އުމުރުން 16 އަހަރުން ދަށުގެ ކުދިންނަށް ސޯޝަލް މީޑިއާ ބޭން ކުރަން މަސައްކަތް ކުރައްވާނެ ކަމަށް ރައީސް މުހައްމަދު މުއިއްޒު މިއަދު އިއުލާނު ކުރައްވައިފި އެވެ.
މިހާރު ކުރިއަށްދާ ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ރައީސް ވިދާޅުވީ އެމަނިކުފާނު ބޭނުންވެވަޑައިގަންނަވަނީ އޮސްޓްރޭލިއާގައި އޮންނަ ގޮތަށް 16 އަހަރުން ދަށުގެ ކުދިންނަށް ސޯޝަލް މީޑިއާގެ އެކައުންޓުތައް ނުހެދޭ ގޮތަށް ހަމަޖައްސަން ކަމަށެވެ.
"ކަމާގުޅޭ ގާނޫނުތަކާއި ކުރަން ޖެހޭ އެހެނިހެން ކަންކަން ކުރުމަށްޓަކައި އަޅަންޖެހޭ ފިޔަވަޅުތައް ސޯޝަލް މީޑިއާ ކަނޑައެޅޭ ވަކި އެޕްތަކެއް 16 އަހަރުން ދަށުގެ ޒުވާނުންނަށް ބޭނުން ނުކުރެވޭ ގޮތަށް ކަނޑައެޅުމަށްޓަކައި ފިޔަވަޅުތައް އަޅަން ގަސްދުކުރަން،" މުއިއްޒު ވިދާޅުވި އެވެ.
މުއިއްޒު ވިދާޅުވީ ސަރުކާރުގެ އަމާޒަކީ މި އަހަރުގެ ތެރޭގައި އެކަމާ ބެހޭ ގާނޫނަކާއި ގަވާއިދުތައް ހަދައި އެކަންކަން ތަންފީޒު ކުރަން ފެށުން ކަމަށެވެ.
ސޯޝަލް މީޑިއާ ބޭން ކުރުމުގައި އެ ޕްލެޓްފޯމްތައް ހިންގާ ކުންފުނިތަކާއެކު މަޝްވަރާތައް ކުރިއަށްގެންދަވާނެ ކަމަށް ވެސް މުއިއްޒު މިއަދު ވިދާޅުވި އެވެ.
"ސޯޝަލް މީޑިއާގައި އެޕްތައް ހިންގާ ކުންފުނިތަކާ މުއާމަލާތް ކުރުމުގައި ކުރަން ޖެހޭ ކަންތައްތައް ވިޔަސް، އޮސްޓްރޭލިއާގައި މިންގަނޑުތައް ބޭނުންކުރެވޭނެ ގޮތެއް ރާއްޖޭގައި ތައާރަފް ކުރެވޭނެ ގޮތެއް ހެދުމަށްޓަކައި ކުރަންޖެހޭ މަސައްކަތްތައް ކުރިއަށްގެންދަން އަޅުގަނޑު ގަސްދުކުރަން،" އެމަނިކުފާނު ވިދާޅުވި އެވެ.
އުމުރުން 16 އަހަރުން ދަށުގެ ކުދިންނަށް ސޯޝަލް މީޑިއާ ބޭން ކުރުމަށްޓަކައި ގާނޫނާއި ގަވާއިދުތައް ހަދާއިރު އޮސްޓްރޭލިއާއިން ގެންގުޅޭ މިންގަނޑުތަކަށް ރިއާޔަތް ކުރައްވާނެ ކަމަށް ވެސް މުއިއްޒު ވިދާޅުވި އެވެ.
"މިކަމުގައި އޮސްޓްރޭލިއާއިން އަޅާފައިވާ ފިޔަވަޅުތައް އެއީ ރަނގަޅު މިންގަނޑެއް ގޮތުގައި ދެކެން،" ރައީސް ވިދާޅުވި އެވެ.
