ދުނިޔޭގެ އެންމެ ގިނަަ ދުވަސްވީ އެއް ކުޅިވަރު، ބެޑްމިންޓަންގެ ސެޓުތައް ކުޅޭ ސްކޯރިން ސިސްޓަމް، 15 ޕޮއިންޓަށް ބަދަލުކުރަން، ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް)ގެ މެމްބަރުން އިއްޔެ ބޭއްވި އަހަރީ އާންމު ޖަލްސާގައި ފާސްކޮށްފި އެވެ.
މީގެ ކުރިން، ބެޑްމިންޓަން ކުޅެފައިވަނީ، 21 ޕޮއިންޓަށެވެ. އެއީ، ސީދާ ދެ ސެޓުން ނޫނީ ތިން ސެޓު ކުޅެގެން މޮޅުވާ ކުޅުންތެރިއެއް ކަނޑައަޅާ ގޮތަށެވެ. އެކަމަކު، އިއްޔެ ބީޑަބްލިއުއެފް ކޮންގްރެސް އިން ފާސްކުރި އާ ގަވާއިދުގައި ބުނެފައިވަނީ، 2027 ވަނަ އަހަރުން ފެށިގެން، ރަސްމީކޮށް މެޗުތައް ކުޅޭނީ 15 ޕޮއިންޓަށް ސެޓެއްގެ ސްކޯ ކަނޑައަޅާ ގޮތަށެވެ. އެއްވަރުވަމުންދާނަމަ، 21 ޕޮއިންޓާ ހަމައަށް ކުރިއަށްދާނީ ދެ ޕޮއިންޓުގެ ލީޑެއް ލިބެންދެނެވެ. އޭގެ ފަހުން، އެއް ޕޮއިންޓުން ވެސް ސެޓެއްގެ މޮޅުވާ ކުޅުންތެރިއަކު ކަނޑައެޅޭނެ އެވެ.
މި ގަވާއިދަށް އަމަަލުކުރަން ފަށާ ތާރީހެއްގެ ގޮތުގައި ފާސްކޮށްފައި އޮތީ، ޖެނުއަރީ 4، 2027 އިން ފެށިގެންނެވެ. ގަވާއިދަށް މި ބަދަލު ގެންނަން 198 މެމްބަރުން ވޯޓު ދީފައިވެ އެވެ. އެއީ، ވޯޓުގެ 82.16 ޕަސެންޓެވެ. އަދި، ގަވާއިދާ ދެކޮޅަށް، 17.84 ޕަސެންޓް، 43 މެމްބަރުން ވޯޓު ދީފައިވެ އެެވެ.
ޑެންމާކުގައި، އިއްޔެ ކުރިއަށްދިޔަ ބީޑަބްލިއުއެފް އަހަރީ އާންމު ޖަލްސާގައި، ރާއްޖޭގެ ބެޑްމިންޓަން އެސޯސިއޭޝަން، ބީއޭއެމްގެ ރައީސް އިޝްފާން މުހައްމަދު (އިއްޕަ) ވަނީ ބައިވެރިވެވަޑައިގެންފަ އެވެ.
ބެޑްމިންޓަން ވޯލްޑް ފެޑެރޭޝަންގެ ރައީސް، ކުންޔިން ޕަަތަމާ ލީސްވަޑްޓްރަކުލް ވިދާޅުވީ، މިއީ، ބެޑްމިންޓަންގެ މުސްތަގުބަލަށް ވިސްނައި ގެނެވުނު ބޮޑު ބަދަލެއް ކަމަށެވެ. އަދި، މި ބަދަލާ އެކު، ބައިނަލްއަގުވާމީ ލެވަލްގެ މެޗުތައް މިހާރަށް ވުރެން ބޮޑަށް ފޯރިގަދަވެގެންދާނެ ކަމަށް އޭނާ ވަނީ ވިދާޅުވެފަ އެވެ.
މިދިޔަ އަހަރު ބީޑަބްލިއުއެފްގެ 10 މުބާރާތެއް ވަނީ 15 ޕޮއިންޓުގެ ސްކޯރިން ސިސްޓަމަށް ކުޅެފަ އެވެ. އެ މުބާރާތްތަކުގައި، އެންމެ އަވަސް ފައިނަލަކީ އަންހެން ޑަބަލްސް އެވެ. އެއީ، 12 މިނިޓުން ނިމުނު ފައިނަލެކެވެ. ހުރިހާ ފައިނަލް މެޗެއް ވެސް 50 މިނިޓަށް ވުރެން އަވަހަށް ވަނީ ނިމިފަ އެވެ. މިކްސް ޑަބަލްސް މެޗެއް އެންމެ ގިނައިރު ވަންދެން ކުރިއަށްދިޔައީ، 35 މިނިޓަށެވެ. އެ 10 މުބާރާތުގެ 50 ފައިނަލަށް ބަލާއިރު، އެވްރެޖް މިނިޓަކީ، 29،9 މިނިޓެވެ. އަދި، އެ މެޗުތަކުގެ އެންމެ ދިގުކޮށް ނިމުނު މެޗުތަކަކީ އަންހެން ޑަބަލްސް އެވެ. އެވްރެޖް މިނިޓަކީ، 32.5 މިނިޓެވެ.
