އޮޑެންސް، ޑެންމާކް (އޭޕްރީލް 15) - ބެޑްމިންޓަންގެ ލެޖެންޑަރީ ތަރި ވިކްޓޯ އަކްސެލްސެން ޕްރޮފެޝަނަލްކޮށް ބެޑްމިންޓަން ކުޅުން ހުއްޓާލައިފި އެވެ.
އުމުރުން 32 އަހަރުގެ އަކްސެލްސެން ރިޓަޔާކުރަން ނިންމި އެންމެ ބޮޑު ސަބަބަކީ މިދިޔަ އަހަރުގެ އޭޕްރީލް މަހު ބުރަކަށީގެ އޮޕަރޭޝަނެއް ކުރުމަށް ފަހު، ކުރިން ހުރި ލެވަލަށް ގޮސް ކުޅުމަށްޓަކައި ކުރި މަސައްކަތްތައް ކާމިޔާބުނުވުމުންނެވެ.
އަކްސެލްސެން ބުނީ އޭނާގެ ކެރިއަރުގައި އަަބަދުވެސް ބޭނުންވަނީ އެންމެ މަތީ ލެވަލްގައި ކުޅުމަށާއި ޓްރެއިނިންތައް ވެސް އެ ލެވަލްގައި ކުރިއަށްގެންދިއުމަށް ކަމަށެެވެ. އެކަމަކު، މިދިޔަ އަހަރެއްހާ ދުވަހު އޭގެއިން އެއްވެސް ކަމެއް ބޭނުންވި ލެވަލްގައި ނުކުރެވި އެންމެ ފަހުން ހަޔާތުގެ އެންމެ އުނދަގޫ ނިންމުން ނިންމަން ޖެހުނީ ކަމަށް އަކްސެލްސެން ވަނީ ބުނެފަ އެވެ.
"މިއީ އަހަންނަށް ފަސޭހަ ދުވަހެއް ނޫން، އެކަމަކު، މި ނިންމުން ނިންމަން ޖެހޭ އުނދަގޫ ދުވަސް އަންނާނެކަން އެނގޭ. އަހަންނަށް އޮތީ މި ހާލަތް ގަބޫލުކޮށް ހަގީގަތާ ކުރިމަތިލުން،" އަކްސެލްސެން ނެރުނު ބަޔާނުގައި ބުނެފައިވެ އެވެ.
ދުނިޔޭގައި އުފެދުނު އެންމެ މޮޅު އެއް ބެޑްމިންޓަން ކުޅުންތެރިޔާ، އަކްސެލްސެން ވަނީ 2016 ވަނަ އަހަރުގެ ރިއޯ އޮލިމްޕިކްސް އިން ލޯ މެޑަލް ހޯދުމަށް ފަހު، ޓޯކިޔޯ 2020 އާއި ޕެރިސް 2024 އޮލިމްޕިކްސް އިން ރަން މެޑަލް ހޯދައިފަ އެވެ. އަދި، ދުނިޔޭގެ ބެޑްމިންޓަން މުބާރާތް، ވޯލްޑް ޗެމްޕިއަންޝިޕްގެ ޗެމްޕިއަންކަން، އަކްސެލްސެން ވަނީ 2017 އާއި 2022 ވަނަ އަހަރު ހޯދައިފަ އެވެ. އަދި، 2014 ވަނަ އަހަރު ތިން ވަނަ ވެސް ހޯދި އެވެ.
ދުނިޔޭގެ ރޭންކިން އެއް ވަނައިގައި 100 ހަފްތާ ހޭދަކުރި އަކްސެލްސެން ވަނީ ކުރިން އެ ރެކޯޑް އޮތް ލީ ޗޮން ވެއިގެ ރެކޯޑް މުގުރާލައިފަ އެވެ. އަކްލްސަން ވަނީ ޔޫރަޕިއަން ބެޑްމިންޓަން ޗެމްޕިއަންޝިޕް ތިން ފަހަރު ކާމިޔާބުކޮށްފަ އެވެ. އެއީ، 2016 އާއި 2018 އަދި 2022 ގައި ހޯދައިފަ އެވެ.
ޖޫނިއާ އުމުރުފުރާ އިން ފެށިގެން އަކްސެލްސެން ވަނީ 2006 އިން ފެށިގެން ދުނިޔޭގެ ލެވަލް މުބާރާތްތަކުގައި ކުޅެން ފަށައިފަ އެވެ. އޭނާ ސީނިއާ ލެވަލްގެ ބެޑްމިންޓަން މުބާރާތްތަކުގައި ކުޅެން ފެށީ 2009 އިން ފެށިގެންނެވެ.
