މި މަހު ބާއްވާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ ވިމެންސް ޗެމްޕިއަންޝިޕްގައި ރާއްޖޭން ނޭޕާލާއި ކިރްގިސްތާން އަދި އިންޑިއާއާ އެއް ގްރޫޕެއްގައި ވާދަކުރަން ޖެހިއްޖެ އެވެ.
ނޭޕާލުގެ ކަތުމަންޑޫގައި މި މަހު 22-29 އަށް ކުރިއަށްދާ ކާވާ ވިމެންސް ޗެމްޕިއަންޝިޕްގެ އަނެއް ގްރޫޕްގައި ވާދަކުރާނީ އިރާން، ކަޒަކްސްތާން، ސްރީ ލަންކާ އަދި ބަންގްލަދޭޝް އެވެ.
ރާއްޖޭން މުބާރާތުގައި ކުޅޭ އެންމެ ފުރަތަމަ މެޗުގައި މި މަހު 22 ވަނަ ދުވަހު ކިރްގިސްތާނާ ބައްދަލުކުރާނެ އެވެ. ދެ ވަނަ މެޗުގައި 23 ވަނަ ދުވަހު އިންޑިއާއާ ދެކޮޅަށް ނުކުންނާނެ އެވެ. އަދި، 24 ވަނަ ދުވަހު ކުޅެން ޖެހޭނީ މުބާރާތް ބާއްވާ ގައުމު ނޭޕާލާ ދެކޮޅަށެވެ.
ގްރޫޕް ސްޓޭޖުގެ މެޗުތައް ނިމުމަށް ފަހު، ދެން އޮންނާނީ ރޭންކިން ބުރެކެވެ. ކްލަސިފިކޭޝަން ރައުންޑްގެ ނަމުގައި ކުޅޭ މި ބުރުގައި މުބާރާތުގައި ވާދަކުރާ ގައުމުތަކުގެ ތެރެއިން 5-8 ވަނަ އަށް ދާ ގައުމުތައް ރޭންކް ކުރެވިގެންދާނެ އެވެ. އެ ބުރުގެ މެޗުތައް އޮންނާނީ، މި މަހުގެ 26 އާއި 27 ވަނަ ދުވަހު އެވެ. އަދި، މުބާރާތުގެ 28 އާއި 29 ވަނަ ދުވަހު އޮންނާނީ ސެމީ ފައިނަލް މެޗުތަކާއި ތިން ވަނަ ހޮވާ މެޗާއި ފައިނަލް މެޗެވެ.
ގައުމީ އަންހެން ވޮލީބޯޅަ ޓީމުން މިދިޔަ އަހަރު ޑިސެމްބަރު މަހު ވަނީ މާލޭގައި ބޭއްވި ކާވާ ވިމެންސް ކަޕްގައި ކުޅެފަ އެވެ. ހަތަރު ގައުމު ކުޅުނު މި މުބާރާތުގެ ޗެމްޕިއަންކަން ރާއްޖެ ބަލިކޮށް ހޯދީ ކިރްގިސްތާން އެވެ. ލީގު ބުރުގައި ރާއްޖޭން ކިރްގިސްތާން ބަލިކުރި ނަމަވެސް ފައިނަލުގައި ބަލިވީ އެވެ. ރާއްޖޭން މުހައްމަދު ނަދީމް (ނަދީމްބެ)ގެ ކޯޗުކަމުގައި ކުޅުނު މި މުބާރާތުގައި ދެން ވާދަކުރި ދެ ގައުމަކީ، އަފްގާނިސްތާން އާއި ބަންގްލަދޭޝް އެވެ.
މި ފަހަރުގެ ކާވާ ވިމެންސް ޗެމްޕިއަންޝިޕްގައި ވެސް ރާއްޖޭން ވާދަކުރަނީ ނަދީމްބެގެ ކޯޗުކަމުގަ އެވެ.
