ޖަލަށް ލާފައިވާ ނޫސްވެރިންނާއި ބަންދުކޮށްފައި ތިބި ސިޔާސީ ހައްޔަރީން މިނިވަން ކުރުމަށް ގޮވާލައި ރޭ ކުރި މުޒާހަރައިން ހައްޔަރުކުރި ދެ މީހަކު ދޫކޮށްލުމަށް ފަހު ކޯޓު އަމުރެއްގެ ދަށުން ހައްޔަރުކޮށްފި އެވެ.
ހާލަތާ ނުބައްދަލު ބާރުގެ ބޭނުންކޮށް، ސުލްހަވެރިކަމާ އެކު މުޒާހަރާ ކުރަމުންދާ ފަރާތްތަކަށް ބިރު ދެއްކުމުގެ ގޮތުން އާދަޔާ ހިލާފަށް ގިނަ ފުލުހުން ރޭގެ މުޒާހަރާއަށް ސަރުކާރުން ފޮނުވި އެވެ.
އޭގެ ތެރެއިން ފުލުހުން ގެންދިޔަ ދެ މީހުން ކަމަށްވާ މުހައްމަދު ޝާމިން އާއި އަލީ މުޝައްރަފު ރޭ ދަންވަރު އަލުން ހައްޔަރުކުރީ ކޯޓު އަމުރެއްގެ ދަށުންނެވެ.
އެ ދެ މީހުންނަށް ކުރަނީ ފުލުހަކަށް ހަމަލާ ދިން ކަމުގެ ތުހުމަތެވެ. ޝާމިން އާއި މުޝައްރަފަކީ ވެސް މިހާރު ކުރިއަށްދާ މުޒާހަރާތަކުގެ އިސް ސަފުން ފެންނަ ދެ މީހުންނެވެ.
ގާނޫނު ބަދަލުކޮށް، މާލޭގައި މުޒާހަރާ ކުރުމުގެ ހައްގު އެންމެ ފުޅާކޮށް ދިނުމަކީ މުއިއްޒުގެ ވައުދެކެވެ. އެކަން މެނިފެސްޓޯގައި ހިމެނޭ ސަރުކާރުގެ ލެޖިސްލޭޓިވް އެޖެންޑާގައި ވެސް ހިމެނެ އެވެ. އެކަމަކު ސަރުކާރުން އަމަލު ކުރަނީ އެ ވައުދާ ސީދާ ހިލާފަށެވެ.
