ކަތުމަންޑޫ، ނޭޕާލް (އޭޕްރީލް 24) - ނޭޕާލްގެ ސްޕޯޓްސް ކައުންސިލުން އެ ގައުމުގެ ފުޓްބޯޅަ ފެޑެރޭޝަން، އަންފާ ސަސްޕެންޑްކުރަން ނިންމާފައި އޮތް ނިންމުން އުވާލައި، ކަންކަން ހައްލުކުރަން އިތުރު މުހުލަތެއް ދުނިޔޭގެ ފުޓްބޯޅައިގެ މައި އިދާރާ، ފީފާ އިން ދީފި އެވެ.
އަންނަ މަހުގެ ހަތަރެއްގެ ކުރިން މައްސަލަތަކަށް ހައްލެއް ނުލިބިއްޖެނަަމަ، ނޭޕާލަށް ފީފާގެ ސަސްޕެންޝަނެއް އަންނާނެ އެވެ. މިއީ، ފީފާ އިން ނޭޕާލަށް މި ގޮތަށް ދިން ދެ ވަަނަ މުހުލަތެވެ. ނޭޕާލްގެ ސްޕޯޓްސް ކައުންސިލުން، އަންފާ، ތިން މަހަށް ސަސްޕެންޑްކުރަން ނިންމީ މިދިޔަ މަހުގެ 25 ވަނަ ދުވަހު އެވެ. އެ ސަސްޕެންޝަނުގެ ފުރަތަމަ މަސް މާދަމާގެ ނިޔަލަށް ހަމަވާނެ އެވެ.
ނޭޕާލް ސްޕޯޓްސް ކައުންސިލް، އަންފާ، ފީފާ އަދި އޭއެފްސީގެ އޮފިޝަލުން ވަނީ މި މަހުގެ 13 ވަނަ ދުވަހު އޮންލައިންކޮށް ބައްދަލުވުމެއް ބާއްވައިފަ އެވެ.
ފީފާ އިން މިދިޔަ ބުދަ ދުވަހު ފޮނުވި ސިޓީގައި ބުނެފައިވަނީ، ފީފާ އާއި އޭއެފްސީން ލަފާދީފައިވާ ގޮތަށް، އަންފާ އަށް ތިން ވަނަ ފަރާތެއްގެ ނުފޫޒެއް ނެތި ކުރިއަށްދިއުމުގެ ފުރުސަތު ދީ، ފުޓްބޯޅަ އިންތިހާބު ކުރިއަށް ގެންދިއުމަށްޓަކައި ޖާގަ ދިނުމަށެވެ. އަދި، އެކަން ކުރުމަށްޓަކައި، ނޭޕާލް ސްޕޯޓްސް ކައުންސިލުން މިހާރު، އަންފާ އަށް ދީފައި އޮތް ސަސްޕެންޝަން އުވާލުމަށް ވެސް ފީފާ އިން ވަނީ އަންގައިފަ އެވެ.
ފީފާ އިން ނޭޕާލަށް މައްސަލަތައް ހައްލުކުރަން މުހުލަތެއް ދީފި
ނޭޕާލުގެ ނެޝަނަލް ސްޕޯޓްސް ކައުންސިލް އިން އެ ގައުމުގެ ފުޓްބޯޅަ އިދާރާ، އޯލް ނޭޕާލް ފުޓްބޯލް އެސޯސިއޭޝަން (އަންފާ) ސަސްޕެންޑްކޮށްފައިވާއިރު، އެ މައްސަލަތައް ހައްލުކޮށް، އިންތިހާބުގެ ކަންކަން ކޮޅެއްގައި ޖެއްސުމަށް ދުނިޔޭގެ މައި ފުޓްބޯޅަ އިދާރާ، ފީފާ އިން އަންފާ އަށް ވަނީ މުހުލަތެއް ދީފަައި.
ފީފާ އިން މީގެ ކުރިން، ނޭޕާލް ސްޕޯޓްސް ކައުންސިލަށް ވަނީ މި މަހުގެ ހަތަރު ވަނަ ދުވަހުގެ ފޮނުވި ސިޓީގައި ހަތް ދުވަހުގެ މުހުލަތެއް ދީފަ އެވެ. އެކަމަކު، އެ މުއްދަތު ހަމަވިއިރު ވެސް ނޭޕާލް ސްޕޯޓްސް ކައުންސިލުން ފީފާގެ ނިންމުމަށް އިހުތިރާމްކޮށްފައިނުވެ އެވެ. އެކަމަކު، ފީފާ އިން މި ފަހަރު ދީފައިވާ އިރުޝާދާ އެއްގޮތަށް، ކަންތައްތައް ނުގޮސްފިނަމަ، އަންނަ މަހުގެ ހަތަރު ވަނަ ދުވަހުގެ ފަހުން، ނޭޕާލް ސަސްޕެންޑް ވާނެ ކަަމަށް ރިޕޯޓްތައް ބުނެ އެވެ.
މީގެ ކުރިން، ބެލެވިފައި އޮތީ، މި މަހު 30 ވަނަ ދުވަހު، ކެނަޑާގެ ވެންކޫވާގައި ކުރިއަށްދާ ފީފާގެ 76 ވަނަ ކޮންގްރެސްގައި ނޭޕާލަށް ސަސްޕެންޝަނެއް އަންނާނެ ކަމަށެވެ. އެކަމަކު، އޭއެފްސީ އާއި ފީފާ އިން ނޭޕާލަށް އިތުރު މުހުލަތެއް ދިނުމާ އެކު، ކޮންގްރެސްގައި ނޭޕާލްގެ ސަސްޕެންޝަނާ މެދު ގޮތެއް ނުނިންމާނެކަން ވަނީ ކަށަވަރުވެފަ އެވެ.
އެކަމަކު، ނޭޕާލްގެ މީޑިއާ ރިޕޯޓްތައް ބުނާގޮތުން، ނޭޕާލްގެ ސްޕޯޓްސް ކައުންސިލުން ފީފާގެ ނިންމުމާ އެއްގޮތަށް ކުރިއަށްދިއުމުގެ ފުރުސަތު ފެންނަނީ ކުޑަކޮށެވެ. އަދި، އަންފާގެ މިހާރުގެ ލީޑަޝިޕް ބޭނުންވާ ގޮތަށް، ނޭޕާލްގެ ފުޓްބޯޅައިގެ އިންތިހާބު އަވަހަށް ބާއްވަން ސްޕޯޓްސް ކައުންސިލުން ރުހުމެއް ނުދޭނެ އެވެ.
