ހަދަމުންދިޔަ އިމާރާތެއްގެ ފުރަތަމަ ފަންގިފިލާއިން ބިދޭސީ ދެ މަސައްކަތްތެރިއަކު ވެއްޓި އަނިޔާވެއްޖެ އެވެ.
އަދަދު އަށް ފޮނުވި މެސެޖެއްގައި ފުލުހުން ބުނީ ވެއްޓުނީ ނޭޕާލަށް ނިސްބަތްވާ އުމުރުން 22 އަހަރާއި 39 އަހަރުގެ ދެ ފިރިހެނުން ކަމަށެވެ. އެމީހުންނަށް ލިނުބު އަނިޔާގެ ތަފުސީލެއް އަދި ނޭނގެ އެވެ.
ފުލުހުން ބުނީ އެ ދެ މީހުން ވެއްޓުނީ މަޖީދީ މަގުގައި ހަދަމުންދިޔަ އިމާރާތަކުން ކަމަށެވެ. މި ނޫހަށް އެނގިފައިވާ ގޮތުގައި އެ މީހުން ވެއްޓުނީ މަޖީދީ މަގު ވޭލާ ކައިރީ ހުރި އިމާރާތަކުންނެވެ.
"މި ރިޕޯޓު ލިބުމާއެކު ފުލުހުން ވަނީ ވަގުތުން އެ ސަރަހައްދަށް ގޮސް ހަރަކާތްތެރިވާން ފަށާފަ. މިހާތަނަށް ބެލިބެލުމުން އެނގިފައިވާ ގޮތުގައި، މި ދެ މީހުން ވެއްޓިފައިވަނީ އެ އިމާރާތުގެ ފުރަތަމަ ފަންގިފިލާގައި މަސައްކަތް ކުރަމުން ދަނިކޮށް،" ފުލުހުން ފޮނުވި މެސެޖުގައި ބުނެފައިވެ އެވެ.
އެ ދެމީހުން ވެއްޓުމުން ޓެކްސީއަކަށް އަރުވާ މަންޒަރުގެ ވީޑިއޯއެއް މިހާރު ސޯޝަލް މީޑިއާގައި ވަނީ އާންމުވެފަ އެވެ. ކޮންސްޓްރަކްޝަން މަސައްކަތް ކުރާއިރު އަމިއްލަ ރައްކާތެރިކަމަށް ބޭނުންވާ އެއްވެސް އާލާތެއް އެމީހުން އަޅައިގެން ތިބި ތަނެއް ވީޑިއޯއަކުން ނުފެނެ އެވެ.
މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ގާނޫނުގައި ބުނެފައިވާ ގޮތުން މަސައްކަތްތެރިޔާއަށް ބޭނުންވާ ސަލާމަތީ އާލާތްތައް ފޯރުކޮށްދިނުމަކީ މަސައްކަތް ހަވާލު ކުރާ ފަރާތުގެ ޒިންމާއެކެވެ.
މަސައްކަތްތެރިންގެ ސަލާމަތަށް ނުރައްކާވާ ފަދަ އެއްވެސް މަސައްކަތެއް ނުކުރުމަކީ ކޮންމެ މަސައްކަތްތެރިއަކަށް ވެސް ގާނޫނުން ލިބޭ ހައްގެކެވެ. އަދި އެއްވެސް ތަފާތު ކުރުމެއް ނެތި އެންމެނަށް ހަމަހަމަކޮށް އެ ހައްގު ފޯރުކޮށްދޭންޖެހެ އެވެ.
