ދިވެހިރާއްޖޭގެ ގައުމީ އެއާލައިން، މޯލްޑިވިއަން އާއި ސްރީލަންކާގެ ގައުމީ އެއާލައިން، ސްރީލަންކަން އެއާލައިންސްގެ ދަތުރުފަތުރުގެ ވިއުގަ ގުޅާލައި ލަންކާ މަގުން ރާއްޖެއަށް އަންނަ ފަތުރުވެރިންނަށް އެކި ކަންކޮޅުތަކަށް ފަސޭހަކަމާއެކު ދަތުރުކުރެވޭނެ މަގު ތަނަވަސްވެގެންދާނެ އެއްބަސްވުމެއްގައި ދެ އެއާލައިންގެ ދެމެދުގައި ސޮއިކޮށްފި އެވެ.
މޯލްޑިވިއަންއިން ބުނީ އެ އެއްބަސްވުމުގެ ދަށުން، ސްރީލަންކަން އެއާލައިންސް މެދުވެރިކޮށް ރާއްޖެއަށް އަންނަ ފަތުރުވެރިންނަށް، މޯލްޑިވިއަންގެ އެހީގައި ރާއްޖޭގެ 17 މަންޒިލަކަށް ދަތުރުކުރުމުގެ ފުރުސަތު ލިބިގެންދާނެ ކަމަށެވެ.
އޭގެ އިތުރުން، ކޮލަމްބޯ މެދުވެރިކޮށް ދުނިޔޭގެ މުހިންމު މާކެޓްތަކުން ރާއްޖެއަށް އަންނަ ފަތުރުވެރިންނަށް އެއްވެސް ދަތިކަމެއް ނެތި ރާއްޖޭގެ އެކި ސަރަހައްދުތަކަށް ދަތުރުކުރެވޭނެ އިންތިޒާމުތައް އެ އެއްބަސްވުމުގެ ދަށުން ހަމަޖެހިގެންދާނެ ކަމަށް ވެސް މޯލްޑިވިއަންއިން ބުންޏެވެ.
މި އެއްބަސްވުމުގެ ސަބަބުން ދިވެހި ދަތުރުވެރިންނަށް ވެސް ބޮޑެތި ފަސޭހަތަކެއް ލިބިގެންދާނެ ކަމަށް މޯލްެޑިވިއަން އިން ބުންޏެވެ. އެގޮތުން މޯލްޑިވިއަންގެ ފަސިންޖަރުންނަށް ކޮލަމްބޯ މެދުވެރިކޮށް ސްރީލަންކަން އެއާލައިންސް އިން ދަތުރުކުރާ ބައިނަލްއަގުވާމީ މަންޒިލްތަކަށް ދަތުރުކުރުމުގައި އިތުރު ލުއިފަސޭހަކަމާއި އިތުރު އިހުތިޔާރުތައް ލިބިގެންދާނެ ކަމަށް މޯލްޑިވިއަން އިން ބުންޏެވެ.
އެ އެއްބަސްވުމަށް އަމަލުކުރަން ފެށުމާއެކު، ބޭރު ގައުމުތަކަށް ދަތުރުކުރާ ދިވެހިންނަށް އެއް ޓިކެޓެއްގައި، ފަސޭހަ ކަނެކްޝަންތަކެއް މެދުވެރިކޮށް ދުނިޔޭގެ އެކި ގައުމުތަކަށް ދަތުރުކުރުމުގެ މަގު ތަނަވަސްވެގެންދާނެ އެވެ.
އެކަމާ ގުޅޭގޮތުން މޯލްޑިވިއަންގެ މެނޭޖިން ޑިރެކްޓަރު، އިބްރާހިމް އިޔާސް ވިދާޅުވީ، މިއީ ރާއްޖެއަށް އޮންނަ އެކްސެސިބިލިޓީ ނުވަތަ ދަތުރުފަތުރުގެ ފުރުސަތުތައް އިތުރުކުރުމަށާއި، މާލެއިން ބޭރުން އަތޮޅުތަކަށް އޮންނަ ގުޅުން ވަރުގަދަކުރުމަށް ކުރަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެއް ކަމަށެވެ.
"ސްރީލަންކަން އެއާލައިންސްގެ ބައިނަލްއަގުވާމީ ފުޅާ ދާއިރާއާއި މޯލްޑިވިއަންގެ ރާއްޖޭގެ އެތެރޭގެ އުދުހުންތަކުގެ ވިއުގަ ގުޅާލުމުން، ރާއްޖޭގެ ފަތުރުވެރިކަމަށް ބޮޑު ކުރިއެރުމެއް ލިބުމުގެ އިތުރުން ދިވެހިންނަށް ބައިނަލްއަގުވާމީ ދަތުރުތައް ކުރުމުގައި ބޮޑެތި ލުއިތަކެއް ލިބޭނެ،" އިޔާސް ވިދާޅުވި އެވެ.
މި ޕާޓްނަޝިޕަކީ ސަރަހައްދީ އެއްބާރުލުން އިތުރުކުރުމަށާއި، ދެ އެއާލައިންގެ ވިއުގަ ގުޅުވާލައިގެން ފަސިންޖަރުންނަށް ފެންވަރު ރަނގަޅު އަދި ފަސޭހަ ހިދުމަތްތަކެއް ފޯރުކޮށްދިނުމަށް ދެ ކުންފުނިން ގެންގުޅޭ ތަސައްވުރުގެ ބައެއް ކަމަށް މޯލްޑިވިއަން އިން ބުންޏެވެ.
ސްރީލަންކަން އެއާލައިންސްއަކީ ދުނިޔޭގެ މަޝްހޫރު ވަންވޯލްޑް އެލަޔަންސްގެ މެންބަރެކެވެ. އެ އެއާލައިނުން، ޔޫރަޕާއި މެދުއިރުމަތީގެ ގައުމުތަކާއި އޭޝިއާގެ އެކި ސަރަހައްދުތަކުގެ އިތުރުން އުތުރު އެމެރިކާ އާއި އޮސްޓްރޭލިއާ ހިމެނޭހެން ޖުމުލަ 62 ގައުމެއްގެ 114 މަންޒިލަކަށް ދަތުރުކުރެ އެވެ.
