ލަންޑަން (މެއި 8) - ކެރިއަރުގައި އެންމެ ގިނަ ކަންކަން ދަސްވީ ހޯސޭ މޮރީނިއޯ ކައިރިން ކަަމަށް ކަވެންޓްރީ ސިޓީ އަށް އިނގިރޭސި ދެ ވަަނަ ޑިވިޝަން، ޗެމްޕިއަންޝިޕްގެ ތަށި ހޯދައިދީ 25 އަހަރަށް ފަހު އެ ޓީމު އިނގިރޭސި ޕްރިމިއާ ލީގަށް ޕްރޮމޯޓްކޮށްދިން ކޯޗު ފްރޭންކް ލަމްޕާޑް ބުނެފި އެވެ.
އިނގިރޭސި ޕްރިމިއާ ލީގުގެ ޖާގައެއް ކަވެންޓްރީ އަށް ލިބުމަކީ، 1987 ވަނަ އަހަރުގެ އެފްއޭ ކަޕްގެ ޗެމްޕިއަންކަން އެ ޓީމުން ހޯދި ފަހުން އެ ކްލަބްގެ ތާރީހުގައި ހާސިލްވި އެންމެ ބޮޑު ކާމިޔާބެވެ. މި ކާމިޔާބީގެ އެންމެ ބޮޑު ކްރެޑިޓެއް ހައްގުވާ އެއް ފަރާތަކީ، 2024 ވަނަ އަހަރުގެ ނޮވެމްބަަރު 28 ވަނަ ދުވަހު ކަވެންޓްރީއާ ހަވާލުވި ކޯޗު ލަމްޕާޑް އެވެ.
ލަމްޕާޑް ހަވާލުވިއިރު، ލީގުގެ 17 ވަނައިގައި އޮތް ކަަވެންޓްރީގެ ހާލަތު އެއްކޮށް ކަހަލަ ގޮތަކަށް ބަދަަލުކޮށް، ފުރަތަމަ ފުލް ސީޒަނުގައި އެ ޓީމަށް ޕްރިމިއާ ލީގުގެ ޖާގައެއް މި ހޯދައިދިނީ އެވެ.
ޗެލްސީ އާއި ޑާބީ އަދި އެވަޓަން އަށް ކުރިން ކޯޗުކޮށްދިން ލަމްޕާޑް އަލުން ޗެލްސީ އަށް ދާން އުޅޭ ކަމަށް ވާހަކަ ދެކެވުނު ނަމަވެސް ކަވެންޓްރީގައި މަޑުކުރަން އޭނާ ވަނީ ނިންމައިފަ އެވެ. އަދި، ކެރިއަރުގައި ކަވެންޓްރީ ކަހަލަ ޓީމެއްގައި ހުރެ މަސައްކަތްކުރާއިރު އޮތް އެންމެ ބޮޑު ހިތްހަމަޖެހުމަކީ، މޮރީނިއޯ ފަދަ ކޯޗެއް ކައިރިން ކަންކަން ދަސްވެފައި ހުރުން ކަމަށް ލަމްޕާޑް ވަނީ ބުނެފަ އެވެ.
"އަހަރެންގެ ކެރިއަރަށް އެންމެ ބޮޑު ބަދަލެއް ގެނެސްދިނީ މޮރީނިއޯ. އަމިއްލަ ނަފްސާ މެދު އޮތް އިތުބާރު މައްޗަށް ހިއްލައިދިން. ވަރަށް ގިނަ ކަންކަމުގެ ޒިންމާ އަމިއްލަ އަށް ނަގައިގެން ކުރިއަށްދާނެ ގޮތް ބުނެދިން، ޕްރެޝަރާ ކުރިމަތލާން ކެރިގެން ހުންނަން ފަރިތަކޮށްދިން، އަދިވެސް އެ ކަންކަމުގެ ބޭނުން އެބަ ހިފޭ،" ލަމްޕާޑް ބުންޏެވެ.
ކުޅުމުގެ ކެރިއަރުގައި ލަމްޕާޑް ވަނީ މޮރީނިއޯގެ ކޯޗުކަމުގައި 215 މެޗު ކުޅެފަ އެވެ.
ކަވެންޓްރީން އިން އިނގިރޭސި ޗެމްޕިއަންޝިޕްގެ ތަށި ހޯދީ 46 މެޗުން 95 ޕޮއިންޓް ހޯދައިގެންނެވެ. އެ ޓީމުން 28 މެޗުން މޮޅުވެ، 11 މެޗު އެއްވަރުކުރިއިރު، ބަލިވީ ހަތް މެޗުންނެވެ.
