އެކަށީގެންވާ ތަމްރީނާއި ވަސީލަތްތައް ނެތި ނުރައްކާތެރި ރިކަވަރީ އޮޕަރޭޝަނެއްގައި ސިފައިން ފޮނުވާ، ސިފައިންގެ މީހެއްގެ ފުރާނަ ގެއްލުނު އޮޕަރޭޝަނަށް ހުއްދަ ދިނުމާ ގުޅިގެން ފާޑުކިޔުން ބޮޑުވެފައިވާ ދަނޑިވަޅެއްގައި، އެ އޮޕަރޭޝަން ހިންގުމާއި ހުއްދަ ދިނުމުގައި ސަރުކާރުގެ އެއްވެސް ދައުރެއް ނެތް ކަމަށާއި ސިފައިންގެ އެ ގާބިލުކަން ނެތް ވާހަކަ ވެސް ނުބުނާ ކަމަށް ސަރުކާރުން އިއްޔެ ބުނެފި އެވެ.
މި ރިކަވަރީ އޮޕަރޭޝަނަކީ ވާވު އަތޮޅު ދެވަނަ ކަނޑުގެ ހޮހޮޅަ ތެރޭގައި ތިބި އިޓަލީގެ ހަތަރު ޓޫރިސްޓުންގެ ހަށިގަނޑު ހޯދަން ސިފައިން ހިންގި އޮޕަރޭޝަނެކެވެ. މި އޮޕަރޭޝަންގެ ދެ ވަނަ ދުވަހު، އެ އޮޕަރޭޝަނުގައި އިސްކޮށް އުޅުނު އެކަކު ކަމުގައިވާ ސިފައިންގެ ޑައިވަރު ސްޓާފް ސާޖަންޓު މުހައްމަދު މަހުދީ ވަނީ ނިޔާވެފަ އެވެ.
މިކަމާ ގުޅިގެން ނޫސްވެރިން ކުރި ސުވާލުތަކަށް ޖަވާބު ދެމުން ސަރުކާރުގެ އިސް ތަރުޖަމާނު މުހައްމަދު ހުސެއިން ޝަރީފު (މުންދު) ގެ "ޕްރެސާ ވިތު ސްޕޮކްސް" ގައި އޭނާ ވަނީ، ސިފައިންގެ އެންމެ އިސް ކޮމާންޑަރަކީ ރައީސުލްޖުމްހޫރިއްޔާ ކަމުގައި ވިޔަސް، ސިފައިންގެ އޮޕަރޭޝަނަލް ނިންމުންތަކުގައި ސަރުކާރުގެ ދައުރެއް ނޯންނަ ކަމަށް ވިދާޅުވެފަ އެވެ.
"ބައެއް ބޭފުޅުންނަށް ފަހަރުގައި ހީފުޅު ވެފަ ކަން ނޭނގެ އޮންނަނީ މި އެމްއެންޑީއެފް އެއީ އަޅުގަނޑުމެން ޔުނީފޯމް ބޮޑީސްތަކަށް ސަރުކާރުން ކަންކަން އޮޕަރޭޝަނަލީ އަންގާ، އަމުރު މައުރޫފް ހިންގައޭ، އެއީ އެހެން ހިންގާ ކަންތައްތަކެއް ނޫނޭ،" މުންދު ވިދާޅުވި އެވެ.
މަހުދީ ނިޔާވި ހާދިސާ ހިނގުމާ ގުޅިގެން ސޯޝަލް މީޑިއާގައި ސަރުކާރަށް ފާޑުކިޔުން އަމާޒުކުރި ބައެއް މީހުން ވަނީ ސިފައިންގެ އެ ގާބިލުކަން ނެތް ކަމަށް ބުނެފަ ވަނިކޮށް، ސަރުކާރުންގެ ސިފައިން ކޮމާންޑަށް އަންގައިގެން މި އޮޕަރޭޝަން ހިންގަން މަޖުބޫރުކުރުވީ ކަމަށް ތުހުމަތުކޮށެވެ.
