ޑެންގޫ ހުން ޖެހިގެން މ. މުލީ ރީޖަނަލް ހޮސްޕިޓަލްގައި ފަރުވާދެމުންދިޔަ 17 އަހަރުގެ އަންހެން ކުއްޖަކު މަރުވެއްޖެ އެވެ.
މި ހިތާމަވެރި ހާދިސާގައި މަރުވީ މުލީ ސްކޫލުގެ ގްރޭޑް 11 ގައި ކިޔަވަމުންދިޔަ އައިޝަތު އަންޖަލް އެވެ. އޭނާ މަރުވީ ބުރާސްފަތި ދުވަހުގެ ރޭ 10 ޖަހާކަންހާއިރު ކަމަށް މުލީ ހޮސްޕިޓަލުން އަދަދު ނޫހަށް ކަށަވަރުކޮށް ދިނެވެ.
އާއިލާގެ ފަރާތުން މައުލޫމާތު ދިން މީހަކު ބުނި ގޮތުގައި އަންޖަލް ބަލިވެގެން މުލީ ހޮސްޕިޓަލުގައި އެޑްމިޓުކުރީ މި މަހުގެ 21 ވަނަ ދުވަހުއެވެ. އޭނާގެ ހާލަތު ގޯސްވާން ފެށީ ބުދަ ދުވަހުގެ ރޭ ދަންވަރު ކަމަށާއި ހާލަތު ގޯސްވަމުން ގޮސް، ސީރިއަސްވެ ބުރާސްފަތި ދުވަހުގެ ރޭ 9 ޖެހިއިރު އައިސީޔޫއަށް ވެއްދި ކަމަށް އާއިލާއިން ބުނެ އެވެ. ނަމަވެސް، އައިސީޔޫއަށް ލީތާ ގަޑިއެއްވެސް ނުވަނީސް އޭނާ މަރުވި އެވެ.
މި ހާދިސާގައި ހޮސްޕިޓަލްގެ އިހުމާލު އޮތް ކަމަށް އާއިލާއިން ތުހުމަތުކުރެ އެވެ.
"މުލީގައި އެއާޕޯޓެއް އެބަ އޮތް. ސީ އެމްބިއުލާންސްގެ ހިދުމަތް ލިބެން ހުރިއިރުވެސް، ކުއްޖާގެ ފުރާނަ ސަލާމަތްކުރުމަށް އެކަށީގެންވާ އަވަސް ފިޔަވަޅުތަކެއް އެޅި ނަމަ މާލެ ފޮނުވަން މަސައްކަތް ކުރީސް،" އާއިލާއިން ވާހަކަ ދެއްކި މީހާ ބުންޏެވެ.
ޑެންގޫ ހުން އިތުރުވަނީ؛ އެ ބަލީގައި ޒުވާނަކު މަރުވެއްޖެ
ރާއްޖޭގައި ޑެންގޫ ހުން ފެތުރޭ މިންވަރު އިތުރުވެ، އެ ބަލީގައި ށ. މިލަންދޫގެ 22 އަހަރުގެ ޒުވާނަކު ވަނީ މަރުވެފައެވެ. އެޗްޕީއޭގެ ތަފާސްހިސާބުތަކުން ދައްކާގޮތުގައި ފާއިތުވި މަސްތަކުގައި ބަލިޖެހޭ މީހުންގެ އަދަދު ވަނީ ކުރީ އަހަރުތަކަށްވުރެ ބޮޑުތަން އިތުރުވެފައެވެ.
ރާއްޖޭގައި ޑެންގޫ ހުން ފެތުރޭ މިންވަރު އިތުރުވެފައިވާއިރު، މި މަހުގެ 13 ވަނަ ދުވަހުވެސް ވަނީ ޑެންގޫ ޖެހިގެން 22 އަހަރުގެ ޒުވާނަކު ނިޔާވެފައެވެ. ށ. މިލަންދޫއަށް ނިސްބަތްވާ އެ ޒުވާނާ މަރުވީ ހާލުދެރަވެގެން ފަރުވާ ދެމުންދަނިކޮށެވެ.
އާންމުގޮތެއްގައި ރާއްޖޭގައި ޑެންގޫ އެންމެ ގިނައިން ފެތުރެނީ މެއި މަހުން ފެށިގެން ޖުލައި މަހުގެ ނިޔަލަށެވެ. އީޑީޒް މަދިރީގެ ޒަރިއްޔާއިން ފެތުރޭ މި ބައްޔަކީ ވަރަށް އަވަހަށް ސީރިއަސްވެ، ފުރާނައަށް ނުރައްކާވާ ބައްޔެކެވެ. ބަލީގެ އާންމު އަލާމާތްތަކުގެ ތެރޭގައި ގަދައަށް ހުން އައުމާއި، ބޮލުގައި ރިއްސުމާއި، ހުޅުތަކާއި މަސްތަކުގައި ރިއްސުމުގެ އިތުރުން މޭ ނުބައިކުރުން ހިމެނެއެވެ.
ސިއްހީ މާހިރުން ލަފާދެއްވާ ގޮތުގައި ހުން އަންނަތާ ތިން ދުވަސްވުމުން ލަސްނުކޮށް ޑޮކްޓަރަށް ދައްކަންޖެހެއެވެ. ޑެންގޫއަށް ވަކި ހާއްސަ ފަރުވާއެއް ނޯންނާތީ، ބަލިޖެހުމުން ގިނައިން ދިޔާތަކެތި ބޭނުންކުރުމަށާއި އަރާމުކުރުމަށް ސަމާލުކަން ދޭންޖެހެއެވެ. ހާއްސަކޮށް ކޮފީ ފަދަ ކެފެއިން ހުންނަ ބުއިންތަކާއި، ރަތް ނުވަތަ ކަޅު ކުލައިގެ ބުއިންތަކުގެ ބަދަލުގައި ލޮނުޕެކެޓާއި ކުރުނބާ ފެން ފަދަ ތަކެތި ބޭނުންކުރުމަށް ޑޮކްޓަރުން އިރުޝާދު ދެއްވައެވެ. ޑެންގޫ ހުން ޖެހިގެން ކުޑަކުދިންނާއި ޒުވާނުން ނިޔާވާ މިންވަރު އިތުރުވަމުންދާތީ، މަދިރިން ރައްކާތެރިވުމަށް ހާއްސަ ސަމާލުކަމެއް ދިނުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ.
