ކެލިފޯނިއާ، ޔުނައިޓެޑް ސްޓޭޓްސް (ޖޫން 26) - ފީފާ ވޯލްޑް ކަޕް ފުޓްބޯޅަ މުބާރާތުގެ ގްރޫޕް ޑީގެ ފަހު މެޗުތަކުގައި ތުރުކީން 3-2 އިން އެމެރިކާ ބަލިކުރިއިރު، މި ގްރޫޕްގެ ދެ ވަނައިގެ ގޮތުގައި އޮސްޓްރޭލިއާ އިން ދެ ވަނަ ބުރުގެ ޖާގަ ހޯދައިފި އެވެ.
އަދި އެންމެ ރަނގަޅު ނަތީޖާ ނެރޭ ތިން ވަނަ އަށް ދާ ޓީމުތަކުގެ ތެރޭގައި ހިމެނިގެން ޕެރަގުއޭ މުބާރާތުގެ ގަދަ 32 ޓީމުގެ ބުރުން ޖާގަ ހޯދުމުގެ ފުރުސަތު އެބައޮތެވެ.
ގްރޫޕްގެ އަނެއް މެޗުން ޕެރަގުއޭ އާއި އޮސްޓްރޭލިއާގެ މެޗު ނިމުނީ 0-0 އިން އެއްވަރުވެގެންނެވެ. އޮސްޓްރޭލިއާ އިން މި ވަނީ ޖެހިޖެހިގެން ދެ ވަނަ ވޯލްޑް ކަޕްގެ ގަދަ 16 ބުރުން ޖާގަ ހޯދައިފަ އެވެ.
އެެމެރިކާ އިން މި ގްރޫޕްގެ އެއް ވަނަ ހޯދީ ތިން މެޗުން ހަ ޕޮއިންޓާ އެކު އެވެ. ދެ ވަނައިގައި ނިންމި އޮސްޓްރޭލިއާ އާއި ތިން ވަަނައިގައި އޮތް ޕެރަގުއޭ އަށް ވަނީ ހަތަރު ޕޮއިންޓް ލިބިފަ އެވެ. ތުރުކީން ނިންމާލީ ތިން ޕޮއިންޓާ އެކު އެވެ.
ގްރޫޕް ސްޓޭޖުގެ ފުރަތަމަ ދެ މެޗެކޭ އެއްގޮތަށް އެމެރިކާ އިން ވަނީ ތުރުކީއާ ދެކޮޅަށް ވެސް މެޗުގެ ކުރީކޮޅުގައި ލީޑުނަގައިފަ އެވެ. މި ލަނޑު މެޗުގެ ދެ ވަނަ މިނިޓްގައި ޖެހީ އޫސްޓަން ޓްރަސްޓީ އެވެ. އެކަމަކު، އޭގެ އަށް މިނިޓް ފަހުން، މެޗުގެ 10 ވަނަ މިނިޓްގައި ތުުރުކީގެ ތަރި، އާޑާ ގުލާ ވަނީ އެ ޓީމަށް އެއްވަރުކޮށްދީފަ އެވެ.
ތުރުކީން ވަނީ މެޗުގެ 31 ވަނަ މިނިޓްގައި ބަރިސް ޔިލްމާޒް ޖެހި ގޯލުން ލީޑުނަގައިފަ އެވެ. މި ލަނޑާ އެކު، ލީޑުގައި އޮވެގެން ތުރުކީން ފުރަތަމަ ހާފު ނިންމާލި ނަަމަވެސް ދެ ވަނަ ހާފު ފެށިތަނާހެން އެމެރިކާ އިން އެއްވަރުުކުރި އެވެ. އެ ޓީމުގެ ދެ ވަނަ ލަނޑު މެޗުގެ 49 ވަނ މިނިޓްގައި ކާމިޔާބުކުރީ ސަބެސްޓިއަން ބާހޯލްޓާ އެވެ.
މެޗު އެއްވަރުވެގެން ނިމޭނެކަމަށް ބެލެވިފައިވަނިކޮށް، މެޗުގެ އިތުރު ވަގުތުގެ ގޮތުގައި ދެއްކި ވަގުތުގެ ތެރެއިން އަށް ވަނަ މިނިޓްގައި ތުރުކީން ވަނީ ލަނޑު ޖަހައިގެން މޮޅުވެފަ އެވެ. ތުރުކީ އަށް މި ލަނޑު ޖަހައިދިނީ އޭރިއާތެރެއިން ރަނގަޅު ތަނަށް އަރައި ހުރި ކާން އައިހާން އެވެ.
އެމެރިކާ އިން ގަދަ 32 ޓީމުގެ ބުރުގައި ކުޅޭނީ ބޮސްނިއާއާ އެވެ. އަދި، އޮސްޓްރޭލިއާ އިން ދެ ވަނަ ބުރުގައި ކުޅޭނީ ގްރޫޕް ޖީގެ ދެ ވަނަ ޓީމާ އެވެ. މި ވަގުތު ގްރޫޕް ޖީގެ ދެ ވަނައިގައި އޮތީ އިރާން އެވެ.
