ދެކުނު އޭޝިއާގެ ގައުމުތަކުގެ މެދުގައި ބޭއްވޭ އެންމެ ބޮޑު ފުޓްބޯޅަ މުބާރާތް، ސާފް ޗެމްޕިއަންޝިޕް، މި އަހަރު ބަންގްލަދޭޝްގައި ބޭއްވުމުގެ ކަންކަން ހަމަޖެހިފައިވާ ކަމަށް ސަރަހައްދުގެ ގިނަ މީޑިއާތަކުން ރިޕޯޓްކޮށްފި އެވެ.
އެ ގޮތުން، ބަންގްލަދޭޝް އާއި ނޭޕާލް އަދި ޕާކިސްތާންގެ މީޑިއާ ރިޕޯޓްތައް ބުނާގޮތުން، ސާފް އިން މިހާރު ވަނީ މި އަހަރުގެ ސެޕްޓެމްބަރު މަހު 21 އިން އޮކްޓޫބަރު މަހު ހަ ވަނަ ދުވަހުގެ ނިޔަލަށް ސާފް ޗެމްޕިއަންޝިޕް ބަންގްލަދޭޝްގެ ވެރި ރަށް ޑާކާގައި ހޯސްޓްކުރުމަށް ކުރަން ޖެހޭ ގިނަ ކަންކަން ނިންމައިފަ އެެވެ.
އެކަމާ ގުޅޭގޮތުން، ސާފްގެ އޮފިޝަލަކު، "އަދަދު ސްޕޯޓްސް" އަށް ބުނެފައިވަނީ، ރަސްމީކޮށް އަދި އިއުލާނުކޮށްފައިނުވާ ކަމަށެެވެ.
އެކަމަކު، ރިޕޯޓްތައް ބުނާގޮތުން، ރަސްމީކޮށް ވަރަށް އަވަހަށް ސާފް އިން މި މުބާރާްތް ބަންގްލަދޭޝްގައި ހޯސްޓްކުރާނެކަން އިއުލާނުކުރާނެ އެވެ.
ސާފް ޗެމްޕިއަންޝިޕް އެންމެ ފަހުން ހޯސްޓްކުރީ 2023 ވަނަ އަހަރު އިންޑިއާގެ ބެންގަލޫރުގަ އެވެ. އޭގެ ފަހުން، އެ މުބާރާތް މިދިޔަ އަހަރު ބާއްވަން މަސައްކަތްކުރި ނަމަވެސް، އޭރު ވާހަކަ ދެކެވުނު ހޯމް އެންޑް އަވޭ ފޯމެޓަށް މުބާރާތް ބޭއްވޭނެ ގޮތެއް ހަމަނުޖެހި، މި އަހަރަށް ފަސްކުރަން ޖެހުނީ އެވެ. އެކަމަކު، މިހާރު ވާހަކަތައް ދެކެވެމުން އަންނަ ގޮތަށް ބަލާއިރު، މި ފަހަރު ވެސް މުބާރާތް ކުރިއަށްދާނީ ސެންޓްރަލައިޒްކޮށް، ކުރިން ވެސް ބާއްވަމުން އައި ގޮތަށެވެ.
ބަންގްލަދޭޝްގައި މި ފަހަރުގެ ސާފް ޗެމްޕިއަންޝިޕް ހޯސްޓްކޮށްފިނަމަ، މި މުބާާރާތް އެ ގައުމުގައި މި ހޯސްޓްކުރަނީ، ހަ އަހަރަށް ފަހު އެވެ. އެންމެ ފަހުން، ބަންގްލަދޭޝްގައި 2018 ވަަނަ އަހަރު ސާފް ޗެމްޕިއަންޝިޕް ހޯސްޓްކުރިއިރު، 2021 ވަނަ އަހަރު ބޭއްވީ ރާއްޖޭގަ އެވެ.
ބަންގްލަދޭޝް އިން ވަނީ 2003 ވަނަ އަހަރާއި 2009 ވަނަ އަހަރުގައި ވެސް ސާފް ޗެމްޕިއަންޝިޕް ހޯސްޓްކޮށްފަ އެވެ. އެ ގޮތުން، 2003 ވަނަ އަހަރު ރާއްޖޭން ފައިނަލުގައި ޕެނަލްޓީ ޖަހައިގެން ބަންގްލަދޭޝް އަތުން ބަލިވިއިރު، 2009 ވަނަ އަހަރު އިންޑިއާ އަތުން ފައިނަލުގައި ޕެނަލްޓީ ޖަހައިގެން ބަލިވި އެވެ. އަދި، 2018 ވަނަ އަހަރު ފައިނަލުގައި އިންޑިއާ ބަލިކޮށް ރާއްޖޭން ޗެމްޕިއަންކަން ހޯދި އެވެ.
