މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަން އިންތިހާބަށް ކުރި އިއުލާނާއި އިންތިހާބުގެ ޓައިމްލައިން ބާތިލުކުރަން އެ ޕާޓީގެ އިސްތިއުނާފް ފަނޑިޔާރުންގެ މަޖިލީހުގެ ރައީސް އަހްމަދު އަބްދުﷲ އަފީފް އަންގައިފި އެވެ.
އެމްޑީޕީގެ ވަގުތީ ޗެއާޕާސަން އަބްދުލްޣަފޫރު މޫސާއަށް ފޮނުއްވި ސިޓީއެއްގައި އަހްމަދު އަބްދުﷲ އަފީފް ވިދާޅުވީ ޗެއާޕާސަން ހޮވުމަށް ޖޫން 12، ގައި ބާއްވާ ކަމަށް ބުނެ އިއްޔެ ޕާޓީން ކޮށްފައިވާ އިއުލާނާއި އެ އިއުލާނާއެކު އާންމުކޮށްފައިވާ އިންތިހާބުގެ ޓައިމްލައިނަކީ ދީފައިވާ އިރުޝާދާ ހިލާފަށް ނިންމި ނިންމުމެއް ކަމަށެވެ.
ޕާޓީގެ ޗެއާޕާސަންގެ އިންތިހާބުގެ ކަންތައްތައް ރާވައި ހިންގުން ޕާޓީގެ އަސާސީ ގަވާއިދުގެ ދަށުން އިސްތިއުނާފް ފަނޑިޔާރުންގެ މަޖިލީހުގެ ރައީސަށް އޮތްއިރު، އޭނާއަށް ނާންގައި ޗެއާޕާސަންގެ އިންތިހާބާ ގުޅޭ އެއްވެސް ނިންމުމެއް ނިންމުމަކީ އަސާސީ ގަވާއިދާ ހިލާފު ކަމެއް ކަމަށް އަހްމަދު އަބްދުﷲ އަފީފް ވިދާޅުވި އެވެ.
އެމްޑީޕީގެ ޗެއާޕާސަންގެ އިންތިހާބު ޖޫން މަހު 12 ގައި ބާއްވަން ނިންމައި، ކުރިމަތިލާން ހުޅުވާލައިފި
އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބު ޖޫން 12 ވަނަ ދުވަހު ބޭއްވުމަށް ނިންމައި، އެ މަގާމަށް ކުރިމަތިލުމުގެ ފުރުސަތު މެއި 2 ވަނަ ދުވަހުގެ ނިޔަލަށް ވަނީ ހުޅުވާލައިފައެވެ. މި އިންތިހާބުގައި ވާދަކުރާ ކެންޑިޑޭޓުންގެ ކިބައިގައި މަޖިލިސް އިންތިހާބަށް ކުރިމަތިލާ މީހެއްގެ ހުންނަންޖެހޭ އަސާސީ ޝަރުތުތައް ފުރިހަމަވާންޖެހޭއިރު، މިހާތަނަށް ތިން ބޭފުޅަކު ވަނީ މަގާމަށް ވާދަކުރައްވާނެކަން އިއުލާނުކުރައްވާފައެވެ.
އޭނާ ވިދާޅުވީ ޗެއާޕާސަންގެ އިންތިހާބުގެ ކަންކަން އިންތިޒާމުކުރާ ބެހޭގޮތުން އިންތިހާބާބެހޭ ކޮމިޓީން ބޭއްވި ބައްދަލުވުމަކަށް ހާޒިރުވި ކަމަށެވެ. ނަމަވެސް އެ ބައްދަލުވުމުގައި ކޮމިޓީން ނިންމި އިންތިހާބުގެ ޓައިމްލައިނަކީ ކޮމިޓީންދޭ ލަފައެއް ކަމަށާއި ޕާޓީގެ ލީޑަރުންނާއި ޗެއާއާ މަޝްވަރާ ކުރުމަށްފަހު އެކުގައި ގޮތެއް ނިންމާނެ ކަމަށް އޭނާ ވިދާޅުވި އެވެ.
މީގެއިތުރުން އެމްޑީޕީގެ ގިނަ އަދަދެއްގެ މެންބަރުން ވަގަށް ޕީއެންސީއަށް ވައްދާފައިވާއިރު، އެ މެންބަރުން އަލުން ޕާޓީއަށް ވަނުމުގެ ފުރުސަތު ނުދީ އިންތިހާބު ކުރިއަށްގެންދިޔުމަކީ ކެންޑިޑޭޓުންނާއި މެންބަރުންގެ އިންތިހާބީ ހައްގުތަކަށް އުނިކަން އަންނާނެ ކަމެއް ކަމަށެވެ.
އެމްޑީޕީގެ ޗެއާޕާސަންގެ މަގާމަށް މިހާތަނަށް ޝައުގުވެރިކަން ފާޅުކޮށްފައިވަނީ ކުރީގެ ރައީސް މުހައްމަދު ނަޝީދާއި ގަލޮޅު ދެކުނު ދާއިރާގެ މެންބަރުން މީކާއިލް އަހްމަދު ނަސީމް އެވެ.
