ރާއްޖެއަށް މަސްތުވާތަކެތި އެތެރެކޮށް އެތަކެތީގެ ވިޔަފާރިކޮށްގެން ހޯދާ ފައިސާ ލޯންޑާ ކުރާ ނެޓްވޯކްތައް ހުއްޓުވައި، ގާނޫނީ ފިޔަވަޅު އެޅުމަށް ފުލުހުން ފަށާފައިވާ "އޮޕަރޭޝަން އަލިމަގު" ގެ ދަށުން ހައްޔަރުކުރި ހަތަރު މީހުން ހެކި ނެތިގެން ޕްރޮސެކިއުޓާ ޖެނެރަލް އޮފީސް (ޕީޖީ) ގެ އެންގުމަށް އިއްޔެ ދޫކޮށްލައިފި އެވެ.
މި މައްސަލައާ ގުޅިގެން ހައްޔަރުކުރުމަށްފަހު ހެކި ނެތިގެން ދޫކޮށްލީ ގއ. ވިލިނގިލި، ޝެވޯނާ، ޝައްފާހް ލަތީފް، 28 އާއި ގއ. ވިލިނގިލި، މިއުޒިކީއާގެ، އަހްމަދު މަދީހު، 33 އާއި ގއ. ވިލިނގިލި، އައިޒަން، އަހްމަދު އަނާމް އިބްރާހިމް، 30 އަދި ގއ. ވިލިނގިލި، އަރާއިރުގެ، ނޫރުއްނިޒާމް، 35 އެވެ.
ޕީޖީ އޮފީހުގެ ޕަބްލިކް ޕްރޮސެކިއުޓަރު އަދި ތަރުޖަމާނު އަހްމަދު ޝަފީއު އަދަދު އަށް ވިދާޅުވީ އެ މައްސަލައިގައި ލިބިފައި ހުރި ހެކިތައް ޕީޖީން ދިރާސާކުރިއިރު ޖިނާއީ ބޮޑު ދައުވާއެއް ކުރެވޭ މިންވަރަށް ހެކި ގަރީނާ ލިބިފައިނުވާތީ ޝަރީއަތް ނިމެންދެން ބަންދުކޮށްފައި ތިބި އެ ހަތަރު މީހުން ދޫކޮށްލާފައިވާ ކަމަށެވެ.
"އެ މައްސަލައިގައި ތަހުގީގުކުރުމުގެ މުއްދަތު މިއަދަށް ހަމަވެފައި އޮތީ. ދެން ހަމަވާންވާއިރަށް ލިބިފައިވާ ހެކިތައް ދިރާސާކުރިއިރުގައި ޖިނާއީ ބޮޑު ކުށެއްގައި ދައުވާ ކުރެވޭ މިންވަރަށް ހެކި ގަރީނާ ލިބިފައިނުވާތީ ޝަރީއަތް ނިމެންދެން ބަންދުގައި ހުރި ހުރުން ނިމުމަކަށް ގެންނަން ފުލުހުންނަށް ދެންނެވިން،" އޭނާ ވިދާޅުވި އެވެ.
ޑްރަގް ބޮޑުން ކަމަށް ތުހުމަތު ކުރެވުނު އެ ހަތަރު މީހުންގެ ތެރެއިން ޝައްފާހް ލަތީފް އާއި އަހްމަދު މަދީހު އަދި އަހްމަދު އަނާމް އިބްރާހިމްގެ މައްޗަށް ކެނެބިސް ބޭނުންކުރުމުގެ ދައުވާ އުފުލުމަށް ޑްރަގް ކޯޓަށް ހުށަހަޅާފައިވާ ކަމަށެވެ. ނަމަވެސް އޭގެތެރެއިން ނޫރުއްނިޒާމްގެ މައްޗަށް އެއްވެސް ދައުވާއެއް އުފުލާފައެއް ނުވެ އެވެ.
މި ހަތަރު މީހުން ހައްޔަރުކުރި މައްސަލައާ ގުޅޭ ތަހުގީގު ހުއްޓާނުލައި ފުޅާކޮށް ކުރިއަށް ގެންދަން ޕީޖީން ވަނީ ފުލުހުންނަށް އިރުޝާދު ދީފައި ކަމަށް ޝަފީއު ވިދާޅުވި އެވެ.
އެ މީހުން ހައްޔަރުކުރި އޮޕަރޭޝަން ފުލުހުން ކުރިއަށްގެންދިޔައީ ގއ. އަތޮޅުގެ އިތުރުން މާލޭގަ އެވެ. އެ އޮޕަރޭޝަންގައި ޖުމްލަ 10 ތަނެއް ބަލައި ފާސްކުރި އެވެ.
އޮޕަރޭޝަން އަލިމަގުގެ ދަށުން މިދިޔަ މަހު އައްޑޫ ސިޓީގައި ފުލުހުން ހިންގި އޮޕަރޭޝަނެއްގައި ޑްރަގް ބޮޑުން ކަމަށް ތުހުމަތުކޮށް ހަ މީހުން ހައްޔަރުކުރި އެވެ. ނަމަވެސް އެ މީހުންގެ މައްޗަށްވެސް އެއްވެސް ދައުވާއެއް ނުކުރެވި ވަނީ ދޫކޮށްލާފަ އެވެ.
