މޯލްޑިވްސް އެއާޕޯޓްސް ކޮމްޕެނީއަށް ލިބޭ ޑޮލަރު ނުއަގުގައި، ވެރިކަން ހިންގާ ޕީޕަލްސް ނެޝަނަލް ކޮންގްރެސްއާ ގުޅުން އޮންނަ ފަރާތްތަކަށް އަގުހެޔޮކޮށް ވިއްކަމުންދާކަމުގެ ތުހުމަތު ސަރުކާރުގެ ތަރުޖަމާނު މުހައްމަދު ހުސެއިން ޝަރީފް (މުންދު) ދޮގު ކުރައްވައިފި އެވެ.
މުންދު އިއްޔެ ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކީ، ޕީއެންސީއާ ގުޅުން އޮންނަ މީހުންނަށް 15.42 ރުފިޔާއަށް ޑޮލަރު ވިއްކުމަށްފަހު، އެމީހުން ލައްވައި ކަޅު ބާޒާރުގެ ރޭޓަށް ވިއްކައި ނާޖާއިޒް މަންފާ ހޯދަމުންދާކަން އެނގިފައިވާ ކަމަށާއި އެއީ ތެދެއްތޯ އެވެ.
"ދައުރު" ނޫހުން ކުރި އެ ސުވާލަށް ޖަވާބު ދެއްވަމުން މުންދު ވަނީ އެކަން ދޮގު ކުރައްވައިފަ އެވެ. އަދި އެފަދަ ކަމެއް ހިނގާކަމުގެ ޝަކުވާ އޭނާއަށް ލިބިފައިނުވާ ކަމަށް ވެސް މުންދު ވިދާޅުވި އެވެ.
"އެއީ ދޮގެއް. ހަމަ ގައިމު ވެސް އަޅުގަނޑުމެންނަކަށް ތިކަހަލަ އެއްވެސް ޝަކުވާއެއް އެއްވެސް ފަރާތަކުން [ހުށަހަޅާފައެއް ނެތް]،" މުންދު ވިދާޅުވި އެވެ.
ޑޮލަރުގެ އަގު މިހާރު އުޅެނީ 20.50 ރުފިޔާއަށެވެ. އެކަމަކު، ޑޮލަރުގެ އަގު ރަސްމީ ރޭޓަށްވުރެ ވެސް ތިރި ކުރުމަކީ މި ސަރުކާރުގެ ވައުދެކެވެ. ޑޮލަރުގެ އަގު ތިރިކުރައްވާނެ ކަމަށް ވިދާޅުވި އެއް ބޭފުޅަކީ އިގްތިސާދީ މިނިސްޓަރު މުހައްމަދު ސައީދު އެވެ.
"ހަމައެކަނި އަޅުގަނޑުމެންނަށް މަޖިލީހުގެ މެޖޯރިޓީ ލިބިގެން ވިޔަސް ދިވެހި ރުފިޔާ ޑޮލަރުގެ ކުރިމަތީގައި 30-40 ޕަސެންޓް ވަރުގަދަވެގެންދާނެ. ކޮބައިތޯ ނަތީޖާއަކަށް ވާނެ ކަމަކީ. 15.42 އަކަށްވުރެ ވެސް ޑޮލަރު ރޭޓް ދަށަށް ދިޔުމެއް ނޫންތޯ މުސްތަގުބަލުގައި،" ރައްޔިތުންގެ މަޖިލީހުގެ ކެމްޕެއިނުގެ ތެރޭގައި 2024 ގައި ސައީދު ވިދާޅުވެފައިވެ އެވެ.
އެ އިންތިހާބުގައި ރައްޔިތުން ވަނީ ސަރުކާރު ހިންގާ ޕާޓީއަށް ސުޕަމެޖޯރިޓީ ދީފަ އެވެ. މަޖިލީހުގެ 93 ގޮނޑީގެ ތެރެއިން 75 ގޮނޑި ކާމިޔާބު ކުރީ ޕީއެންސީ އެވެ. އިދިކޮޅު އެމްޑީޕީއަށް ލިބުނީ އެންމެ 12 ގޮނޑި އެވެ.
