ދިއްގަރު ދާއިރާގެ ޕީއެންސީގެ މަޖިލިސް މެންބަރު އަހްމަދު ނާޒިމަށް ޕީއެންސީ ލީޑާޝިޕްގެ އިތުބާރު ގެއްލުނު ސަބަބު ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ސާފުކޮށްނުދެވުނެވެ.
ޕީއެންސީން މިއަދު ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ ނާޒިމްއަށް އިތުބާރު ނެތުމުގެ ސަބަބުން ޕީއެންސީގެ ދިއްގަރު ދާއިރާގެ ރައީސްގެ މަގާމުން އޭނާ މިހާރު ވަކިކޮށްފައިވާ ކަމަށެވެ. ނަމަވެސް ޕީއެންސީން ނާޒިމްއަށް ކުރަމުންދިޔަ އިތުބާރު ގެއްލުނު ސަބަބަކީ ކޮބައިތޯ ތަކުރާރުކޮށް ސުވާލުކުރުމުންވެސް އަބްދުއްރަހީމް ވަނީ އެ ސުވާލަށް ޖަވާބު ދެއްވަން ދެކޮޅު ހައްދަވާފަ އެވެ.
"ނޫން. ވަކި އަމަލުތަކެއް މިހެންވެގެންނޭ އަޅުގަނޑު ދަންނަވާކަށް ނެތިން. އަޅުގަނޑުމެންނަށް އިތުބާރު، ލީޑާޝިޕަށް އިތުބާރު ނެތީމަ ވަކިކުރީ. ދެން ސަބަބު އަޅުގަނޑު މިދެންނެވީތާ، އަޅުގަނޑުމެންނަށް އިތުބާރު ނެތީމައޭ. ދެން ބައިވަރު ސަބަބުތައް ހުންނާނެތާ. މި ބައްދަލުވުމުަގައި އަޅުގަނޑު ބޭނުމެއް ނޫން އޭގެ ތަފްސީލަކަށް ދާކަށެއް،" އޭނާ ވިދާޅުވި އެވެ.
ރައްޔިތުންގެ މަޖިލީހުގެ ނައިބުރައީސްކަމުގައި ނާޒިމް ހުންނަވަނިކޮށް އޭނާގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހަޅާނީ އިތުބާރު ނެތުމުންކަން ފާހަގަކުރައްވާ އަބްދުއްރަހީމް ވިދާޅުވީ ދިއްގަރު ދާއިރާގެ ރައީސްކަމުގެ މަގާމުން ނާޒިމް ވަކިކުރަން ނިންމީ ޕީއެންސީގެ ލީޑާޝިޕުން ކަމަށެވެ.
އަބްދުއްރަހީމް ވިދާޅުވީ ޕީއެންސީގެ ކޮންގްރެސް ތެރެއިން ދިއްގަރު ދާއިރާގެ ރައީސަށް މެންބަރަކު ހޮވާނެ ކަމަށެވެ. އެއީ ޕީއެންސީގެ އަސާސީ ގަވާއިދު ބުނާ ގޮތުގައި މަޖިލިސް މެންބަރަކު ހުންނަ ދާއިރާއަކުން އެ މެންބަރަކު ވަކިކުރުމުން، އައު ދާއިރާ ރައީސެއް ހޮވަންޖެހޭތީ ކަމަށްވެސް އޭނާ ވިދާޅުވި އެވެ.
ޕީއެންސީގެ މެންބަރުކަމުން ނާޒިމް ވަކިކުރުމުގެ ވިސްނުމެއް މިވަގުތު ނުގެންގުޅުއްވާ ކަމަށްވެސް އަބްދުއްރަހީމް ވިދާޅުވި އެވެ. އޭނާ ޕީއެންސީގެ މެންބަރުކަމުން ވަކިކޮށްފިނަމަ، މަޖިލީހުގެ ދިއްގަރު ދާއިރާގެ ގޮނޑި ގެއްލޭނެ އެވެ.
މަޖިލިސް ނައިބު ރައީސްކަމުން ނާޒިމް އިސްތިއުފާ ދެއްވީ އޭނާ ވަކިކުރުމަށް ޕީއެންސީގެ 73 މެންބަރުން ސޮއިކުރުމަށް ފަހު ހުށަހެޅި މައްސަލައިގައި ބާއްވަން ތާވަލުކުރި ޖަލްސާ ފެށުމުގެ ކުޑަ ވަގުތުކޮޅެއް ކުރިންނެވެ.
އޭނާ ވަކިކުރަން ޕީއެންސީން މަޖިލީހަށް ހުށަހެޅި ގަރާރުގައި ތުހުމަތުކޮށްފައިވަނީ ނާޒިމް "ވަކި ސިޔާސީ ފިކުރަކަށް ބުރަވެ" މަޖިލީހުގެ ތެރޭގައި މަސްލަހަތު ނަގާލަން މަސައްކަތް ކުރާ ކަމަށެވެ. ނާޒިމްއަށް ޕީއެންސީގެ އިތުބާރު ގެއްލުނު ސީދާ ސަބަބެއް މިހާތަނަށް ހާމަކޮށްފައެއް ނުވެ އެވެ.
ނަމަވެސް ޕީއެންސީން ކުރި ތުހުމަތުތައް ދޮގުކުރައްވާ ނާޒިމް ވިދާޅުވީ މަޖިލީހުގެ ނައިބު ރައީސްގެ ހައިސިއްޔަތުން ނުވަތަ މެންބަރެއްގެ ހައިސިއްޔަތުން ވިޔަސް، ކޮށްފައިވާ ނުވަތަ ނުކޮށް ދޫކޮށްލާފައިވާ ކަމަކާއި ގުޅިގެން އެއްވެސް މެންބަރަކު އޭނާ ގާނޫނުއަސާސީއާ ނުވަތަ މަޖިލީހުގެ ގަވާއިދާ ހިލާފުވިކަމުގެ ޝަކުވާ ކުރިން އުފުލާފައި ނުވާ ކަމަށެވެ.
