މާލެ ސިޓީގެ މޭޔަރު، އާދަމް އާޒިމްއަށް މިދިޔަ ހުކުރު ދުވަހުގެރޭ މީހަކު ހަމަލާދިން މައްސަލަ، އޭގެ ދެ ދުވަސްފަހުން ފުލުހުން ތަހުގީގުކުރަން ފަށައިފި އެވެ.
އާޒިމްއަށް މީހަކު ހަމަލާދިނީ، އެމްޑީޕީން ކުރިއަށް ގެންދާ ސިލްސިލާ މަގުމަތީ ހަރަކާތްތަކުގެ ތެރެއިން، މިދިޔަ ހުކުރު ދުވަހުގެރޭ މާލޭގައި ކުރިއަށް ގެންދިޔަ އެއްވުމުގައި އޭނާ ބައިވެރިވަމުން ދަނިކޮށެވެ. އޭނާއަށް ހަމަލާދިން ވަގުތު އެމްޑީޕީގެ އެއްވުމުގެ ބައިވެރިންނާއި ހަމަލާދިން މީހާއާ ދެމެދު ކޮންމެވެސް ވަރެއްގެ ހަމަނުޖެހުންތަކެއް ވެސް ހިނގި އެވެ.
އެ ސަރަހައްދުގައި އެ ވަގުތު ވެސް ފުލުހުން ހަރަކާތްތެރިވަމުންދިޔަ މަންޒަރު ވީޑިއޯތަކުން ފެނެ އެވެ. ނަމަވެސް، އެ މައްސަލައިގައި މީހަކު ހައްޔަރުކުރިތޯ އަދަދު އިން ސުވާލުކުރުމުން ފުލުހުން ޖަވާބެއް ނުދިނެވެ. އެ މައްސަލަ ތަހުގީގު ކުރަމުންދޭތޯ ސުވާލުކުރުމުން، ފުލުހުން މީޑިއާތަކަށް ފޮނުވި މެސެޖެއްގައި ބުނީ، އެ މައްސަލަ ތަހުގީގު ކުރަމުންދާ ކަމަށެވެ.
"އޭޕްރިލް 24، 2026 ވަނަ ދުވަހުގެރޭ މާލޭގައި ކުރިއަށް ގެންދިޔަ އެއްވުމުގެ ތެރެއިން، މާލެ ސިޓީ މޭޔަރަށް މީހަކު ހަމަލާދޭން އުޅުނުކަމަށް ތުހުމަތުކުރެވޭ މައްސަލައެއް ފުލުހުން ދަނީ ތަހުގީގު ކުރަމުންނެވެ،" ފުލުހުން ފޮނުވި މެސެޖުގައި ބުންޏެވެ.
އާންމުވެފައިވާ ވީޑިއޯތަކުން ފެންނަނީ، އެމްޑީޕީގެ މުޒާހަރާއާއެކު އާޒިމް ކުރިއަށްދަނިކޮށް، މަގުމަތިން މީހަކު ގޮސް އާޒިމްގެ މޭމަތީގައި ޖަހައި ކޮށްޕާލާ މަންޒަރެވެ. އެކަމާ ގުޅިގެން ފުލުހުން ބަހެއް ނުބުނި ނަމަވެސް، މީހެއްގެ ރުހުމަކާ ނުލައި އެ މީހެއްގެ ގައިގައި އަތްލުމަކީ ކުށެއްކަމަށް ދިވެހިރާއްޖޭގެ ގާނޫނުލްއުގޫބާތުގެ 120 ވަނަ މާއްދާގައި ބަޔާންކޮށްފައިވެ އެވެ.
އާޒިމްއަށް ހަމަލާދިނުމާ ގުޅިގެން އަދަދު އަށް އޭނާ ދެއްވި އިންޓަވިއުއެއްގައި ވިދާޅުވީ، އޭނާއަށް ހަމަލާދިނީ ސަރުކާރުން ރާވައިގެން ކަމަށެވެ.
"އަޅުގަނޑު ގަބޫލުކުރަނީ މިއީ [ހަމަލާ ދިނުމަކީ] ސަރުކާރުން ރާވައިގެން ކޮށްފައިވާ ކަމެއް ކަމަށް،" އާޒިމް ވިދާޅުވިއެވެ.
ހަމަލާތަކުން ރައްޔިތުންގެ އަޑު ކަނޑުވައިނުލެވޭނެ ކަމަށާއި، ކުރިއަށް އޮތް ތަނުގައި މުޒާހަރާތައް މިހާރަށްވުރެ ވަރުގަދަ ކުރައްވާނެ ކަމަށް އޭނާ ވިދާޅުވިއެވެ.
"އަޅުގަނޑުމެންނަށް އަނިޔާކޮށްގެން ރައްޔިތުންނަށް މިކޮށްދޭ މަސައްކަތް އަޅުގަނޑުމެން ހުއްޓައެއް ނުލާނެކަން މި އަނިޔާވެރި ސަރުކާރަށް ބުނެލަން ބޭނުން. ތަޅާފޮޅާ މަރައިގެން އަޅުގަނޑުމެން ނުހުއްޓުވޭނެ. މިއަށްވުރެ މުޒާހަރާތައް ވަރުގަދަކުރާނަން،" އާޒިމް ވިދާޅުވިއެވެ.
