އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަންގެ މަގާމަށް މީހަކު ހޮވަން ބާއްވާ އިންތިހާބުގައި ވޯޓުލާން ބޭނުންވާ ނަމަ މިއަދު ޕާޓީއަށް ވަންނަންޖެހޭނެ ކަމަށް އެ ޕާޓީ އިން ބުނެފި އެވެ.
އެމްޑީޕީގެ ޗެއާޕާސަންގެ މަގާމަށް މީހަކު ހޮވަން ބާއްވާ އިންތިހާބު އޮންނާނީ ޖޫން 12، ގަ އެވެ. އެ އިންތިހާބަށް އިއުލާނު ކުރީ ވެސް މިއަދެވެ. އިންތިހާބަށް ކުރިމަތިލާން ދިނީ މިއަދުން ފެށިގެން 10 ދުވަހެވެ.
ޗެއާޕާސަން އިންތިހާބުގައި ވޯޓުލާން ބޭނުންވާ މީހުން މިއަދުގެ ނިޔަލަށް ޕާޓީއަށް ވަންނަންޖެހޭނެ ކަމަށް އެމްޑީޕީ އިން ބުނީ ވެސް މިއަދެވެ. އެހެންކަމުން އިންތިހާބުގައި ވޯޓުލާން ބޭނުން ނަމަ މިރޭ 12:00 ގެ ކުރިން އެމްޑީޕީއަށް ވަންނަން ޖެހޭނެ އެވެ.
އިލެކްޝަންސް ކޮމިޝަނުގެ އޮންލައިން ޕޯޓަލް މެދުވެރިކޮށް ސިޔާސީ ޕާޓީތަކަށް ވަނުމަށް ހުށަހެޅޭނެ އެވެ. އަދި ޕާޓީތަކުން އެ ހުށަހެޅުން ގަބޫލުކޮށްފި ނަމަ މަދު ވަގުތުކޮޅެއްގެ އެ ޕާޓީއެއްގެ މެންބަރަކަށް ވެވޭނެ އެވެ.
ޗެއާޕާސަންގެ މަގާމަށް ކުރިމަތިލައްވާނެ ކަމަށް މިހާތަނަށް އިއުލާނު ކުރައްވާފައި ވަނީ ދެ ބޭފުޅުންނެވެ. އެއީ ކުރީގެ ރައީސް މުހައްމަދު ނަޝީދު އާއި ރައްޔިތުންގެ މަޖިލީހުގެ މެންބަރު މީކާއީލް އަހުމަދު ނަސީމް އެވެ.
ނަޝީދަކީ އެމްޑީޕީގެ ފުރަތަމަ ޗެއާޕާސަން އެވެ. ޕާޓީ ރަޖިސްޓްރީ ކުރުމަށްފަހު 2005 ވަނަ އަހަރުން ފެށިގެން 2008 ވަނަ އަހަރު ވެރިކަން ލިބިވަޑައިގަންނަވަންދެން ނަޝީދު އެ މަގާމު ފުރުއްވި އެވެ.
މީކާއީލްއަކީ އެމްޑީޕީގެ ޔޫތު ވިންގުގެ ރައީސްގެ މަގާމު ފުރުއްވާފައިވާ ބޭފުޅެކެވެ. މިއީ ރައްޔިތުންގެ މަޖިލީހަށް އޭނާ އިންތިހާބުވި ދެވަނަ ދައުރެވެ. ޗެއާޕާސަންގެ މަގާމަށް މީކާއީލް އިންތިހާބުވެއްޖެ ނަމަ އޭނާ ވާނީ އެ މަގާމަށް ފުރުއްވާ އެންމެ ޒުވާން މެންބަރަށެވެ.
ނަޝީދުގެ އިތުރުން އެމްޑީޕީގެ ޗެއާޕާސަންގެ މަގާމު ފުރުއްވީ މާރިޔާ އަހުމަދު ދީދީ އާއި މޫސާ މަނިކު (ރީކޯ މޫސަ) އާއި އަލީ ވަހީދު އާއި ހަސަން ލަތީފް އާއި ފައްޔާޒް އިސްމާއިލް އެވެ.
