މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ)ގެ ޗެއާޕާސަންގެ މަގާމަށް މިހާރު ވެސް އެ މަގާމު ފުރުއްވަމުން އަންނަ އަހުމަދު ނާސިފް، އިތުރު ދައުރަކަށް އިންތިހާބުކޮށްފި އެވެ.
މިއީ، ނާސިފް މި މަގާމަށް އިންތިހާބުވި ތިން ވަނަ ދައުރެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ބޯޑުގެ ޗެއާމަންގެ މަގާމު މީގެ ކުރިން އަދާކުރި، އަދި މިހާރު ވޭސްޓް މެނޭޖްމަންޓު ކޯޕަރޭޝަން (ވެމްކޯ)ގެ ޗެއާމަނަކަށް ހުންނެވި، ނާސިފް، އެންމެ ފުރަތަމަ އެމްޕީބީއޭގެ ޗެއާމަނަކަށް އިންތިހާބުވީ 2018 ވަނަ އަހަރު އެވެ.
ނާސިފް، ދެ ވަނަ ދައުރަކަށް އިންތިހާބުވީ 2022 ވަނަ އަހަރު އެވެ. އަދި، މި ފަހަރުގެ އިންތިހާބުގައި، އިސްމާއިލް ރަޒީންއާ ވާދަކޮށް، ނާސިފް ވަނީ އިތުރު ދައުރަކަށް އެމްޕީބީއޭގެ ޗެއާމަންގެ މަގާމަށް އިންތިހާބުވެފަ އެވެ.
ޕޫލް ބިލިއާޑް އެސޯސިއޭޝަނުން މައުލޫމާތު ދީފައިވާ ގޮތުގައި، މި ފަަހަރުގެ އިންތިހާބުގައި، ވޯޓު ލެވޭ މެމްބަރުންގެ ތެރެއިން، 90 އަށް ވުރެން ބޮޑު އިންސައްތަ އެއް ވޯޓުގައި ބައިވެރިވެފައިވާ ކަމަށެވެ. އެ ގޮތުން، ވޯޓު ލުމުގެ ހައްގު ލިބިފައިވާ 128 މެމްބަރުންގެ ތެރެއިން، 115 މީހުން ވަނީ ވޯޓުގައި ބައިވެރިވެފަ އެވެ.
ޗެއާޕާސަނަކަށް ނާސިފް އިންތިހާބުވިއިރު، ވައިސް ޗެއާޕާސަން އަކަށް އިންތިހާބުވީ އަހުމަދު މާހިދު އެވެ. މާހިދު ކާމިޔާބު ހޯދީ ހަސަން ޝަފްރާޒް އާއި އަހުމަދު ޒިޔާއު ސައީދުއާ ވާދަކޮށެވެ.
ހަޒާންދާރުގެ މަގާމަށް ފާތިމަތު ރައުފާ މުހައްމަދު ހާފިޒް އިންތިހާބުވީ، ނަވާޒް ތައުފީގުއާ ވާދަކޮށެވެ. އާންމު މެމްބަރުންގެ ތެރެއިން އަންހެން މެމްބަރުގެ ޖާގަ އަށް އިންތިހާބުވީ، ފާތިމަތު އަރަފާ އާމިރުއާ ވާދަކޮށް، ފަގީހާ އިބްރާހިމް އެވެ. އާންމު މެމްބަރުންގެ ފިރިހެނުންނަށް ހާއްސަ ދެ ޖާގަ އަށް އިންތިހާބުވީ، އަލީ ޝާވިން އާއި ޔޫސުފް ޒުބައިރު އެވެ.
ޕޫލް ބިލިއާޑް އެސޯސިއޭޝަނުން ބުނީ، އާ ހިންގާ ކޮމިޓީގެ އަމާޒަކީ، ވޭތުވެދިޔަތަނުގައި ލިބިފައިވާ ކާމިޔާބީތަކަށް ބަލައި، މުސްތަގުބަލަށް މުހިންމު ކަންތައްތަކެއް ކުރުމަށް ފަހު، ޕޫލް ބިލިއާޑް އާ އުސްމިނަކަށް ގެންދިއުން ކަމަށެވެ. އެ ގޮތުން، މައިގަނޑު ގޮތެއްގައި، މަސައްކަތްކުރަން ހަމަޖެހިފައިވަނީ، ގްރާސްރޫޓާއި ޔޫތު ޑިވެލޮޕްމަންޓަށް މަސައްކަތް ކުރުމާއި މުބާރާތްތައް ކުރިއަށްވުރެން ފުޅާކޮށް ވާދަވެރިކޮށް ކުރިއަށްގެންދިއުމަށާއި ދެފުށްފެންނަ ހަރުދަނާ ނިޒާމެއްގެ ތެރެއިން އެސޯސިއޭޝަން ހިންގުމުގެ އިތުރުން އަތޮޅު ތެރޭގައި އިންފްރާސްޓްރަކްޗާ ތަރައްގީ ކުރުމުގެ އިތުުރުން ބިލިއާޑް ކޮމިއުނިޓީ ތެރޭގައި އެއްބައިވަންތަކަން ކުރިއަށް ވުރެން ރަނގަޅުކޮށް، ހުރިހާ ފަރާތަކާ ގުޅިގެން މަސައްކަތް ކުރުން ހިމެނެ އެވެ.
