ގާހިރާ، މިސްރު (އޭޕްރީލް 29) - ލިވަޕޫލްގެ ތަރި މުހައްމަދު ސަލާހު، ދެން ބަަދަލުވާނެ ކްލަބެއް ވަރަށް އަވަހަށް އިއުލާނުކުރާނެ ކަމަށް މިސްރު ޓީމުގެ މީޑިއާ ކޯޑިނޭޓަރު، މުހައްމަދު މުރާދު ބުނެފި އެވެ.
މިދިޔަ ސީޒަނުގެ ނިޔަލަށް ލިވަޕޫލްގެ ކޮންޓްރެކްޓްގައި ހުރި، އުމުރުން 33 އަހަރުގެ ސަލާހު ވަނީ ދެ އަހަރަށް އެއްބަސްވުން އާ ކޮށްފަ އެވެ. އެކަމަކު، އެ ކޮންޓްރެކްޓްގެ ފުރަތަމަ އަހަރު ނިމުމުން، މި ސީޒަނަށް ފަހު، ބާކީ އެއް އަަަހަރު އޮއްވައި، ސަލާހު މި ވަނީ ލިވަޕޫލާ އެކު އެއްބަސްވުމަކަށް އަތުވެ، ޓީމު ދޫކޮށްލަން ނިންމައިފަ އެވެ.
ކުރިން ޗެލްސީ އަށް ކުޅުނު ސަލާހު، ލިވަޕޫލާ ގުޅުނީ، 2017 ވަނަ އަހަރު އިޓަލީގެ ރޯމާ ދޫކޮށް ޖުމްްލަ އެކު، 45 މިލިއަން ޑޮލަރުގެ ޕެކޭޖެއްގަ އެވެ. އޭގެ ފަހުން، ތިން ފަހަރެއްގެ މަތިން ސަލާހު ލިވަޕޫލާ އެކު، އެއްބަސްވުމެއް ހަދައި، އެ ޓީމު ދޫކޮށްލަން މި ނިންމީ ނުވަ އަހަރު އެ ޓީމަށް ކުޅުމަށް ފަހު އެވެ. ސަލާހު، މި ވަގުތު އަންނަނީ ފަލަމަސްގަނޑަށް ލިބުނު އަނިޔާއަށް ފަރުވާ ހޯދަމުންނެވެ.
މިސްރުގެ މީޑިއާ އަކަށް މުރާދު ދިން އިންޓަވިއުއެއްގައި ބުނީ، ސައުދީ އަރަބިއްޔާ، އެމެރިކާ އަދި ޔޫރަޕްގެ ގިނަ ކްލަބްތަކަކުން ސަލާހަށް ހުށަހެޅުން ލިބިފައިވާ ކަމަށެވެ. އަދި، ސަލާހުގެ މުސްތަގުބަލާ ގުޅޭގޮތުން، ކޮންމެ ދުވަހަކު އާ ވާހަކަތަކެއް މީޑިއާގައި ލިޔަމުން އަންނަ ކަމަށާއި އެކަންކަމަށް ނިމުމެއް އަންނާނީ ސަލާހު ދެން ބަަދަލުވާނެ ޓީމެއް ރަސްމީކޮށް އިއުލާނުކުރުމުން ކަމަށް ވެސް މުރާދު ވަނީ ބުނެފަ އެވެެ.
"ކޮންމެ ޓީމަކަށް ސަލާހު ދިޔަސް އަހަރެމެން ސަޕޯޓްކުރާނަން. ވަރަށް އަވަހަށް ދެން ދާނެ ޓީމެއް ސަލާހު އިއުލާނުކުރާނެ،" ފޯފޯޓޫ އަށް ދިން އިންޓަވިއުއެއްގައި މުރާދު ބުންޏެވެ.
ސަލާހު ވަނީ ލިވަޕޫލަށް ކުޅެދިން 435 މެޗުން 255 ގޯލު ޖަހައިފަ އެވެ. ސަލާހު، މަސައްކަތް ކުރަމުން އަންނަނީ ސީޒަން ނިމުމުގެ ކުރިން ފިޓްވެގެން އެނބުރި އައިސް އަދި އެއް މެޗު ލިވަޕޫލަށް ކުޅެދިނުމަށެވެ.
