ގައްޒާއަށް އެހީ ހިފައިގެން ދަތުރުކުރި ފްލޮޓިލާއެއްގައި ތިއްބާ ބައިނަލްއަގުވާމީ ކަނޑުގެ ސަރަހައްދުން ހައްޔަރުކުރި ދެ އެކްޓިވިސްޓުން ކަމަށްވާ ސްޕެއިންގެ ސައިފް އަބޫ ކޭޝެކް އާއި ބްރެޒިލްގެ ތިއާގޯ އަވީލާ، އިސްރާއީލުން އިއްޔެ ޑީޕޯޓްކޮށްލާފައިވާ ކަމަށް އެ ގައުމުގެ ފޮރިން މިނިސްޓްރީން ބުނެފި އެވެ.
މި ދެ އެކްޓިވިސްޓުންނަކީ އިސްރާއީލުން ގައްޒާ ހިސާރުކޮށްފައި އޮތް އޮތުން ނިމުމަކަށް ގެނައުމަށާއި އެ ސަރަހައްދަށް ބޭނުންވާ އެހީ ފޯރުކޮށްދިނުމަށް، މިދިޔަ އޭޕްރިލް މަހުގެ 12 ވަނަ ދުވަހު ސްޕެއިން އިން ފުރި "ސެކަންޑް ގްލޯބަލް ސުމޫދު ފްލޮޓިލާ" ގައި ބައިވެރިވި ދެ މީހުންނެވެ.
އިސްރާއީލުގެ ކަމާބެހޭ ފަރާތްތަކުން މި ދެ މީހުން ހައްޔަރުކޮށްފައިވަނީ މިދިޔަ އޭޕްރިލް މަހުގެ 29 ވަނަ ދުވަހުއެވެ. އަދި ހައްޔަރުކުރުމަ ށްފަހު އެ މީހުން ގެންދިޔައީ އިސްރާއީލަށެވެ.
އިސްރާއީލުގެ ފޮރިން މިނިސްޓްރީން ބުނި ގޮތުގައި އަބޫ ކޭޝެކްގެ މައްޗަށް ޓެރަރިސްޓް ޖަމާއަތަކާ ގުޅުން އޮތް ކަމުގެ ތުހުމަތު ކުރެވޭއިރު، އަވީލާގެ މައްޗަށް ކުރަނީ ގައިރު ގާނޫނީ ހަރަކާތްތަކެއް ހިންގި ކަމުގެ ތުހުމަތެވެ. ނަމަވެސް، މި ދެ މީހުން ވެސް ވަނީ އެ ތުހުމަތުތަކަށް އިންކާރުކޮށްފަ އެވެ. އެ މީހުން ބުނި ގޮތުގައި އެއީ ގައްޒާގެ އާންމު ރައްޔިތުންނަށް އެހީ ފޯރުކޮށްދިނުމުގެ އިންސާނީ މިޝަނެއްގައި އުޅުނު ބައެއް ކަމަށާއި، ބައިނަލްއަގުވާމީ ކަނޑުގެ ސަރަހައްދުން އެ މީހުން ހައްޔަރުކުރުމަކީ ގާނޫނާ ހިލާފު އަމަލެކެވެ.
ގައްޒާގެ ކަންކަން ބަލަހައްޓަމުން ގެންދަނީ ފަލަސްތީނުގެ ހަމާސް އިންނެވެ. އިސްރާއީލާއި ހުޅަނގުގެ ގިނަ ގައުމުތަކުން ހަމާސް ކަނޑައަޅާފައިވަނީ ޓެރަރިސްޓް ޖަމާއަތެއްގެ ގޮތުގަ އެވެ.
