އަދަދު ނޫހުން ގެނެސްދިން "އައިޝާ" ޑޮކިއުމެންޓްރީއާ ގުޅިގެން ފުލުހުން ތަހުގީގުކުރަމުން އަންނަ ޖިނާއީ މައްސަލައާ ގުޅުވާ، އަދަދު ނޫހުގެ އެޑިޓަރު ހަސަން މުހައްމަދުގެ ޕާސްޕޯޓު ވެސް ހިފަހައްޓައިފި އެވެ.
ކްރިމިނަލް ކޯޓުން ނެރުނު އަމުރުގައި ހަސަންގެ ޕާސްޕޯޓު ހިފަހައްޓާ ސަބަބެއް ކަމަށް އޮތީ އޭނާ ފުރަން އުޅޭ ކަމަށް ފުލުހުންނަށް ލިބިފައިވާ އިންޓެލިޖެންސް މައުލޫމާތެކެވެ. އަދި މައްސަލައިގެ ހަމައެކަނި ހެއްކަކަށް އޮތީ ވެސް ފުލުހުންގެ އިންޓެލިޖެންސް ރިޕޯޓެކެވެ.
ހަސަންގެ ޕާސްޕޯޓު ތިން މަސް ދުވަހުގެ މުއްދަތަކަށް ހިފެހެއްޓިއިރު، މިއީ މި މައްސަލައާ ގުޅުވާ ޕާސްޕޯޓު ހިފެހެއްޓި އަދަދުގެ ދެވަނަ މުވައްޒަފެވެ. ރޭގެ ވަގުތެއްގައި މި ނޫހުގެ ސީއީއޯ ހުސެއިން ފިޔާޒޫ މޫސާގެ ޕާސްޕޯޓު ވެސް ތިން މަސް ދުވަހުގެ މުއްދަތަކަށް ހިފަހައްޓަން ފުލުހުން ވަނީ އަމުރުކޮށްފަ އެވެ.
އަދަދު އިން އައިޝާ ޑޮކިއުމެންޓްރީ ގެނެސްދިންތާ މަސް ދުވަސް ފަހުން، މި މައްސަލައިގައި ޖިނާއީ ތަހުގީގެއް ފެށީ އެ ޑޮކިއުމެންޓްރީގައި ރައީސްއަށް ކުރި ތުހުމަތުތަކާ ގުޅިގެން އިއްޔެ ރައީސް މުހައްމަދު މުއިއްޒުއާ ސުވާލުކުރި ހިސާބުންނެވެ. އެމަނިކުފާނު ދެއްވި ޖަވާބުގައި އެ ތުހުމަތުތައް ދޮގުކުރަމުން، އެ މައްސަލައިގައި ދައުވާކުރަން
ފުލުހުން ތުހުމަތުކުރަނީ އެ ޑޮކިއުމެންޓްރީގައި އަދަދު ނޫހުން މުއިއްޒުއަށް ގަޒްފުގެ ތުހުމަތުކޮށްފައިވާ ކަމަށެވެ. ކޯޓު އަމުރު ހޯދަމުން ފުލުހުން ބުނެފައި ވަނީ އެ ޑޮކިއުމެންޓްރީ ތައްޔާރުކުރުމުގައި އަދި ޕަބްލިޝްކުރުމުގައި ހަރަކާތްތެރިވި އެންމެންނަކީ ގަޒްފު ކުރުމުގެ ކުށުގެ ތުހުމަތުކުރެވޭ މީހުން ކަމަށެވެ.
މި މައްސަލައިގައި ކޯޓު އަމުރެއްގެ ދަށުން ފުލުހުން ވަނީ ރޭގެ ވަގުތެއްގައި އަދަދުގެ އޮފީސް ރެއިޑްކޮށް ގިނަ އަދަދެއްގެ އިލެކްޓްރޯނިކް ސާމާނު ގެންގޮސްފަ އެވެ.
