ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ. އަލީ އަޝްފާގު (ދަގަނޑޭ)، ގައުމީ ފުޓްބޯޅަ ޓީމަށް 100 މެޗު ހަމަކޮށް، ފީފާ ސެންޗަރީ ކްލަބުން ޖާގަ ހޯދައިފި އެވެ.
އުމުރުން 40 އަަހަރުގެ ދަގަނޑޭ، އަކީ މި ޝަރަފް ހޯދި ރާއްޖޭގެ ދެ ވަނަ ކުޅުންެތެރިޔާ އެވެ. ރާއްޖޭގައި އުފެދުނު އެންމެ މޮޅު ގޯލްކީޕަރު، އިމްރާން މުހައްމަދު (އިންމަ) ވަނީ 109 މެޗު ގައުމީ ޖޯޒީގައި ހަމަކޮށް، ފީފާ ސެންޗަރީ ކްލަބްގައި ހިމެނުނު ފުރަތަމަ ދިވެހި ކުޅުންތެރިޔާގެ ޝަރަފް ހޯދައިފަ އެވެ.
ފީފާ ސެންޗަރީ ކްލަބަކީ، ގައުމީ ޓީމުތަކަށް 100 އަށް ވުރެން ގިނަ މެޗު ކުޅެދީގެން ހިމެނޭ ވަރުގަދަ ލިސްޓެކެވެ. އާޖެންޓީނާގެ ތަރި ލިއޮނަލް މެސީ އާއި ޕޯޗުގަލްގެ ތަރި، ކްރިސްޓިއާނޯ ރޮނާލްޑޯ އަކީ ވެސް ފީފާ ސެންޗަރީ ކްލަބްގެ މެމްބަރުންނެވެ.
ގައުމީ ޓީމަށް 2003 ވަނަ އަހަރު ކުޅެން ފެށި ދަގަނޑޭ، ގައުމީ ޖޯޒީގައި ކުޅުނު 100 ވަނަ މެޗަކީ މިރޭ ޑައިމަންޑް ޖުބިލީ އިންޓަނޭޝަނަލް މުބާރާތުގައި ރާއްޖޭން އަފްގާނިސްތާނާ ކުޅުނު މެޗެވެ. ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަބަތުގައި ކުޅޭ ޑައިމަންޑް ޖުބިލީ ފުޓްބޯޅަ މުބާރާތުގައި އަފްގާނިސްތާން އަތުން 1-0 އިން ރާއްޖެ ބަލިވި މެޗުގައި، ދަގަނޑޭ ކުޅެން އެރީ މެޗުގެ ފަހު ކޮޅުގައި ބަދަލަކަށެވެ.
މިދިޔަ މާޗް މަހު 31 ވަނަ ދުވަހު ޓިމޯ ލެސްޓޭ އަތުން 2-1 އިން ރާއްޖެ މޮޅުވި މެޗަކީ، ތިން އަހަރަށް ފަހު، ދަގަނޑޭ ގައުމީ ޖޯޒީގައި ކުޅުނު ފުރަތަމަ މެޗެވެ. އަނިޔާގެ މައްސަލަ ތަކުގެ ސަބަބުން މިދިޔަ ތިން އަހަރު ތެރޭ ދަގަނޑޭ ވަނީ ގިނަ އޮޕަރޭޝަންތަކެއް ކުރަން ޖެހިފަ އެވެ. އޭނާގެ އޮތީ ކުޅުމަށް އެނބުރި އައުމަށް މައިގަނޑު އެއް އަމާޒެވެ. އެއީ، ގައުމީ ޓީމަށް 100 މެޗު ހަމަކުރުމެވެ. އެކަން މިރޭ ހާސިލްކުރިއިރު، ގައުމީ ކޯޗަކަށް ހުރީ ދަގަނޑޭގެ ކެރިއަރުގެ ޕީކުގައި އޭނާއާ އެކު މަސައްކަތްކުރި ކޯޗު ހަންގޭރީގެ އިސްތަވާން އުރުބާނީ އެވެ.
އުރްބާނީ، މީގެ ކުރިން، 2009 އިން 2010 އަށް އަދި 2011 އިން 2013 އަށް ގައުމީ ކޯޗުކަން ކޮށްދިންއިރު، ދަގަނޑޭ ވަނީ ގައުމީ ޖޯޒީގައި ތަފާތު މޮޅު ކުޅުމެއް ދައްކައިފަ އެވެ. މިރޭ އަފްގާނިސްތާނާ ދެކޮޅަށް ރާއްޖެ ކުޅުނު މެޗަށް ފަހު އޮތް ނޫސްވެރިންގެ ބައްދަލުވުމުގައި އުރްބާނީ ވަނީ، ފީފާ ސެންޗަރީ ކްލަބްގައި ހިމެނުމުން ދަގަނޑޭ އަށް މަރުހަބާ ކިޔައިފަ އެވެ.
އުރްބާނީ ބުނީ މީގެ ފަސް ވަރަކަށް މަސް ކުރިން އޭނާ ރާއްޖޭގެ ގައުމީ ކޯޗުކަމާއި އެފްއޭއެމްގެ ޓެކްނިކަލް ޑިރެކްޓަރުގެ މަގާމާ ހަވާލުވާން ރާއްޖެ އައުމާ އެކު، ދަގަނޑޭގެ މެސެޖެއް ލިބުނު ކަމަށެވެ. އަދި، އޭނާއާ ބައްދަލުކުރަން ދަގަނޑޭ އެދުނު ކަމަށް ވެސް އުރްބާނީ ވަނީ ބުނެފަ އެވެ.
"އަހަންނަށް ނޭނގޭ ސަބަބެއް މި ބައްދަލުކުރަން އެދުނު. އެކަމަކު، އަހަރެން ބުނިން ކޮންމެ ވަގުތަކު ވެސް ރޭގަނޑާއި ދުވާލު ވިޔަސް، ކޮންމެ ވަގުތެއްގައި ވެސް ބައްދަލުކުރެވޭނެއޭ. އެއީ، އަހަރެން އޭނަ އަށް ކުރާ އިހުތިރާމެއްގެ ސަބަބުން.،" ދަގަނޑޭގެ 100 ވަނަ މެޗާ ހަމައަށް އަންނަން މި ފަހުން ކުރި މަސައްކަތަށް އިޝާރާތްކޮށް އުރްބާނީ ބުންޏެވެ.
އަފްގާނިސްތާން އަތުން މިރޭ ބަލިވުމުގެ މި ބަދުނަސީބު ނަތީޖާގެ ކަންކަމަށް ފަހު، ދަގަނޑޭގެ މި އުފަލުގައި ބައިވެރިވުމަކީ ހިތްހަމަޖެހުމެއް ކަމަށް އުރްބާނީ ވަނީ ފާހަގަކޮށްފަ އެވެ.
