ލާމަރުކަޒީ ގާނޫނަށް އަލަށް ގެނައި އިސްލާހުތަކުން މަނާކޮށްފައި އޮއްވައި މ. މުލަކު ކައުންސިލުން 10 އަހަރަށް ހަތަރު ބިމެއް ކުއްޔަށް ދޫކުރަން އިއްޔެ އިއުލާނުކޮށްފި އެވެ.
ލާމަރުކަޒީ ގާނޫނަށް ގެނައި އިސްލާހުގެ ދަށުން، ކައުންސިލެއްގެ އުމުރުގައި ބާކީ އެއް އަހަރު ނެތް ނަމަ އެ ކައުންސިލުގެ އިހުތިސާސްގެ ދަށުގައިވާ ބިމާއި ފަޅާއި ފަރުގެ އެއްވެސް ސަރަހައްދެއް ކުއްޔަށް ދޫކުރަން މަނާ ވެ އެވެ.
މުލަކު ކައުންސިލުން އިއުލާނު ކުރީ މަސްވެރިކަމާ ގުޅޭ މަސައްކަތް ކުރަން ހަތަރު ބިމެއް ކުއްޔަށް ދޫކުރުމަށެވެ. އެއީ މީގެ ކުރިން ވެސް ކުއްޔަށް ދޫކޮށް، މިހާރު މުއްދަތު ހަމަވެފައި ހުރި ބިންތަކެކެވެ. މުލަކު ކައުންސިލުން ދެކެނީ މީގެ ކުރިން ވެސް އެ ބިންތައް ކުއްޔަށް ދޫކޮށްފައިވާތީ، މުއްދަތު ހަމަވެގެން އަލުން ކުއްޔަށް ދޫކުރުން ގާނޫނުން މަނާނުވާނެ ކަމަށެވެ.
"އެއީ މީގެ ކުރިން ވެސް އަޅުގަނޑުގެން ކުއްޔަށް ދޫކޮށްފައި ހުރި ބިންތަކެއް. އަޅުގަނޑުމެން ގަބޫލު ކުރަނީ އަލަށް ކުއްޔަށް ދޫކުރަން ކަމަށް ގާނޫނުން މަނާވަނީ،" މުލަކު ކައުންސިލުގެ ރައީސް އަހުމަދު ޖަމާލް އަދަދު ނޫހާ ވާހަކަ ދައްކަވަމުން ވިދާޅުވި އެވެ.
ބިން ކުއްޔަށް ދިނުމުގެ މަސައްކަތް މުލަކު ކައުންސިލުން ކުރިއަށް ގެންދާއިރު، ގާނޫނުން މަނާކޮށްފައިވާތީ، ބިން ކުއްޔަށް ދޫކުރުމުގެ ކަންކަން ގދ. ގައްދޫ ކައުންސިލުން ވަނީ އިއްޔެ މަޑުޖައްސާލައިފަ އެވެ. ގައްދޫ ލޭންޑް ޔޫޒް ޕްލޭނުގައި 12 ބިމެއް ކުއްޔަށް ދިނުމަށް އޮތީ ހިމަނައިފަ އެވެ.
"... ވުމާއިއެކު، 2025 ޖޫން 29 އިން މިމުއްދަތާއިހަމައަށް ވިޔަފާރީގެ އެކި ބޭނުންތަކަށް ބިން ހޯދުމަށް އެދި މިކައުންސިލްގައި އެދިފައިވާ ބާރަ ކުލީ ބިމުގެ މުއާމަލާތު ހިންގުމަށް ގާނޫނު މަހުދޫކޮށްފައިވާތީ، މިބިންތައް ކުއްޔަށް ދިނުމުގެ މަސައްކަތް ކުރިއަށް ނުގެންގޮސް ކައުންސިލުން މަޑުޖައްސައިފިން،" ގައްދޫ ކައުންސިލުން ނެރުނު އިއުލާނެއްގައި ބުނެފައިވެ އެވެ.
މުލަކު ކައުންސިލުން އިތުރަށް ބުނީ، ލާމަރުކަޒީ ގާނޫނަށް ގެނައި އިސްލާހުތަކާ ގުޅިގެން އެ ކައުންސިލުން ހިންގަން ބޭނުންވެފައި ހުރި ވަރަށް ގިނަ މަޝްރޫއުތަކަށް ހުރަސްއެޅޭ ކަމަށެވެ. ރަށުން ގޯތި ދޫކުރުމާއި ޓުއަރިޒަމް ޒޯންގެ ބިންތައް ކުއްޔަށް ދިނުން އޭގެ ތެރޭގައި ހިމެނޭ ކަމަށް މުލަކު ކައުންސިލުން ބުނެ އެވެ،.
