އަދަދު ނޫހުގެ ސީއީއޯ ހުސެއިން ފިޔާޒު މުސާ އާއި އެޑިޓަރު ހަސަން މުހައްމަދުގެ މައްޗަށް ޖިނާއީ ދައުވާތައްކޮށްގެން އުޅޭ މައްސަލައިގައި ހިމެނޭ "އައިޝާ" ޑޮކިއުމެންޓްރީގެ ވާހަކަ ނުދައްކަން ކްރިމިނަލް ކޯޓުން އަމުރުކުރި ހަބަރު ލިޔުމުން ކޯޓަށް ހާޒިރުކުރި މި ނޫހުގެ ނޫސްވެރިޔާ ލީވާން އަލީ ނާސިރަށް ވަކީލެއް ހަމަޖެއްސުމަށް އެންމެ ދެ ގަޑިއިރު އެ ކޯޓުން ދީފި އެވެ.
މިއަދު ހެނދުނު 11:00 އަށް ކޯޓަށް ލީވާން ހާޒިރުވީ ވަކީލާކާ ނުލަ އެވެ. އޭނާ އެދުނީ ވަކީލެއް ހަމަޖެއްސުމަށް އިތުރު ވަގުތު ދިނުމަށެވެ.
މައްސަލަ ބައްލަވާ ގާޒީންގެ ބެންޗުން ނިންމެވީ ވަކީލެއް ހަމަޖެއްސުމަށް އެންމެ ދެ ގަޑިއިރު ދިނުމަށެވެ. ލީވާން އެދުނީ ވަކީލެއް ހަމަޖެއްސުމަށް 10 ދުވަހުގެ މުއްދަތެއް ދިނުމަށެވެ.
މިއަދުގެ ވަގުތެއްގައި އަދަދުގެ ނޫސްވެރިޔާ މުހައްމަދު ޝަހުޒާން ވެސް ކޯޓަށް ހާޒިރުވާން އަމުރެއް ވަނީ ފޮނުވާފަ އެވެ. އޭނާ ހާޒިރުކުރަނީ މުއިއްޒުއާ ސުވާލުކުރިއިރު ކޯޓުގެ ހުރުމަތް ކަނޑާލާފައިވާ ކަމަށް ތުހުމަތުކޮށެވެ.
ކްރިމިނަލް ކޯޓުން ނެރުނު ގެގް އޯޑަރުގައި، އައިޝާ ޑޮކިއުމެންޓަރީ މުޖުތަމައުގެ ތެރޭގައި ދައުރުކުރުން މުޅިން މަނާކޮށް، އެ ވީޑިއޯގައި ހިމެނޭ ވާހަކަތައް، އެއްވެސް ފަރާތަކުން ސީދާގޮތުންނާއި ނުސީދާގޮތުން ދެއްކުން މަނާކުރި އެވެ. އަދި، މި މައްސަލައިގެ ހަސްމުންނާއި ކުށުގެ ޝިކާރައަށްވީ ފަރާތާ ގުޅުވައިގެން އެއްވެސް ވާހަކައެއް ދެއްކުން ވެސް އެ އަމުރުން މަނާކުރި އެވެ.
