އުމުރުން 16 އަހަރުން ދަށުގެ ކުދިންނަށް ސޯޝަލް މީޑިއާ ބޭން ކުރަން ސަރުކާރުން ފަށާފައިވާ މަސައްކަތަކީ ކުޑަކުދިންނަށްޓަކައި އެޅޭނެ މުހިންމު ފިޔަވަަޅެއް ކަމަށް ރައީސް މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު މިއަދު ވިދާޅުވެއްޖެ އެވެ.
ކުޑަކުދިންގެ ހައްގުތަކާ ބެހޭ "މަޝްވަރާ" އިފްތިތާހުކުރުމަށް ބޭއްވި ޖަލްސާގައި ވާހަކަދައްކަވަމުން ސާޖިދާ ވިދާޅުވީ ކުޑަކުދިންގެ ރައްކާތެރިކަމަށް ސަރުކާރުން އަޅާ ފިޔަވަޅުތަކުގެ ދަށުން 16 އަހަރުން ދަށުގެ ކުޑަކުދިންނަށް ސޯޝަލް މީޑިއާ ބޭންކުރަން ނިންމުމަކީ އެ ކުދިންނަށްޓަކައި ސަރުކާރުން އެޅޭނެ މުހިންމު ފިޔަވަޅެއް ކަމަށެވެ.
"އިންޓަނެޓުގެ ވަސީލަތްތައް މެދުވެރިކޮށް ކުޑަކުދިންނަށް ކުރިމަތިވާ ނުރައްކާތަކުން އެކުދިން ސަލާމަތްކުރުމަށް ސަރުކާރުން ހަރުދަނާ ފިޔަވަޅުތަކެއް އަޅަމުންދޭ. އެގޮތުން އުމުރުން 16 އަހަރުން ދަށުގެ ކުދިންނަށް ބައެއް ސޯޝަލް މީޑިއާ ޕްލެޓްފޯމްތައް ހަނިކުރަން ނިންމާފައިވާ ނިންމުމަކީ ކުދިންގެ ރައްކާތެރިކަމަށް ދޭ އަހައްމިއްޔަތު ހާމަކޮށްދޭ މުހިންމު ފިޔަވަޅެއް،" ސާޖިދާ ވިދާޅޫވި އެވެ.
ސާޖިދާ އިތުރަށް ވިދާޅުވީ ކުޑަކުދިންގެ ރައްކާތެރިކަން ކަށަވަރުކުރުމަކީ ގައުމީ ފެންވަރުގައި އެންމެ އިސްކަންދޭންޖެހޭ ކަންތައް ކަމުގައި ދެމިއޮންނަންވާނެ ކަމަށާއި ދުނިޔެއަށް އަންނަ ބަދަލުތަކާއެކު އެ މަސައްކަތްތައް ވެސް ތަރައްގީކޮށް ފުޅާކުރަންޖެހޭނެ ކަމަށެވެ.
ކުޑަކުދިންގެ ނަފްސާނީ ދުޅަހެޔޮކަމަށް ހާއްސަ ސަމާލުކަމެއް ދޭންޖެހޭކަން ފާހަގަކުރައްވަމުން ސާޖިދާ ވިދާޅުވީ، ކުއްޖެއްގެ ރައްކާތެރިކަމަކީ ހަމައެކަނި ޖިސްމާނީ ގޮތުން ލިބޭ އަނިޔާއަކުން ސަލާމަތްވުން ނޫން ކަމަށެވެ.
ސާޖިދާ ވިދާޅުވީ ކުދިންގެ އިންސާނީ ކަރާމާތް ހިމާޔަތްކުރުމާއި، އެކުދިންގެ އިހުސާސްތަކަށް ރައްކާތެރިކަން ދިނުމުގެ އިތުރުން، އެއީ މުޖުތަމައު ބަލައިގަންނަ، އަޑުއަހާ، އަދި ލޯބިލިބޭ ބައެއްކަން އިހުސާސްކޮށްދިނުމަކީ ކޮންމެހެން ކުރަންޖެހޭ ކަމެއް ކަމަށެވެ.
ޒަމާނީ ދުނިޔޭގައި ހުރި ގޮންޖެހުންތަކާއި ހަގީގަތްތައް ކުދިންގެ އުމުރާ ގުޅޭގޮތަށް އޮޅުންފިލުވައިދިނުމަކީ ކުރިއަށްވުރެ ބޮޑަށް މިއަދު މުހިންމުވެފައިވާ ކަމެއްކަން ސާޖިދާ ފާހަގަކުރެއްވި އެވެ. ސާޖިދާ ވިދާޅުވީ މައުލޫމާތު މުއްސަނދި، ކަންކަމާ ކުރިމަތިލާން ކެރޭ، އަދި އަހުލާގީ ގޮތުން ވަރުގަދަ ޖީލެއް ބިނާކުރެވޭނީ ހުރިހާ ފަރާތްތަކެއްގެ ގުޅިފައިވާ މަސައްކަތުން ކަމަށެވެ.
ކުޑަކުދިންގެ ހައްގުތައް ރައްކާތެރިކުރުމުގެ ގާނޫނާއި ބައިނަލްއަގުވާމީ މިންގަނޑުތަކާ އެއްގޮތަށް، ކުދިންނަށް ރައްކާތެރި މާހައުލެއް ގާއިމުކުރުމަށްޓަކައި އާއިލާތަކާއި، މުޖުތަމައުއާއި، ހިދުމަތްދޭ ފަރާތްތަކުގެ އިތުރުން ދައުލަތުގެ މުއައްސަސާތައް ގުޅިގެން މަސައްކަތް ކުރުމަށް ސާޖިދާ ވަނީ ގޮވާލައްވާފަ އެވެ.
