ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބު އަންނަ ޖުލައި މަހުގެ 11، ގައި ބާއްވަން ނިންމައި، އިންތިހާބުގައި ވާދަކުރުމުގެ ފުރުސަތު މިއަދު ހުޅުވާލައިފި އެވެ.
ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވީ ޕީއެންސީގެ އެތެރޭގެ އިންތިހާބު ވެގެންދާނީ މިހާތަނަށް ބާއްވާ އެންމެ ފުރިހަމަ އިންތިހާބަށް ކަމަށެވެ.
އިންތިހާބަށް ކުރިމަތިލުުގެ ފުރުސަތު ޕީއެންސީން ހުޅުވާލީ މިއަދުން ފެށިގެން ޖޫން 30، ގެ ނިޔަލަށް ކަމަށްވާއިރު، އެތެރޭގެ އިންތިހާބުގައި ވޯޓުލެވޭނީ މިއަދުގެ ނިޔަލަށް ޕާޓީގެ ދަފްތަރުގައި ތިބި މީހުންނަށެވެ.
އިންތިހާބުކުރާ މަގާމުތައް:
- ދާއިރާގެ ރައީސުން
- ދާއިރާގެ ނައިބުރައީސް
- އަންހެނުންގެ ހަރަކާތުގެ ރައީސުން
- ޒުވާނުންގެ ހަރަކާތުގެ ރައީސުން
- ސްޓިއަރިން ކޮމިޓީގެ މެންބަރުން
ޕީއެންސީގެ އެތެރޭގެ އިންތިހާބުގައި ވާދަކުރުމުގެ ފުރުސަތު ޖޫން 30، ގައި ހަމަވުމާއެކު ޖުލައި 1، ގައި ވަގުތީ ވޯޓާސް ލިސްޓު އާންމުކުރަން ވަނީ ނިންމާފަ އެވެ.
މީގެއިތުރުން ޝަކުވާ ހުށަހަޅަން ތިން ދުވަހުގެ މުއްދަތެއް ދިނުމަށްފަހު، ޖުލައި 4، ގައި ވޯޓުލާ ދާއިމީ ލިސްޓު އިއުލާންކުރަން ޕީއެންސީން ވަނީ ނިންމާފަ އެވެ.
ޕީއެންސީގެ އެންމެ މަތީ މަޖިލިސް ސެޕްޓެމްބަރު 15، އިން 18، އަށް ބާއްވަން ވަނީ ތާވަަލުކޮށްފަ އެވެ.