މުންދު ވަނީ ވަރަށް ސާފު އިބާރާތުން މިކަން ދޮގުކޮށްފަ އެވެ. އޭނާ ތަކުރާރުކޮށް ވިދާޅުވީ ސިފައިންގެ އޮޕަރޭޝަނަލް ނިންމުންތަކުގައި މުއިއްޒުގެ ނޫނީ ކެބިނެޓު ވަޒީރެއްގެ ނޫނީ ސިޔާސީ އެއްވެސް މީހެއްގެ އެއްވެސް ދައުރެއް ނޯންނާނެ ކަމަށެވެ.
މުންދު ވިދާޅުވީ އަނެއް ވާހަކައަކީ، ސިފައިންގެ ކޯސްޓުގާޑުން މުއިއްޒުއަށް ދިން ބްރީފިންގައި، މި އޮޕަރޭޝަން ކުރިއަށް ގެންދަން ގާބިލުކަން ނެތް ވާހަކަ ވިދާޅުނުވާ ކަމަށެވެ. ސިފައިން އެ ބްރީފިން ދިންއިރު، އޭނާ ވެސް އެ ތަނުގައި އިންނެވިކަން ހަނދުމަކޮށްދެއްވަމުން މުންދު ވިދާޅުވީ އެ އޮޕަރޭޝަނަކީ "ރިސްކީ" އޮޕަރޭޝަނެކޭ ބުނުމުގެ އިތުރަށް އެހެން ކަމެއްގެ ވާހަކަ އެ ބްރީފިންގައި ހިއްސާ ނުކުރާ ކަމަށެވެ.
"އެއްވެސް ހާލެއްގައި އެ ބޭފުޅުންގެ ކެޕޭސިޓީ ދަށްވެގެން އެ ބޭފުޅުންނަށް ނުވާނެ ވަރު ކަމެއް މަތި ކުރުވާ ކަހަލަ އެއްވެސް ވާހަކައެއް ނުދެކެވޭ،" އޭނާ ވިދާޅުވި އެވެ.
މުންދުގެ މި ވާހަކަތަކާ ގުޅިގެން ނޫސްވެރިޔަކު ވަނީ އެމްއެންޑީއެފްގެ ކޮމާންޑާންޓް މުހައްމަދު ސަލީމް ޓީވީއަށް ދެއްވި އިންޓަވިއުއެއްގައި، އެހާ ފުނަށް ފީނުމުގެ ގާބިލުކަން ސިފައިންގެ ނެތް ކަމަށް ވިދާޅުވި ނޫންތޯ އޭނާ ކުރެން އައްސަވާފަ އެވެ. ޖަވާބުގައި މުންދު ވިދާޅުވީ ސިފައިން އެ ވާހަކަތައް ދެއްކެވީ މުއިއްޒަށް ބްރީފިން އެރުވި ފަހުން ކަމަށެވެ.
މުއިއްޒުއަށް އެރުވި ބްރީފިންގައި، މުންދު ވިދާޅުވި ގޮތުގައި، މައިގަނޑު ގޮތެއްގައި ހިއްސާކުރީ އެ ދުވަހުގެ ހެނދުނު ސިފައިން ކުރި ޑައިވުގެ މައުލޫމާތެވެ.
"ކެޕޭސިޓީގެ ވާހަކައެއް، އެޑިޝަނަލް ރިސްކެއް ނަގައޭ ތިމަންނާމެންނަށް އެބަ ކަމެއް ބޭނުންވެއޭ، ވިދާޅުވީނަމަ ހަމަ ހެޕިލީ އެކަން އޮބްވިއަސްލީ ސަރުކާރުން ފެސިލިޓޭޓް ވެސް ކޮށްދޭނެ،" އޭނާ ވިދާޅުވި އެވެ.
