ކަތުމަންޑޫ (އޭޕްރީލް 5) - ނޭޕާލުގެ ނެޝަނަލް ސްޕޯޓްސް ކައުންސިލް އިން އެ ގައުމުގެ ފުޓްބޯޅަ އިދާރާ، އޯލް ނޭޕާލް ފުޓްބޯލް އެސޯސިއޭޝަން (އަންފާ) ސަސްޕެންޑްކޮށްފައިވާއިރު، އެ މައްސަލަތައް ހައްލުކޮށް، އިންތިހާބުގެ ކަންކަން ކޮޅެއްގައި ޖެއްސުމަށް ދުނިޔޭގެ މައި ފުޓްބޯޅަ އިދާރާ، ފީފާ އިން އަންފާ އަށް މުހުލަތެއް ދީފި އެވެ.
ނޭޕާލްގެ ސަރުކާރުގެ ފަރާތުން ކުޅިވަރު އެސޯސިއޭޝަންތަކުގެ ބެލެނިވެރި ފަރާތް، ނޭޝަނަލް ސްޕޯޓްސް ކައުންސިލުން އެ ގައުމުގެ ފުޓްބޯޅަ އެސޯސިއޭޝަން (އަންފާ) ވަނީ ތިން މަސްދުވަހަށް ސަސްޕެންޑް ކޮށްފަ އެވެ ސްޕޯޓްސް ކައުންސިލްގެ މި ނިންމުމާ އެކު، ސަރުކާރުގެ ނުފޫޒު ނޭޕާލްގެ ފުޓްބޯޅަ އަށް ފޯރި ކަމަށް ނިންމައި، ދުނިޔޭގެ މައި ފުޓްބޯޅަ އިދާރާ، ފީފާ އިން ނޭޕާލް ސަސްޕެންޑް ކުރުމުގެ ފުރުސަތު ވަނީ ބޮޑުވެފަ އެވެ. އެކަމަކު، ފީފާ އިން އަންނަނީ މި މައްސަލައިގައި އެންމެ ރަނގަޅަށް ކަންކަން ކުރިއަށްގެންދެވޭތޯ މަސައްކަތްކުރަމުންނެވެ.
ސްޕޯޓްސް ކައުންސިލްގެ ހިންގާ ގަވާއިދުން ލިބިދޭ ބާރުގެ ބޭނުންކޮށް އަންފާ ސަސްޕެންޑް ކުރަން ނިންމި އެންމެ ބޮޑު ސަބަބަކީ، ބާއްވަން މަސައްކަތްކުރަމުން އައި އަންފާގެ އަވަސް އިންތިހާބުގެ ކަންކަން ސްޕޯޓްސް ކައުންސިލުން ދިން ލަފަޔާ އެއްގޮތަށް ކުރިއަށް ނުގެންދިއުމުންނެެވެ. ފެބްރުއަރީ 11 ގައި ބާއްވަން ނިންމި އަންފާގެ އިންތިހާބު ނޭޕާލުގެ ޕަޓާން ހައި ކޯޓުން ޖެނުއަރީ މަހު ނިންމި ނިންމުމާ އެއްގޮތަށް ހުއްޓިފައި އޮތް ނަމަވެސް، އަންފާ އިން މަސައްކަތް ކުރަމުން އައީ މިދިޔަ މަހު 27 ވަނަ ދުވަހު އެ އިންތިހާބު ބޭއްވުމަށެވެ. އެކަމަކު، ސްޕޯޓްސް ކައުންސިލްގެ ނިންމުމާ އެކު އަންފާ އިން އިންތިހާބުގެ ކަންކަން މަޑުޖައްސާލައި، ފީފާގެ ލަފަޔަކަށް އެދުނީ އެވެ.
ނޭޕާލް މީޑިއާތަކުން ރިޕޯޓްކުރާގޮތުގައި، ފީފާ އިން އަންފާ އަށް ފޮނުވި ސިޓީގައި ވަނީ، ހުރި މައްސަލަތައް ހައްލުކޮށް، އިންތިހާބުގެ ކަންކަން ވެސް އަސާސީ ގަވާއިދާ އެއްގޮތަށް ކުރިއަށް ގެންދިއުމަށް ބާރު އަޅައިފަ އެވެ. އަދި، މި ކަން ފީފާ އިން ލަފާދޭ ގޮތަށް ކުރިއަށް އޮތް ހަތް ދުވަސްތެރޭގައި ހިނގައި، ހައްލަކަށް ދިއުމުގެ މަސައްކަތް ފަށަން ޖެހޭނެ ކަމަށް ފީފާ އިން ވަނީ އަންފާ އަށް އަންގައިފަ އެވެ.
ފީފާ އިން މިހާތަނަށް ވެސް ވަނީ އަންފާ އަށް ފިޔަވަޅެއް އަޅައިފަ އެވެ. މި މަހު ތައިލެންޑްގައި ކުރިއަށްދާ އަންހެން ފުޓްބޯޅައިގެ، ފީފާ ސީރީސް މުބާރާތަކުން ނޭޕާލަށް ދީފައިވާ ފުރުސަތު އެ ޓީމު އަތުލާން ނިންމުމުންނެވެ. ރިޕޯޓްތައް ބުނާގޮތުގައި، ފީފާ ސީރީސްގައި ނޭޕާލްގެ ބަދަލުގައި މިހާރު ވާދަކުރުމަށް ނިންމާފައިވަނީ އިންޑޮނޭޝިއާ އެެވެ.