"ގޯތި ދޫކުރުން ވެސް މަޑުޖެހިފައި އޮތީ. އެއީ އަޅުގަނޑުމެންގެ އެލްޔޫޕީގައި ވެސް ހިމެނޭ ކަމެއް. ޖުމުލަ 60 ގޯތި ދޫކުރަން މި އުޅެނީ. ޓުއަރިޒަމް ޒޯނުން ބިން ދޫކުރުން ވެސް މަޑުޖެހިފައި އޮތީ،" ކައުންސިލުގެ ރައީސް ޖަމާލް ވިދާޅުވި އެވެ.
ލާމަރުކަޒީ ގާނޫނަށް ގެނައި އިސްލާހުތައް ތަސްދީގު ނުކުރުމަށް ގާތްގަނޑަކަށް 80 އަށް ވުރެ ގިނަ ކައުންސިލުން އެދިފައި އޮއްވައި، ރައީސް މުހައްމަދު މުއިއްޒު އެ އިސްލާހުތައް ތަސްދީގު ކުރެއްވީ މިދިޔަ ބުރާސްފަތި ދުވަހެވެ. ބިން ކުއްޔަށް ދޫކުރުމަށް ހުރަސް އެޅުމުގެ އިތުރުން، ކައުންސިލުތަކުން ވިޔަފާރި ކުރުމަށް ލިބިދޭ ވަރަށް ގިނަ ބާރު ވެސް އެ އިސްލާހުތަކުން ވަނީ ނިގުޅައިގެންފަ އެވެ.
އަލަށް ފާސް ކުރި އިސްލާހުތަކުން މަނާ ކުރާ ކަންކަން
ވިޔަފާރި ކުރަން ކުރިމަތި ކުރުވާ ހުރަސްތައް
- އަމިއްލަ މީހަކު ކުރަމުންދާ ވިޔަފާރިއެއް ނުކުރެވޭ ގޮތް ހެދުން
- އުމްރާނީ ތަރައްގީއަށް ކޮންމެހެން ބޭނުންވާ މަސައްކަތެއް ނޫނީ ނުކުރެވުން
- ވިޔަފާރީގެ އިންވެސްޓްމަންޓު ނުވަތަ ރައުސުލްމާލު 10 މިލިއަން ރުފިޔާއަށް ވުރެ ބޮޑުވުން
- ކައުންސިލުން މިހާރު ކުރަމުންދާ ވިޔަފާރިތައް މަތީގައި ބަޔާން ކުރާ އުސޫލަކާ ހިލާފުވެއްޖެ ނަމަ އެ ވިޔަފާރިއެއް ތިން މަސްދުވަސް ތެރޭ ހުއްޓާލަން ޖެހުން
ތަންތަން ކުއްޔަށް ދިނުމަށް އެޅި ހުރަސްތައް
- އަސާސީ ހިދުމަތް ދިނުމަށް އެކި ފަރާތްތަކަށް ދޫކޮށްފައިވާ ބިންތަކުން ކުލި ނެގުން މަނާ ކުރުން.
މާލީ ކަންކަމަށް ނުފޫޒު ފޯރުވުން
- ފިނޭންސް މިނިސްޓްރީ އިން ކަނޑައަޅާ އުސޫލެއްގެ ދަށުން ކައުންސިލުތަކުގެ ބޭންކް އެކައުންޓުތައް ބަލަހައްޓަން މަޖުބޫރު ކުރުވުން
- ފިނޭންސް މިނިސްޓްރީ އިން ބޭނުންވެއްޖެ ހިނދެއްގައި ކައުންސިލުގެ ބޭންކު އެކައުންޓުގެ ސްޓޭޓްމަންޓެއް ދިނުމަށް މަޖުބޫރު ކުރުވުން
ކައުންސިލުގެ މަސައްކަތަށް ހުރަސް އެޅުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ދާއިމީ އަދި ކޮންޓްރެކްޓަށް ވެސް މުވައްޒަފުން ނެގޭނެ މަގު ބަންދު ކުރުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ކައުންސިލުގެ އިހުތިސާސްގެ ދަށުގައިވާ ބިމާއި ފަޅާއި ފަރުގެ ސަރަހައްދުގެ ކުއްޔަށް ދޫކުރުން މަނާ ކުރުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ތަރައްގީގެ އާ މަޝްރޫއުއެއް ހިންގުން މަނާ ކުރުން
