ޓިއުރިން (މެއި 31) - ލިވަޕޫލަށް ކުޅެމުން އަންނަ ބްރެޒިލްގެ ކީޕަރު އެލިސަން ބެކާ ހޯދަން ކުރާ މަސައްކަތުގައި ކާމިޔާބު ނުލިބިއްޖެނަމަ، ފިއޮރެންޓީނާގެ ސްޕެއިންގެ ކީޕަރު، ޑޭވިޑް ޑެހެއާ ގެންނަން ޔުވެންޓަސް އިން ވިސްނަމުން އަންނަ ކަމަށް އިޓަލީގެ މީޑިއާ ރިޕޯޓްތައް ބުނެފި އެވެ.
ޔުވެންޓަސް އިން އުމުރުން 33 އަަހަރުގެ އެލިސަން ގެންދަން އޭނާއާ އެކު އެއްބަސްވުމަކަށް އަތުވެފައިވާ ކަމަށް މީޑިއާގައި ވާހަކަ ދެކެވިފައިވީ ނަމަވެސް، އަންނަ ސީޒަނުގެ ނިޔަލަށް ލިވަޕޫލާ އެކު ކޮންޓްރެކްޓެއް އެބައޮތެވެ.
އިނގިރޭސި މީޑިއާ ރިޕޯޓްތައް ބުނާގޮތުން، އެލިސަން، އަންނަ ސީޒަނުގައި ވެސް ބަހައްޓަން ލިވަޕޫލުން ވަނީ ނިންމައިފަ އެވެ. އަދި، މިހާރު ލިވަޕޫލްގައި ހުރި ޖޯޖިއާގެ ގޯލްކީޕަރު، ޖިއޯޖީ މަމަޑާޝްވިލީ ލޯނަކަށް ދޫކޮށްލަން އެ ކްލަބުން ވަނީ ނިންމައިފަ އެވެ.
ވެލެންސިއާ އަށް ކުރިން ކުޅުނު މަމަޑާޝްވިލީ، ޔުވެންޓަސް އަށް ދޭން ލިވަޕޫލުން ތައްޔާރަށް އޮތް ނަމަވެސް، އެ ކްލަބްގެ ވިސްނުމަކީ، އެލިސަން ނުލިބިއްޖެނަމަ، ކުރިން މެންޗެސްޓާ ޔުނައިޓެޑަށް ކުޅުނު އުމުރުން 35 އަހަރުގެ ޑެހެއާ ގެނައުމެވެ. މީގެ ދެ އަހަރު ކުރިން، ފިއޮރެންޓީނާ އަށް ބަދަލުވުމަށް ފަހު، ޑެހެއާ އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. އޭގެ ތެރޭގައި، މިދިޔަ ސީޒަނުގެ ފަހުކޮޅުގައި، ޔުވެންޓަސް އަތުން 2-0 އިން ފިއޮރެންޓީނާ މޮޅުވި މެޗު ހިމެނެ އެވެ.
ޔުވެންޓަސް އަށް އަންނަ ސީޒަނުގެ ޗެމްޕިއަންސް ލީގުން ޖާގަ ގެއްލުނީ ލީގުގެ ފަހު މެޗުތަކުގައި ނަތީޖާތައް ދަށްވުމުންނެވެ. އިޓާލިއަން ލީގުގެ ހަ ވަނައިގައި ނިންމި ޔުވެންޓަސް އިން އަންނަ ސީޒަނުގައި ވާދަކުރާނީ ޔޫރަޕްގެ ދެ ވަނަ ފަންތީގެ ކްލަބް ފުޓްބޯޅަ މުބާރާތް، ޔޫރޮޕާ ލީގުގަ އެވެ.
