ކުރީގެ ތިން ރައީސުން ގުޅިގެން ސަރުކާރަށް ހުށަހަޅާ ކަންކަމާއި ކުރިއަށް އޮތް ތަނުގައި މަސައްކަތް ކުރާނެ ގޮތުގެ މަގުޗާޓެއް އެކުލަވާލާނެ ކަމަށް ވިދާޅުވި އެވެ. އިދިކޮޅު އިއްތިހާދުގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ކުރީގެ ރައީސް އިބްރާހީމް މުހައްމަދު ސާލިހު ވިދާޅުވީ، ސަރުކާރުން މިހާރުން މިހާރަށް ކުރަންޖެހޭ އެންމެ މުހިންމު ކަމަކީ މިހާރު ހައްޔަރުކޮށްފައިވާ ނޫސްވެރިން މިނިވަންކުރުން ކަމަށެވެ. އަދި ނޫސްވެރިކަމުގެ މިނިވަންކަމަށް ހުރަސްއެޅޭ ގޮތަށް ނެރެފައިވާ އަމުރުތައް ނުވަތަ ގެގް އޯޑަރުތައް ވަގުތުން ބާތިލުކުރުމަށް ވެސް އެމަނިކުފާނު ވަނީ ސަރުކާރަށް ގޮވާލައްވާފަ އެވެ.
ރައީސް ސޯލިހު އިތުރަށް ވިދާޅުވީ، ކުރިއަށް އޮތް ދުވަސްތަކުގައި މަސައްކަތްތައް ތަރުތީބުކުރުމަށްޓަކައި ކޮންމެ ރައީސެއްގެ ފަރާތްޕުޅުން މެންބަރުން ހިމެނޭ ހާއްސަ ޓީމެއް އެކުލަވާލައްވާނެ ކަމަށެވެ. މި ޓީމުތަކުގެ މައިގަނޑު މަސައްކަތަކަށް ވާނީ ދައުލަތުގެ މުއައްސަސާތަކަށާއި ސަރުކާރަށް ހުށަހަޅަންޖެހޭ ކަންކަން ދެނެގަނެ، އެ ކަންކަން ރަސްމީކޮށް ހުށަހަޅަމުން ގެންދިއުން ކަމަށް އެމަނިކުފާނު ފާހަގަކުރެއްވި އެވެ. މީގެ އިތުރުން، ސަރުކާރުން ރައްޔިތުންގެ ހައްގުތަކަށް އަރައިގަންނަ ނަމަ ނުވަތަ އިސްލާހުވާންޖެހޭ ކަންކަން އިސްލާހު ނުކުރާ ނަމަ، މަގުމައްޗަށް ނުކުމެ މުޒާހަރާކުރަން ޖެހިއްޖެ ހާލަތެއްގައި އެކަން ކުރުމަށް ވެސް ފަސްނުޖެހޭނެ ކަމުގެ ޔަގީންކަން ރައީސް ސޯލިހު ވަނީ ދެއްވާފަ އެވެ.
މި ބައްދަލުވުމުގައި ބައިވެރިވެވަޑައިގެންނެވި ކުރީގެ ރައީސް މުޙައްމަދު ނަޝީދު ވެސް ވަނީ ނޫސްވެރިކަމުގެ މިނިވަންކަމާ ގުޅޭގޮތުން ހުރި ކަންބޮޑުވުންތައް ހިއްސާކުރައްވާފަ އެވެ. ރައީސް ނަޝީދު ވިދާޅުވީ، ޑިމޮކްރަސީއެއްގައި ނޫސްވެރިން ހައްޔަރުކޮށްގެން ގެންގުޅުމަކީ ބަލައިގަނެވޭނެ ކަމެއް ނޫން ކަމަށާއި، މިރެއިން މިރެޔަށް ވެސް ސަރުކާރުން ކުރަންޖެހޭ ކަމަކީ ހައްޔަރުގައި ތިބި ނޫސްވެރިން ދޫކޮށްލުން ކަމަށެވެ. އަދި ހިޔާލުފާޅުކުރުމުގެ މިނިވަންކަމަށް ހުރަސްއެޅޭ ގޮތަށް ނެރެފައިވާ އެންމެހާ އަމުރުތައް ބާތިލުކޮށް، ނޫސްވެރިންނަށް ބިރުވެރިކަމެއް ނެތި މަސައްކަތް ކުރެވޭނެ މާހައުލެއް ގާއިމުކޮށްދޭންޖެހޭ ކަމަށް އެމަނިކުފާނު ވިދާޅުވި އެވެ.
ތިން ރައީސުން ގުޅިގެން ފައްޓަވާފައިވާ މި މަސައްކަތަކީ ގައުމުގެ ހަމަޖެހުމާއި، ރައްޔިތުންގެ އަސާސީ ހައްގުތައް ކަށަވަރުކުރުމަށް ކުރެވޭ މަސައްކަތެއްގެ ގޮތުގައި އިދިކޮޅު ފަރާތްތަކުން ސިފަކުރެ އެވެ. މި މަސައްކަތުގެ ދަށުން ކުރިއަށް އޮތް ހަފުތާތަކުގައި ސަރުކާރަށް ހުށަހަޅާނެ އިތުރު ކަންކަން ތަރުތީބުކުރަމުންދާ ކަމަށާއި، ރައްޔިތުންގެ އަޑު ސަރުކާރަށް އިއްވުމުގައި ދޫނުދެއްވާނެ ކަމަށް ވެސް އެ ބޭފުޅުން ވިދާޅުވި އެވެ.
މި ބައްދަލުވުމުގައި ކުރީގެ ރައީސުން ވަނީ ގައުމުގެ އިގްތިސާދީ އަދި އިޖުތިމާއީ ހާލަތާ މެދު ވެސް ކަންބޮޑުވުން ފާޅުކުރައްވާފަ އެވެ. ސަރުކާރުގެ ސިޔާސަތުތައް ހުރި ގޮތުން ރައްޔިތުންނަށް ކުރިމަތިވަމުންދާ ދަތިތަކަށް ހައްލު ހޯދުމަށްޓަކައި، ސިޔާސީ ގޮތުން ކުރަންޖެހޭ ހުރިހާ މަސައްކަތެއް އެކުގައި ކުރައްވާނެ ކަމަށް އެ ބޭފުޅުން ވިދާޅުވި އެވެ. މިއީ ރާއްޖޭގެ ސިޔާސީ ތާރީހުގައި ކުރީގެ ތިން ރައީސުން މިފަދަ ގޮތަކަށް ގުޅިގެން މަސައްކަތް ކުރަން ފެށި ފުރަތަމަ ފަހަރުކަން ފާހަގަކުރެވެ އެވެ.
