ރައީސް އޮފީހުގައި ހެނދުނު ބޭއްވި ނޫސްވެރިންގެ ބައްދަލުވުމުން މި ނޫހުގެ މުހައްމަދު ޝަހުޒާން ބޭރުކޮށްލުމަށް ފަހު، އެ އޮފީހުން އިންތިޒާމުކޮށްގެން ބާއްވާ އެއްވެސް ނޫސްވެރިންގެ ބައްދަލުވުމެއްގައި އަދަދު ނޫހާއި އަދަދު ނޫހުގެ ނޫސްވެރިންނަށް ބައިވެރިނުވެވޭނެ ކަމަށް ރައީސް އޮފީހުން މިއަދު އަންގައިފި އެވެ.
ރައީސް އޮފީހުގެ މީޑިއާގެ ރަސްމީ ވަޓްސްއެޕް ގްރޫޕުގައި ހިއްސާކުރި މެސެޖެއްގައި އަދަދުއަށް ހުއްދަ ނުދޭން ނިންމިނިންމުން ގުޅުވާފައި ވަނީ މި ނޫހުން ތައްޔާރުކުރި "އައިޝާ" ޑޮކިއުމެންޓްރީއާ ގުޅިގެން ބަލަމުންދާ މައްސަލަތަކާއި އޭގެ ތެރޭގައި ހިމެނޭ ޖިނާއީ މައްސަލަތަކާ ގުޅިގެން ކްރިމިނަލް ކޯޓުން ނެރުނު އަމުރާ އެވެ.
ކްރިމިނަލް ކޯޓުން ނެރުނު އަމުރަކީ، މި ނޫހުގެ ސީއީއޯ ހުސެއިން ފިޔާޒު މުސާ އާއި އެޑިޓަރު ހަސަން މުހައްމަދުގެ މައްޗަށް އެ ކޯޓުގައި އުފުލާފައިވާ ދައުވާތަކާ ގުޅިގެން ނެރުނު އަނގަބަންދުކުރުމުގެ އަމުރު (ގެގް އޯޑާ) އެކެވެ. މި އަމުރުގައި ވަނީ އެ ކޮންޓެންޓް ދައުރުކުރުމާއި، އޭގާ ހުރި ވާހަކަތައް ނުސީދާ ގޮތުންނާއި ސީދާ ގޮތުން ދެއްކުން އެންމެނަށް މަނާކޮށްފަ އެވެ. ރައީސް އޮފީހުން ބުނީ، ޝަހުޒާންގެ ސުވާލު އެ އަމުރާ ހިލާފު ކަމަށެވެ.
އަދަދު ނޫހަށް ހުއްދަ ނުދޭން ނިންމުމުގައި، މި ސަރުކާރުން ވުޖޫދުކޮށްފައިވާ މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ގާނޫނުގައި ބަޔާންކުރާ ސުލުކީ މިންގަނޑާއި (40 ވަނަ މާއްދާ) އާއި މީޑިއާތަކަށް މަތިކޮށްފައިވާ ތެދު މައުލޫމާތު ހާމަކުރުމުގެ ޒިންމާ (44 ވަނަ މާއްދާ) އަށް ރިއާޔަތްކޮށްފައިވެ އެވެ.
ނަމަވެސް، ރައީސް އޮފީހުން އަދަދު ނޫހާއި ނޫސްވެރިން މަނާކުރީ "ރައީސުލްޖުމްހޫރިއްޔާގެ އޮފީހުން ބާއްވާ ނޫސްވެރިންގެ ބައްދަލުވުންތަކަށް ހާޒިރުވުމާއި، އެ ބައްދަލުވުންތައް ކަވަރުކުރުމުގައި އަމަލުކުރާނެ ގޮތުގެ އުސޫލު" ގެ 13 ވަނަ މާއްދާއިން އެ އޮފީހަށް ލިބޭ އިހުތިޔާރުގެ ދަށުންނެވެ.
ރައީސް އޮފީހުން ވަނީ އައިޝާ ޑޮކިއުމެންޓްރީއާ ގުޅިގެން ކްރިމިނަލް ކޯޓުގައި ހިނގަމުންދާ މައްސަލަ އާއި މީޑިއާ އެންޑް ބްރޯޑްކާސްޓިން ކޮމިޝަނުން ބަލަމުންދާ މައްސަލަތައް ނިމެންދެން މި ނޫހަށް ނޫނީ އަދަދު ނޫސް ތަމްސީލުކުރާ ނޫސްވެރިންނަށް އެ ހުއްދަ ނުދޭން ނިންމާފަ އެވެ.
