ދައުލަތުގެ މުސާރަތައް އެއްހަމަ ކުރަން މިދިޔަ ސަރުކާރުން ފެށި ޕޭ ހާމަނައިޒޭޝަން މަސައްކަތުގެ ދަށުން މި ސަރުކާރުން ޕޭ ހާމަނައިޒްކުރިއިރު ބައެއް މުވައްޒަފުންގެ މުސާރަ ކުޑަވި ކަމަށް ރައީސް މުހައްމަދު މުއިއްޒު އެއްބަސްވެވަޑައިގެންފި އެވެ.
ރައީސް އޮފީހުގައި ނޫސްވެރިންނާ ބައްދަލުކުރައްވާ މުއިއްޒު ވިދާޅުވީ ޕޭ ހާމަނައިޒޭޝަންގެ ދަށުން މުވައްޒަފުންގެ މުސާރަތައް ބޮޑުކުރުން ވައުދުވިޔަސް، ޕޭ ހާމަނައިޒްގެ ދަށުން ބައެއް މުވައްޒަފުންގެ މުސާރަ ކުޑަވިކަމީ ހަގީގަތެއް ކަމަށެވެ.
"ޕޭ ހާމަނައިޒޭޝަންގެ ތެރެއިންވެސް ގެއްލުންތަކެއް ނޫނިއްޔާ އެންމެ އެދެވޭ ގޮތަށް އެކަން ނުކުރެވި ތިބި މުވައްޒަފުން ތިބި. އެއީ ހަމަ ހަގީގަތް. އަޅުގަނޑު ނިންމީކީ އެހެނެއް ނޫން ދެއްތޯ. އަޅުގަނޑު ހުރިހާ ރައްޔިތުންނަށްވީ ވައުދަކީ މުސާރަ ބޮޑުކޮށްދޭން. އެހެންނަމަވެސް އަޅުގަނޑު މި ފާހަނގަވީ އެކި ސަބަބުތަކާ ހެދި ޕޭ ކޮމިޝަނުން ޕޭ ހާމަނައިޒްކުރިއިރު މުސާރަ ބޮޑުނުވެ އެހެންނަމަވެސް ކުޑަވިވެސްވި ބައެއް ފަރާތްތައް ތިބިކަން އެނގިފައިވަނީ،" މުއިއްޒު ވިދާޅުވި އެވެ.
މުއިއްޒު ވިދާޅުވީ ޕޭ ހާމަނައިޒްކުރިއިރު މުވައްޒަފުންގެ މުސާރަ ބޮޑުނުވުމުގެ މައްސަލަ ހައްލުކޮށް މިހާރު ނިމިފައިވާ ކަމަށާއި ޖުމްލަކޮށް މުސާރަ ބޮޑުނުވެ ތިބި އެންމެންގެ މުސާރަ ދެން މުސާރަ ލިބިގެންދާއިރު ހައްލުވާނެ ކަމަށެވެ.
"މިފަހަރު މުސާރަ ލިބޭއިރު، އަޅުގަނޑު މިއަދު ހެނދުނު އެންމެ ފަހުން މައުލޫމާތު ނަގައިގެން މިއައީ ޕޭ ކޮމިޝަނުގެ ފަރާތުން. މިފަހަރު މުސާރަ ލިބޭއިރު އިރާދަކުރެއްވިއްޔާ ޖުމްލަކޮށް ވަކިވަކި އިންޑިވިޖުއަލް ކޭސަސް ނުހުންނާނެ ވާހަކައެއް ނޫން. އެކަމަކު ޖުމްލަކޮށް މިކަހަލަ މުސާރަ މައްޗަށް ނުގޮސް ތިބި ފަރާތްތަކުގެ މައްސަލަ ހައްލުވާނެ،" މުއިއްޒު ވިދާޅުވި އެވެ.
