ސަރުކާރު ޔުނިވާސިޓީތަކުގެ ލެޗްކަރާއިންގެ މުސާރަ 59 ޕަސަންޓަށް އިތުރުކޮށްފައިވާ ކަން ރައީސް އިބްރާހީމް މުހައްމަދު ސޯލިހު މިއަދު އިއުލާންކުރައްވައިފި އެވެ.

ތ. ހިރިލަންދޫ ސްކޫލްގެ 71 ވަނަ އަހަރީ ދުވަހުގެ މުނާސަބަތުގައި ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ މުސާރައިގެ މި ކުރިއެރުމާއެކު، އާންމު ލެކްޗަރާއިންނަށް ކުރިން ލިބެމުން އައީ 18،680ރ. ކަމަށް ވިޔަސް މި މަހުން ފެށިގެން އިތުރު ވަގުތުގެ ފައިސާ ނުހިމަނައި، 29،900ރ. ލިބޭނެ ކަމަށެވެ.

"މިއީ 59 އިންސައްތައިގެ ކުރިއެރުމެއް،" ރައީސް ސޯލިހު ވިދާޅުވި އެވެ.

ސީނިއާ ލެކްޗަރާއަކަށް ކުރިން 20،830ރ. ލިބުނު ނަމަވެސް، މި މަހުން ފެށިގެން 34،000ރ. ލިބޭނެ ކަން ވެސް ރައީސް ފާހަގަކުރެއްވި އެވެ. އަދި ޔުނިވާސިޓީތަކުގެ އެހެން ސީނިއާ މަގާމުތަކުގައި ތިބި ޕްރޮސެފަރުންނާއި ލެކްޗަރާއިންގެ މުސާރައަށް ގެނައި ބަދަލު އިއުލާންކުރެއްވި އެވެ.

ލެކްޗަރާއިންގެ މުސާރައަށް ގެނައި ބަދަލުތައް؛

• އެސިސްޓެންޓް ޕްރޮފެސާ - 23،500ރ. އިން 39،400ރ. އަށް
• އެސޯސިއޭޓް ޕްރޮފެސާ - 26،000ރ. އިން 45،000ރ. އަށް
• ޑީން - 30،000ރ. އިން 38،000ރ. އަށް
• ރަޖިސްޓްރާ - 23،000ރ. އިން 42،000ރ. އަށް
• ޑެޕިއުޓީ ވައިސް ޗާންސެލަރު - 39،000ރ. އިން 48،000ރ. އަށް
• ވޮކޭޝަނަލް އެސޯސިއޭޓް ލެކްޗަރާ - 14،000ރ. އިން 26،000ރ. އަށް
• ވޮކޭޝަނަލް ލެކްޗަރާ - 17،000ރ. އިން 29،000ރ. އަށް
• ވޮކޭޝަނަލް ސީނިއާ ލެކްޗަރާ - 17،000ރ. އިން 34،000ރ. އަށް

ލެކްޗަރާއިންގެ އިތުރަށް ސިއްހީ ދާއިރާގައި މަސައްކަތްކުރާ މީހުންގެ މުސާރަ ވެސް އަންނަ މެއި މަހުން ފެށިގެން ބޮޑުވާނެ ކަމަށް، މިދިޔަ މަހު ރައްޔިތުންގެ މަޖިލިސް ހުޅުވާ ޖަލްސާގައި ރައީސް ސޯލިހު އިއްވެވި ރިޔާސީ ބަޔާނުގައި ވިދާޅުވެފައިވެ އެވެ.

ސިއްހީ ދާއިރާގެ އިތުރުން ބައެއް އެހެނިހެން މުވައްޒަފުންގެ މުސާރަ ބޮޑުވެގެން ދާނެ ކަން ވެސް ރައީސް ފާހަގަކުރެއްވި އެވެ. އެގޮތުން ސަރުކާރުގެ ވުޒާރާތަކުގައި 35 ޕަސަންޓް އެލަވަންސް ނުލިބި ތިބި މުވައްޒަފުންނަށް މެއި މަހުން ފެށިގެން އެލަވަންސް ލިބޭނެ ކަމަށް ވިދާޅުވި އެވެ.

މިދިޔަ އަހަރު ޓީޗަރުންގެ މުސާރަ ވެސް ސަރުކާރުން ވަނީ ބޮޑުކޮށްފަ އެވެ. ޕްރިންސިޕަލުންނާއި، ޑެޕިއުޓީ ޕްރިންސިޕަލުންނާއި، ޓީޗަރުންނާއި، އެޑިއުކޭޝަން ޕްރޮފެޝަނަލްސްގެ މުސާރަ، ގާތްގަނޑަކަށް 50 ޕަސެންޓަށް ކުރިއެރުން ގެނެސްފައިވެ އެވެ.