ލިޒްބަން (ޖެނުއަރީ 29) - މެޗުގެ ފަހު ވަގުތުގައި ގޯލްކީޕަރެއް ޖަހާ ގޯލަކުން ރެއާލް މެޑްރިޑް ބަލިކުރުމަކީ ބެންފީކާ އަށް "އާދަޔާހިލާފު ކަމެއް" ކަމަށް އެ ޓީމުގެ ކޯޗު ހޯސޭ މޮރީނިއޯ ބުނެފި އެވެ.
މެޗުގެ އިތުރު ވަގުތުގައި ބެންފީކާގެ ކީޕަރު، އަނަޓޯލީ ޓްރޫބިން، އެ ޓީމުގެ އެޓޭކުގައި ބައިވެރިވާން ހުއްދަ ހޯދީ ބެންޗުގައި އިން މޮރީނިއޯ ގާތުންނެވެ. ބެންފީކާ އިން 3-2 އިން ލީޑުކުރަމުންދިޔަ މި މެޗުގައި އެ ޓީމުން އިތުރު ގޯލެއް ނުޖަހައި، މުބާރާތުގައި ކުރިއަށް ދެވެން ނެެތެވެ. އެއީ، 24 ވަނަ އަށް ޖެހިލައި ޕްލޭއޮފަށް ވަދެވެން އޮތީ އިތުރު ލަނޑެއް ކާމިޔާބުކޮށްގެންނެވެ. އެ ލަނޑު ޖެހީ ގޯލްކީޕަރު، ޓްރޫބިން ބޮލުންނެވެ.
ބެންފީކާގެ ކޯޗު މޮރީނިއޯ: އޭނާ ވަނީ ކީޕަރު ޓްރޫބިން އަށް ވަރަށް ތައުރީފުކޮށްފައި.
"ފުރަތަމަ އަހަންނަށް ނޭނގޭ ވީ ގޮތެއް ވެސް، އަހަރެން ކުރިއަށް އެޓޭކަށް ދާން ހުއްދަ ލިބުމުން، އެ ޖެހުމަށް އަރައި ބޮލުން ގޯލަށް ބޯޅަ ވަނުމާ އެކު އެންމެން އަހަރެން ވަށާލައި އުފާފާޅުކުރަން ފެށި، މިއީ އަހަރެންގެ ހަޔާތުގައި ވެސް ހިނގި އެންމެ ތަފާތު ކަންތައް،" ގޯލާ ބެހޭގޮތުން ޓްރޫބިން ބުންޏެވެ.
ކުރިން ރެއާލަށް ކޯޗުކޮށްދިން މޮރީނިއޯ މި ސީޒަނުގައި އެ ޓީމާ ހަވާލުވިއިރު، އެ ޓީމަށް ޗެމްޕިއަންސް ލީގުގައި ކުރިއަށް ދިއުމަށް ހުރަސްތަކެއް އޮތެވެ. އެކަމަކު، އެ ހުރިހާ ކަމެއް ހަނދާނުން ދިޔައީ، ރެއާލް އަތުން ލިބުނު މޮޅުންނެވެ. މޮރީނިއޯ ބުނީ، ބެންފީކާ އަށް ރެއާލް ބަލިކުރެވުމަކީ ތާރީޙީ އަދި ފަހުރުވެރި ކަމެއް ކަމަށާއި، އަދި ފަހު ވަގުތު ކީޕަރުގެ ގޯލަކުން އެކަން ކުރެވުން "އާދަޔާހިލާފު" ކަމަށެވެ.
ޓްރޫބިންގެ މި ގޯލުގެ ވާހަކަ ބެންފީކާގެ ތާރީހުގައި ލިޔެވޭނެ ކަމަށް މޮރީނިއޯ ވަނީ ބުނެފަ އެވެ.
