ވާވު އަތޮޅު ދެވަނަ ކަނޑުގެ ވަރަށް ފުނުގައި އޮންނަ ހޮހޮޅައަކަށް ފީނަނިކޮށް ގެއްލުން އިޓަލީ ޓޫރިސްޓުން ހޯދުމުގެ އޮޕަރޭޝަނުގައި އުޅެނިކޮށް ނިޔާވީ ސްޓާފް ސާޖަންޓު މުހައްމަދު މަހުދީ އަޑިން ނެގީ، ސިފައިންނާއެކީ އެ އޮޕަރޭޝަނުގައި ބައިވެރިވި ފުލުހުންގެ ރެސްކިޔު ޑައިވަރުންގެ ޓީމަކުންކަން އެނގިއްޖެ އެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ގެ ކޯސްޓުގާޑުގެ އެންމެ ތަޖުރިބާހުރި ޑައިވަރުންގެ ތެރޭގައި ހިމެނޭ މަހުދީ ނިޔާވީ، ސިފައިން ބުނި ގޮތުގައި، އިއްޔެ ފީނަނިކޮށް ހާލު ދެރަވެގެން މާލެ ގެނައި ފަހުންނެވެ.
މިކަމާ ގުޅިގެން ބައިނަލްއަގުވާމީ މީޑިއާތަކަށް މައުލޫމާތު ދެމުން ސަރުކާރުގެ އިސް ތަރުޖަމާނުު މުހައްމަދު ހުސެއިން ޝަރީފް (މުންދު) ވިދާޅުވީ، މަހުދީ ނެތްކަން އެނގުނީ ފީނަން ދިޔަ ޑައިވަރުންގެ ޓީމު މައްޗަށް އެރި ފަހުންނެވެ.
"މިއަދު، އަށް ރެސްކިއު ޑައިވަރުން މޫދަށް ފޭބި. އެ މީހުން މައްޗަށް އެރިއިރު، މަހުދީ މައްޗަށް ނާރާކަން އެނގުނު،" މުންދުއާ ހަވާލާދީ ބީބީސީގައި ލިޔެފައިވެ އެވެ.
މިލިޓަރީ ޑައިވަރުން މައްޗަށް އެރީ ފުނުގައި ތިބިފައި ކަމުން މަހުދީ ބަލާ އެ ޑައިވަރުންނަކަށް ދެވޭނެ ގޮތެއް ނެތެވެ. އަދި، މަހުދީ އަޑިން ނެގީ، އޭރު އެ އޮޕަރޭޝަނުގައި ބައިވެރިވާން ގޮސް ތިބި ހަތަރު ފުލުހުންގެ ޓީމަކުން ފީނާފައި ގޮހެވެ. މިކަން މުންދު ވެސް ވަނީ އަދަދު ނޫހަށް ކަށަވަރުކޮށްދެއްވާފަ އެވެ.
މަހުދީ ނިޔާވީ ފަހުން ހޮހޮޅަ ތެރޭގައި ތާށިވެފަ ތިބި ކަމަށް ބެލެވާ އިޓަލީގެ ހަތަރު ޓޫރިސްޓުން ހޯދަން ހިންގާ އޮޕަރޭޝަން ވަނީ މެދުކަނޑާލާފަ އެވެ.
އޮޕަރޭޝަން އަލުން ފަށަނީ ކޮން އިރަކުންތޯ ސުވާލުކުރުމުން މުންދު ވިދާޅުވީ، މިއަދު ރާއްޖެ އައި ފިންލެންޑުގެ ތަޖުރިބާކާރު ޑައިވަރުންގެ ޓީމާއި ސިފައިންނާ އޮޕަރޭޝަން ކުރިއަށް ގެންދާނެ ގޮތް ރާވަމުންދާ ކަމަށެވެ.
މި ފިންލެންޑުގެ ތަޖުރިބާކާރުންގެ ޓީމަކީ މީގެ ކުރިން ވެސް ކޭވް ޑައިވް ރެސްކިޔު އޮޕަރޭޝަންތަކުގައި ބައިވެރިވެފައިވާ، މި ދާއިރާގައި އެންމެ ފުންނާބު އުސް މީހުންނެވެ. މިއީ އިޓަލީ ސަރުކާރުން މެދުވެރިވެގެން ފޮނުވި ޓީމެކެވެ.
