ސިއްހީ ދާއިރާގެ ހުރިހާ މުވައްޒަފުންގެ މުސާރަ މާދަމާއިން ފެށިގެން ބޮޑުވާނެކަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު އިއުލާނު ކުރައްވައިފި އެވެ.
އެ ދާއިރާގެ މުވައްޒަފުންގެ މުސާރަ ހެޔޮ ބަދަލެއް ގެންނާނެ ކަމަށް ރައީސް ސޯލިހު އެންމެ ފުރަތަމަ ވިދާޅުވީ މި އަހަރުގެ ރިޔާސީ ބަޔާން އިއްވަވަމުންނެވެ.
މިއަދު ހެނދުނު ދެއްވި ވީޑިއޯ ހިތާބެއްގައި ރައީސް ސޯލިހު ވިދާޅުވީ ސިއްހީ ދާއިރާގެ ބޭފުޅުންނަށް މިހާތަނަށް ދެމުން އައީ އެބޭފުޅުން ކުރާ މަސައްކަތާ އެކަށީގެންވާ އުޖޫރައެއް ނޫން ކަމަށާއި އެއީ މި ދާއިރާއަށް ދިމާވެފައިވާ އެންމެ ބޮޑު ގޮންޖެހުން ކަމަށެވެ.
"މި ދާއިރާއަށް ގެނެވޭ ކުރިއެރުމާއި މި ދާއިރާއިން ފޯރުކޮށްދޭ ހިދުމަތުގެ ފެންވަރު ބަރޯސާވެފައިވަނީ އިންސާނީ ވަސީލަތްތަކާ، ސިއްހީ ދާއިރާގެ ބޭފުޅުންނަށް މިހާތަނަށް ދެމުން އައީ، އެބޭފުޅުން އެ އުފުއްލަވާ ބުރަޔާ އެކަށޭނަ މުސާރައެއް ނޫން،" ރައީސް ވިދާޅުވި އެވެ.
އެކަމުގެ ސަބަބުން މި ދާއިރާއަށް ޝައުގުވެރިވާ އަދި ތަމްރީނު ލިބިފައިވާ ދިވެހިންގެ އަދަދު ވެސް މަދު ކަން ރައީސް ފާހަގަކުރެއްވި އެވެ. އަދި މި ބަދަލާއެކު މިކަމަށް ހައްލެއް ލިބިގެންދާނެ ކަމަށް އުންމީދު ކުރައްވާ ކަމަށް ރައީސް ވިދާޅުވި އެވެ.
"އަޅުގަނޑުގެ އުއްމީދަކީ ސިއްހީ ދާއިރާގެ މުސާރައަށް މިގެނެވޭ ހެޔޮ ބަދަލާއެކު، މިދާއިރާއަށް ޝައުގުވެރިވާ ދިވެހިންގެ އަދަދު އިތުރުވެ، ހިދުމަތުގެ ފެންވަރު ރަނގަޅުވުން،" ރައީސް ވިދާޅުވި އެވެ.
މި ބަދަލާއެކު ޑޮކްޓަރުންނާއި ނަރުހުންގެ އިތުރުން މެޑިކަލް ލެބޯޓްރީ ޓެކްނޮލޮޖިސްޓުންނާއި ބަޔޯމެޑިކަލް އިންޖިނިއަރުން ފަދަ ފަންނީ މުވައްޒަފުންގެ މުސާރަ ވެސް ބޮޑުވެގެން ދާނެ ކަން ރައީސް ފާހަގަކުރެެއްވި އެވެ.
"ސިއްހީ ދާއިރާގެ މުސާރަތަކަށް ބަދަލުތައް ގެންނައިރު، ދިވެހިން ބިނާކުރުމަށް މިހާތަނަށް ދަތިކަމަށް ފާހަގަކުރެވިފައިވާ ފަންނުތަކުން، ކުރިއަށްދިއުމަށް ހިތްވަރު ދިނުމުގެ ގޮތުން، އެފަދަ ފަންނުތަކަށް ނިސްބަތުން ރަނގަޅު މުސާރައެއް މިހާރުވަނީ ކަނޑައެޅިފައި،" ރައީސް ވިދާޅުވި އެވެ.
މުސާރައަށް އައި ބައެއް ބަދަލުތައް
މުސާރައަށް ގެންނަ ބަދަލާއެކު ސީނިއާ ރެޖިސްޓާޑް ނަރުހުންގެ މުސާރައަށް އިތުރު ގަޑީގެ އެލަވަންސާ ނުލައި 29،271ރ. ލިބޭނެ އެވެ. އަދި ސްޕެޝަލިސްޓް މުސާރައަށް އިތުރުގަޑީގެ އެލަވަންސް ނުލައި 41،976ރ. ލިބޭނެ އެވެ.
ކުރިން އިތުރު ގަޑީގެ އެލަވަންސާއެކު މުސާރައަށް 28،727ރ. ލިބެމުން ދިޔަ މެޑިކަލް އޮފިސަރުންނަށް އެލަވަންސް ނުލައި 41،541ރ. ލިބޭނެ އެވެ.
ސަބް ސްޕެޝަލިސްޓް ކޮންސަލްޓަންޓުންގެ އެންމެ މަތީ ގިންތީގެ މުސާރަ އިތުރު ގަޑީގެ އެލަވަންސް ނުލައި 98،137ރ. ވަނީ ކަނޑައަޅައިފަ އެވެ.
ރައީސް އިތުރަށް ވިދާޅުވީ ދާއިރާއިން ދިވެހިން އިތުރަށް ބިނާކުރުމަށް ބާރުއެޅުމުގެ ގޮތުން، މެޑިކަލް އަދި ޑެންޓަލް އިންޓާންޝިޕް ފުރިހަމަ ކުރާ ފަރާތްތަކަށް އިންޓާން އެލެވަންސް ދިނުމަށް ވެސް ނިންމައިފައިވާ ކަމަށެވެ.
"ޞިއްޙީ ދާއިރާއިން ދިވެހިން މަދު މިފަދަ ފަންނުތަކުން މީހުން ބިނާކުރުމަށް ސްކޮލަޝިޕާއި ލޯނު ޕްރޮގްރާމްތައް ތައާރަފުކުރުމަށް ވެސް އަޅުގަނޑުމެން ވަނީ ނިންމާފައި،" ރައީސް ވިދާޅުވި އެވެ.
މުސާރައަށް ގެނައި ބަދަލުތަކުގެ އިތުރު ތަފްސީލުތައް މިރޭ ހާމަކުރާނެ އެވެ.