މުންދު ވަނީ ބޭރުގެ އެހީތެރިކަން ލިބިފަ އޮއްވާ އޮޕަރޭޝަން ކުރިއަށް ގެންދަން ނިންމުމާއި ބޭރުގެ ފަންނީ މާހިރުންގެ އެހީތެރިކަން ލިބުނު ފަހުން އޮޕަރޭޝަން މެދުކަނޑާނުލި ސަބަބާ ގުޅިގެން ވެސް ވާހަކަ ދައްކަވާފަ އެވެ. އޭނާ ވިދާޅުވީ އިޓަލީ ސަރުކާރާއި ޑައިވާސް އެލާޓް ނެޓްވާކް (ޑޭން) ޔޫރަޕުން އެހީތެރިކަން ހުށެހެޅިއިރު ވެސް ސިފައިން ރިކަވަރީ އޮޕަރޭޝަން ފަށައިފި ކަމަށެވެ.
ސަރުކާރުން ސިފައިންނާ މި މައުލޫމާތު ހިއްސާކުރީ މުއިއްޒުއަށް އެރުވި ބްރީފިންއަށް ފަހުގަ އެވެ. މުންދު ވިދާޅުވީ އިޓަލީ ސަރުކާރުގެ ޓެކްނިކަލް އެހީތެރިކަން ފޯރުކޯށްދޭން ހުށަހަޅާފައިވާ ކަމަަށް ފޮރިން މިނިސްޓަރު އިރުތިޝާމް ބްރީފިންއަށް ފަހު މުއާމަލާތް ކުރި ކަމަށެވެ. މިކަމަށް ސިފައިން އާނ ބަސް ބުނުމުން ވަގުތުންވަގުތަށް އިޓަލީ ސަރުކާރަށް އިޖާބަ ދީފަ ވާނެ ކަމަށް ވެސް އޭނާ ވިދާޅުވި އެވެ،
ރިކަވަރީ އޮޕަރޭޝަނުގައި ސިފައިން އަދާކުރި ދައުރާ ގުޅިގެން މުންދު ވަނީ ސިފައިން ހިންގި އޮޕަރޭޝަން "ކުޑައިމީސް" ނުކުރަން އެދިވަޑައިގެންފަ އެވެ. އަދި، އޭނާ ވިދާޅުވި ގޮތުގައި ޑޭންގެ ޑައިވަރުންނަށް ރިކަވަރީ އޮޕަރޭޝަން ކާމިޔާބުކުރެވުނީ ސިފައިންގެ ޑައިވަރުން ކުރި މަސައްކަތުންނެވެ.
ސިފައިން ކުރިއަށް ގެންދިޔަ ރިކަވަރީ އޮޕަރޭޝަން މެދުކަނޑާލީ މަހުދީ ނިޔާވުމާ ގުޅިގެންނެވެ. މަހުދީ ނިޔާވި ފަހުން ސިފައިން ވަނީ ރިކަވަރީ އޮޕަރޭޝަނުގައި 30 މީޓަރަށް ވުރެ ފުނަށް ނުފީނާ ގޮތަށް ނިންމާފަ އެވެ. އެ އޮޕަރޭޝަނުގައި ފަހުން އިސްކޮށް އުޅުނީ ޑޭންއިން ރާއްޖެ ފޮނުވި ފިންލެންޑުގެ ތަޖުރިބާކާރު ޓެކްނިކަލް ޑައިވަރުންގެ ޓީމުންނެވެ.
ފިންލެންޑުގެ ޓީމުން ވަނީ ރިކަވަރީ އޮޕަރޭޝަނާ ގުޅި އެ މީހުން ކުރި ފުރަތަމަ ޑައިވުގައި ހޮހޮޅައިގެ ތެރޭގައި ތިބި އިޓަލީ މީހުން ހޯދާފަ އެވެ. މި ހަތަރު މީހުންގެ ހަށިގަނޑު ހޮހޮޅައިން ނެގީ ފަހަރަކު ދެ މީހަކު މަގުން ދެ ދުވަސް މަތިންނެވެ. ރިކަވާކުރި އެންމެންގެ ހަށިގަނޑު ވަނީ އިޓަލީއަށް ފޮނުވާލާފަ އެވެ.
