުރި ކަމެއްގެ ގޮތުގައި ސިފަކުރައްވައި މުއިއްޒު ވާހަކަދެއްކެވި އެވެ.
އޭސީސީގެ ވެބްސައިޓުން ޑިލީޓުކޮށްފައި ވަނީ މުއިއްޒުގެ ވާހަކަތަކަށް ރައްދުދީ މާޗު 24، 2021, ގައި އެ ކޮމިޝަނުން ނެރުނު ބަޔާނެވެ. އެ ނޫސްބަޔާން އޭސީސީގެ ރަސްމީ އެކްސް އެކައުންޓުން ޕޯސްޓު ވެސް ކުރި އެވެ. އޭސީސީގެ ވެބްސައިޓުން އެ ބަޔާން ޑިލީޓުކޮށްފައި ވަނީ ކޮން ތާރީހެއްގައިކަމެއް ނޭނގެ އެވެ.
އެހެންނަމަވެސް، މި ނޫހުން ބެލިބެލުމުން އިންޓަނެޓުގައި ހުންނަ މައުލޫމާތު އާކައިވްކުރާ ވޭބެކްމެޝިން ގައި އެ ބަޔާން ސޭވް ވެފައިވެ އެވެ. އޭސީސީއަށް މުއިއްޒު ހާޒިރުކުރީ ލޯކަލް ކައުންސިލް އިންތިހާބަށް ނުފޫޒު ފޯރުވުމަށް ކަމަށް ބުނެ މުއިއްޒު ދެއްކެވި ވާހަކަތަކާ ގުޅިގެން އެ ބަޔާނުގައި އޭސީސީން ކަންބޮޑުވުން ފާޅުކޮށްފައިވެ އެވެ.
އެގޮތުން، މާޗު 23، 2021 ގެ ކުރިން ވެސް ކޮރަޕްޝަންގެ ތުހުމަތުތަކާ ގުޅިގެން މުއިއްޒު އެ ކޮމިޝަނަށް ހާޒިރުކޮށްފައިވާ ކަމާއި އޭސީސީއަށް އެމަނިކުފާނު ހާޒިރުކުރިކަމުގެ މައުލޫމާތު މީޑިއާތަކާ ހިއްސާކުރީ އެ ކޮމިޝަނުން ނޫންކަން އެ ބަޔާނުގައި ބަޔާން ކޮށްފައިވެ އެވެ.
އޭސީސީގެ ވެބްސައިޓުން އެ ބަޔާން ޑިލީޓުކުރި ސަބަބާ ބެހޭގޮތުން ބަހެއް ހޯދުމަށް އެ ކޮމިޝަނުގެ މީޑިއާ އޮފިސަރަށް ގުޅުމުން ފޯނަށް ޖަވާބު ނުދެއްވާތީ، އެ ކޮމިޝަނުގެ ބަހެއް ލިބޭގޮތް ވަނީ ނުވެފަ އެވެ.