ޕޭ ހާމަނައިޒްކުރިއިރު އެޗްއާރް ޑިޕާޓްމަންޓްގައި މަސައްކަތްކުރާ މުވައްޒަފުންނާއި ލީގަލްގައި މަސައްކަތްކުރާ މުވައްޒަފުންގެ އިތުރުން ކައުންސިލްތަކުގެ މުވައްޒަފުންގެ މުސާރަވެސް ކުޑަވި ކަމަށް މުއިއްޒު ވިދާޅުވި އެވެ.
މުސާރަތައް އެއް ހަމަ ކުރުމުގެ ސިޔާސަތުގެ ބިންގަލަކީ، މީގެ ދިހަ އަހަރު ކުރިން ފާސްކޮށްފައިވާ ދައުލަތުގެ މުސާރައިގެ ސިޔާސަތުގެ ގާނޫނެވެ. މި ގާނޫނު 2016 ގައި ފާސްކުރި ނަމަވެސް ފުރަތަމަ ދެ އަހަރު މި ގާނޫނުގައި ބުނާ މަގުސަދުތައް ހާސިލުވާނެ އެއްވެސް ބަދަލެއް މުސާރަތަކަށް ނުގެނެ އެވެ.
މި މަސައްކަތް ފެށީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުންނެވެ. އެ ސަރުކާރުގެ ދައުރުގެ ވަރަށް ކުރީކޮޅު ނޭޝަނަލް ޕޭ ކޮމިޝަނަށް އާ މެންބަރުން ނަގައި، އެ ކޮމިޝަނުގެ މައިގަނޑު މަސައްކަތަކީ "ޕަބްލިކް ސާވިސް ޕޭ ފްރޭމްވާކް" އެއް އެކުލަވާލުން ކަމުގައި ކަނޑައެޅި އެވެ.
އޭރު ސަރުކާރުން ބުނީ 2020 ވަނަ އަހަރުން ފެށިގެން މުސާރަތައް ބޮޑުކުރަން ފަށާނެ ކަމަށެވެ. ނަމަވެސް އެ އަހަރު ލައިގަތް ކޮވިޑު19 ބަލިމަޑުކަމުގެ ތެރޭގައި އިގުތިސޯދު އަޑިއަޅާލުމުން މި ސިޔާސަތު ތަންފީޒުކުރުން ފަސްކުރި އެވެ.
ޕޭ ހާމަނައިޒޭޝަން ސިޔާސަތުގެ ދަށުން ފުރަތަމަ ބޮޑު ކުރީ ތައުލީމީ ދާއިރާގެ މުވައްޒަފުންގެ މުސާރަތަކެވެ. އެއީ މެއި، 2022 ގައި، އެވެ. އެ ފަހުން މާޗު، 2023 ގައި މަތީ ތައުލީމު ދާއިރާގެ މުސާރަތައް ބޮޑުކުރި އެވެ. އަދި މެއި، 2023 ގައި ސިއްހީ ދާއިރާގެ މުވައްޒަފުންގެ މުސާރަތައް ބޮޑުކުރި އެވެ.
މުހައްމަދު މުއިއްޒު ވެސް ވަނީ މި ސިޔާސަތު ކުރިއަށް ގެންދަން ނިންމަވައި، މިދިޔަ އަހަރުގެ ތެރޭގައި ދައުލަތުގެ 20،000 އަށް ވުރެ ގިނަ މުވައްޒަފުންގެ މުސާރަތައް ބޮޑުކޮށްފަ އެވެ. އޭގެ ތެރޭގައި ސިވިލް ސާވިސް މުވައްޒަފުންނާއި ޖުޑީޝަރީ މުވައްޒަފުންނާއި ކައުންސިލުތަކުގައި މަސައްކަތް ކުރާ މުވައްޒަފުން ހިމެނެ އެވެ.
މި އަހަރުގެ ތެރޭގައި ބޮޑުކުރަން ހުރި މުސާރަތައް ބޮޑުކުރުމާއެކީ، ހުރިހާ ދާއިރާއެއްގެ މުސާރަތައް އެއްހަަމަ ކުރެވުނީ އެވެ.
