"އައިޝާ" ޑޮކިއުމެންޓްރީގެ މައްސަލައިގައި އަދަދު ނޫހުގެ ސީއީއޯ ހުސެއިން ފިޔާޒު މޫސާ އާއި އެޑިޓަރު ހަސަން މުހައްމަދުގެ މައްޗަށް ޖިނާއި ދައުވާތައް ކުރުމާއި، ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުން މި ނޫހުގެ ނޫސްވެރިޔާ މުހައްމަދު ޝަހުޒާން ބޭރުކޮށްލުން، ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން މިއަދު ކުށްވެރިކޮށްފި އެވެ.
މި ޑޮކިއުމެންޓްރީގެ މައްސަލައިގައި ފިޔާޒާއި ހަސަނަށް ކުރަނީ ގަޒުފުކުރުމުގެ ކުށުގެ ދައުވާ އެވެ. ޕްރޮސެކިޔުޓާ ޖެނެރަލް (ޕީޖީ) އޮފީހުން ވަނީ އިއްޔެ މި މައްސަލަތައް ކޯޓަށް ހުށަހަަޅާފަ އެވެ.
ކްރިމިނަލް ކޯޓުން ވަނީ އެ ޑޮކިއުމެންޓްރީގެ ވާހަކަ ދެއްކުން މަނާކޮށް އަނގަ ބަންދުކުރުމުގެ އަމުރު (ގެގް އޯޑާ) އެެއް ވެސް ނެރެފަ އެވެ.
އަދަދުއާ ދެކޮޅަށް އަޅަމުންދާ ފިޔަވަޅުތަކާ ގުޅިގެން ކުރި ޕޯސްޓެއްގައި، ސީޕީޖޭއިން ވަނި ފިޔާޒާއި ހަސަނުގެ މައްޗަށް އުފުލާފައިވާ ދައުވާތައް އަނބުރާ ގެންދިއުމަށް ފީޖީ އޮފީހަށް ގޮވާލަފަ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުން ޝަހުޒާން ބޭރުކޮށްލި މައްސަލައިގައި ސީޕީޖޭއިން ބުނީ އޭނާ ބޭރުކޮށްލީ ޖަވާބުދޭން އުނދަގޫ ސުވާލެއް ކުރުމުން ކަމަށް ބުނެފަ އެވެ. އަދި އެއްވެސް ބިރެއް، ޖެހިލުމެއް ނެތި ނޫސްވެރިން ބޭނުން ސުވާލެއްކޮށް، ނޫސްވެރިކަން ކުރުމުގެ ފުރުސަތު ލިބެން ޖެހޭ ކަަމަށް އެ ޖަމިއްޔާއިން ބުންޏެވެ.
މީގެ ކުރިން ސީޕީޖޭއިން ވަނީ މި މައްސަލައިގެ ތަހުގީގަށް އަަދަދުގެ އިލެކްޓްރޯނިކްސް ސާމާނު ގެންދިޔުމާ ގުޅިގެންނާއި ފިޔާޒާއި ހަސަންގެ ޕާސްޕޯޓު ހިފެހެއްޓި މައްސަލައިގައި ވެސް ކަންބޮޑުވުން ފާޅުކޮށްފަ އެވެ. އެ ޖަމިއްޔާއިން ވަނީ ޕާސްޕޯޓުތައް ދޫކޮށްލައި، އަދަދުގެ ސާމާނު އަނބުރާ ރައްދުކޮށްދޭން ގޮވާލާފަ އެވެ.
މި ޑޮކިއުމެންޓްރީގެ މައްސަލަ ހޫނުވީ، އެ ނެރުނުތާ މަހަކަށް ވުރެ ގިނަ ދުވަސް ފަހުން ރައީސް މުހައްމަދު މުއިއްޒުއާ އެ ސުވާލުކުރުމުންނެވެ. އެ ދުވަހު އަދަދު އޮފީސް ރެއިޑުކޮށް، ޕާސްޕޯޓުތަކާއި އިލެކްޓްރޯނިކްސްތައް ހިފެހެއްޓި އެވެ. އެ ތާރީހުން ފެށިގެން، އިއްޔެ ކޯޓަށް މައްސަލަ ހުށަހެޅުމާ ދޭތެރޭގައި ހޭދަވީ ދެ ހަފުތާ އެވެ.
މި މައްސަލައިގައި އަދަދުގެ ވެރިންގެ އިތުރުން ޝަހުޒާން އާއި ނޫސްވެރިޔާ ލީވާން އަލީ ނާސިރު ކޯޓުގެ ހުރުމަތް ކަނޑާލި މައްސަލަ ބަލަން ވެސް ކްރިމިނަލް ކޯޓުން ވަނީ ބަލަން ފަށާފަ އެވެ. ލީވާންގެ މައްސަލަ ބަލަނީ ކޯޓު އަމުރު ރިޕޯޓުކުރުމުންނެވެ. ޝަހުޒާން ގެންދަނީ މުއިއްޒުއާ ސުވާލުކުރުމުންނެވެ.
