އަންނަ މަހު ފަށަން ތާވަލުކޮށްފައިވާ ސާފް ވިމެންސް ޗެމްޕިއަންޝިޕްގައި ރާއްޖެ އާއި އިންޑިއާ އަދި ބަންގްލަދޭޝް، އެއް ގްރޫޕެއްގައި ލައްވާލައިފި އެވެ.
މި ފަަހަަރުގެ މުބާރާތް ކުރިއަށްގެންދިއުމަށް ހަމަޖެހިފައިވަނީ، އަންނަ މަހުގެ 25 އިން ޖޫން މަހުގެ 7 ވަނަ ދުވަހުގެ ނިޔަލަށެވެ.
ގޯއާގެ ފަޓޯޑާ ސްޓޭޑިއަމްގައި ކުރިއަށްދާ މުބާރާތުގަައި ރާއްޖެ ހިމެނޭ ގްރޫޕްގައި އޮތް ބަންގްލަދޭޝް އަކީ އެންމެ ފަހުން ބޭއްވި ސާފް ވިމެންސް ޗެމްޕިއަންޝިޕްގެ ޗެމްޕިއަން އެވެ. އަދި، މި ގްރޫޕްގައި ދެން އޮތް އިންޑިއާ އިން ވަނީ ފަސް ފަހަރު މި މުބާރާތުގެ ތަށި ހޯދައިފަ އެވެ.
ރާއްޖޭން ސާފް ވިމެންސް ޗެމްޕިއަންޝިޕްގައި ހޯދި އެންމެ ރަނގަޅު ނަތީޖާ ހާސިލްކުރީ 2016 ވަނަ އަހަރު ބޭއްވި މުބާާރާތުގަ އެވެ. އެ ފަހަރު ރާއްޖޭން ސެމީ ފައިނަލަށް ދަތުރުކުރީ ފުރަތަމަ މެޗުން 5-2 އިން ސްރީ ލަންކާ ބަލިކޮށް، ދެ ވަނަ މެޗުން 9-0 އިން ނޭޕާލް އަތުން ބަލިވި ނަމަވެސް ފަހު މެޗުގައި 3-1 އިން ބޫޓާންގެ މައްޗަށް ކުރިހޯދައިގެންނެވެ. ސެމީ ފައިނަލުގައި ބަލިވީ ބަންގްލަދޭޝް އަތުން 6-0 އިންނެވެ.
މި ފަހަރުގެ ސާފް ވިމެންސް ޗެމްޕިއަންޝިޕްގައި ޕާކިސްތާނުން ވާދަނުކުރެ އެެވެ. އިންޑިއާގައި މުބާރާތް ހޯސްޓްކުރާތީވެ، ޕާކިސްތާނުން ޓީމު ނުފޮނުވަން ނިންމީ އެވެ. ގްރޫޕް އޭގައި ހިމެނެނީ ނޭޕާލް، ސްރީ ލަންކާ އަދި ބޫޓާން އެވެ.
އެންމެ ފަހުން، 2024 ވަނަ އަހަރުގެ އޮކްޓޫބަރު މަހު ބޭއްވި ސާފް ވިމެންސް ޗެމްޕިއަންޝިޕްގައި ރާއްޖޭން ކުުޅުނު ފުރަތަމަ މެޗުން 1-0 އިން ލަންކާ އަތުން ބަލިވިއިރު، ދެ ވަނަ މެޗުގައި ނޭޕާލް އަތުން 11-0 އިން ބަލިވި އެވެ. އަދި، ތިން ވަނަ މެޗުގައި ބޫޓާން އަތުން ބަލިވީ 13-0 އިންނެވެ.
ގައުމީ އަންހެން ފުޓްބޯޅަ ޓީމުން މިދިޔަ އަހަރުގެ ކުރީކޮޅުގައި ވަނީ އިންޑިއާއާ ދެކޮޅަށް އެ ގައުމުގައި އެކުވެރިކަމުގެ ދެ މެޗެއް ކުޅެފަ އެެވެ. ފުރަތަމަ މެޗުން ރާއްޖެ 14-0 އިން ބަލިވިއިރު، ދެ ވަނަ މެޗުން ބަލިވީ 11-1 އިންނެވެ.
