އެމެރިކާގެ ލޮކްހީޑް މާޓިން އަދި ބޯއިން ކުންފުނިން އުފައްދާ އެންމެ ޒަމާނީ އެފް-35 އަދި އެފް-15އައިއޭ މަރުކާގެ ހަނގުރާމަމަތީ މަތިންދާބޯޓުތަކެއް ގަތުމަށް ބިލިއަން ޑޮލަރުގެ ބޮޑު އެއްބަސްވުމަކަށް އިޒްރޭލުން ފަހުގެ ހުއްދަ ދީފިއެވެ. އިޒްރޭލުގެ މިނިސްޓްރީ އޮފް ޑިފެންސްއިން ހާމަކުރި ގޮތުގައި މި އެއްބަސްވުމުގެ ދަށުން އެ ގައުމުގެ ވައިގެ ސިފައިންގެ ލަޝްކަރަށް ދެ ސްކޮޑްރަންގެ އާ މަތިންދާބޯޓު އިތުރުވެގެންދާނެއެވެ.
މިއީ އިޒްރޭލުގެ އަސްކަރީ ގާބިލުކަން އިތުރުކުރުމަށް އެކުލަވާލާފައިވާ 350 ބިލިއަން ޝެކަލް ނުވަތަ 119 ބިލިއަން ޑޮލަރުގެ މަޝްރޫއުގެ ފުރަތަމަ މަރުހަލާއެވެ.
އިޒްރޭލުގެ މިނިސްޓީރިއަލް ކޮމިޓީ އޮން ޕްރޮކިއުމަންޓުން މި އެއްބަސްވުމުގައި ސޮއިކޮށްފައިވަނީ ކުރިއަށް އޮތް ދިހަ އަހަރަށް އަމާޒުކޮށް، ގައުމުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައެވެ. ޑިފެންސް މިނިސްޓްރީގެ ޑިރެކްޓަ ޖެނެރަލް އާމިރު ބަރާމް ވިދާޅުވީ، ހަނގުރާމައިގެ ވަގުތީ ބޭނުންތަކަށް މުދާ ހޯދުމުގެ އިތުރުން، ކުރިއަށް އޮތް ދިހަ އަހަރާއި އެއަށްވުރެ ދުރު މުސްތަގުބަލަށް އަސްކަރީ ގޮތުން ކުރިހޯދުމަކީ އެ މިނިސްޓްރީގެ ޒިންމާއެއް ކަމަށެވެ.
އިރާނާ ދެކޮޅަށް ކުރަމުންދާ ހަނގުރާމައިގެ ސަބަބުން އެމެރިކާއާއި އިޒްރޭލުގެ ގުޅުން އިތުރަށް ވަރުގަދަވެ، ވައިގެ ބާރުގެ މުހިންމުކަން ވަރަށް ބޮޑަށް ހާމަވެފައިވާ ކަމަށް ބަރާމް ފާހަގަކުރެއްވިއެވެ. މި އެއްބަސްވުމުގެ ދަށުން އިޒްރޭލުން ގަތުމަށް ހަމަޖެހިފައިވަނީ ލޮކްހީޑް މާޓިންގެ ހަތަރުވަނަ އެފް-35 ސްކޮޑްރަންއަކާއި ބޯއިން ކުންފުނީގެ ދެވަނަ އެފް-15އައިއޭ ސްކޮޑްރަންއެކެވެ. މީގެ ކުރިން މިދިޔަ ޑިސެމްބަރު މަހު ބޯއިން ކުންފުންޏާއެކު 8.6 ބިލިއަން ޑޮލަރުގެ އެއްބަސްވުމެއްގައި ސޮއިކޮށްފައިވާއިރު، އޭގެ ތެރޭގައި 25 އާ މަތިންދާބޯޓާއި އިތުރު 25 ބޯޓު ގަތުމުގެ އިހުތިޔާރު ހިމެނެއެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ، މި މަތިންދާބޯޓުތައް ގަތުމުން އިޒްރޭލުގެ ވައިގެ ބާރުވެރިކަން އިތުރަށް ވަރުގަދަވެގެންދާނެ ކަމަށެވެ. އަދި އިޒްރޭލުގެ ޕައިލެޓުންނަކީ ބޭނުންވެއްޖެ ކޮންމެ ހިނދެއްގައި އިރާނުގެ ވައިގެ ސަރަހައްދުގެ ކޮންމެ ތަނަކަށްވެސް ވާސިލުވުމުގެ ގާބިލުކަން ހުރި ބައެއް ކަމަށް އޭނާ ވިދާޅުވިއެވެ.
މިދިޔަ ފެބްރުއަރީ މަހުން ފެށިގެން ކުރިއަށްދާ ހަނގުރާމައިގައި އޭޕްރީލް މަހުން ފެށިގެން ނާޒުކު ސުލްހައެއް އޮތް ނަމަވެސް، އެމެރިކާގެ ކަނޑުގެ ސިފައިން ދަނީ އިރާނުގެ ބަނދަރުތައް ބަންދުކޮށްގެން ހިފަހައްޓަމުންނެވެ.
އިޒްރޭލުގެ ޑިފެންސް މިނިސްޓަރު އިޒްރޭލް ކާޓްޒް ވިދާޅުވި ގޮތުގައި، މި ހަނގުރާމައިން ލިބުނު ފިލާވަޅުތަކަށް ބަލާއިރު ކުރިއަށް އޮތް އަހަރުތަކުގައި ވައިގެ ސަރަހައްދުގެ ބާރުވެރިކަން ދެމެހެއްޓުމަށްޓަކައި އަސްކަރީ ގާބިލުކަން އިތުރުކުރުމަކީ ކޮންމެހެން ކުރަންޖެހޭ ކަމެކެވެ. އާ މަތިންދާބޯޓުތަކާއެކު އަމިއްލައަށް އުދުހުމުގެ ގާބިލުކަން ހުންނަ ޓެކްނޮލޮޖީއާއި، އާ ޖީލުގެ ދިފާއީ ނިޒާމުތައް ގުޅުވާލެވި، ޖައްވީ ދާއިރާގައިވެސް އިޒްރޭލުގެ އަސްކަރީ ބާރުވެރިކަން ގާއިމުކުރެވޭނެ ކަމަށް އޭނާ ވިދާޅުވިއެވެ. މި އެއްބަސްވުންތައް ފައިނަލް ކުރުމަށްޓަކައި އެމެރިކާ ސަރުކާރާއި އަސްކަރިއްޔާއާއެކު ކުރިއަށް އޮތް ތަނުގައި މަޝްވަރާތައް ކުރިއަށްދާނެ ކަމަށް ބަރާމް ވަނީ ވިދާޅުވެފައެވެ.
