އައިޖީއެމްއެޗް އިން ހިންގާ އާބަން ޕްރައިމަރީ ހެލްތު ކެއާ ސެންޓަރުގައި ކަތުރުފަންޏާއި ތަންމަކުނު އެޅުމުގެ އިތުރުން ފަންގަސް ޖަހައިގެން މިދިޔަ ހޯމަ ދުވަހު ބަންދުކޮށްފި އެވެ.
އަދަދު އަށް އެނގިފައިވާ ގޮތުގައި މިދިޔަ ނޮވެމްބަރު 1، ގައި ހުޅުވި އާބަން ޕްރައިމަރީ ހެލްތު ކެއާ ސެންޓަރު ބަންދުކުރަން ނިންމީ ކުތުރު ފަނި އަޅައި، ފަންގަސް ޖަހައިގެން އެތަނުގައި މަސައްކަތްކުރާ މުވައްޒަފުންނަށް އުނދަގޫތައް ދިމާވެ، އިމާރާތް ބޭނުންކުރަން ދިމާވަމުންދިޔަ ދަތިތަކާ ގުޅިގެންނެވެ.
"އެތަން ބަންދުކުރިއިރު އައިޖީއެމްއެޗް އިން ބުނީ މަރާމާތަށޭ ބަންދުކުރީ. އަސްލު އެތަން ބަންދުކުރީ މަރާމާތަކަށް ނޫން. އެތަން ހުޅުވިތާ ފަަސްމަސް މިވީ. އެކަމަކު އެތަން މެއިންޓެއިން ނުކުރެވިގެން ފަންގަސް އަޅައިގެން، އެތާ ކުދިންތައް އެލާޖިކް ރިއެކްޝަން އައިސްގެން ބަންދުކުރީ. ޕެސްޓު އައުޓްބްރޭކެއް އައިސްގެން،" އެކަމުގެ މައުލޫމާތު އެނގޭ މީހަކު އަދަދު އަށް ބުންޏެވެ.
މިކަމުގެ މައުލޫމާތު އެނގޭ މީހާ މި ނޫހަށް ބުނީ އާބަން ޕްރައިމަރީ ހެލްތު ކެއާ ސެންޓަރު ހުޅުމުގެ ކުރިން އެތަނުގައި ފަންގަސް ޖަހައި ފަނިފަކުސާގެ މައްސަލަ އުޅޭކަން އައިޖީއެމްއެޗްގެ މެނޭޖްމަންޓަށް އެނގޭ ކަމަށެވެ. ނަމަވެސް އެކަމަށް ފިޔަވަޅުތަކެއް ނާޅައި އެތަން ހުޅުވި ކަމަށާއި ފަހުން ރަނގަޅަށް މެއިންޓެއިން ވެސް ނުކުރާ ކަމަށް އޭނާ ބުންޏެވެ.
މިކަމާ ގުޅިގެން އައިޖީއެމްއެޗް އިން މިދިޔަ ހޯމަ ދުވަހު ބުނީ އާބަން ޕްރައިމަރީ ހެލްތު ކެއާ ސެންޓަރު ބަންދުކުރީ މަރާމާތު ކުރުމަށް ވަގުތީ ގޮތުން މިއަދުގެ ނިޔަލަށް ކަމަށެވެ. އައިޖީއެމްއެޗް އިން ބުނީ އެތަން މާދަމާ ހުޅުވަން ހަމަޖެހިފައިވާ ކަމަށެވެ.
އާބަން ޕްރައިމަރީ ހެލްތު ކެއާ ސެންޓަރު ބަންދުކޮށްފައި ހުންނަ މުއްދަތުގައި އެ ސެންޓަރުން ދެމުން ގެންދާ ޑޮކްޓަރަށް ދެއްކުމުގެ ހިދުމަތް އައިޖީއެމްއެޗްގެ ޖީއޯޕީޑީއަށް ވަނީ ބަދަލުކޮށްފަ އެވެ. އޭގެއިތުރުން ވެކްސިން ޖެހުމުގެ ހިދުމަތް ދަމަނަވެއްޓަށް ވަނީ ބަދަލުކޮށްފަ އެވެ.
އެ ސެންޓަރުން ދެމުންދިޔަ ހިދުމަތްތަކުގެ ތެރޭގައި އާންމު ބަލިތަކަށް ޑޮކްޓަރަށް ދެއްކުން، އިތުރު ފަރުވާ ބޭނުންވާ ހާލަތްތަކުގައި ހާއްސަ ޑޮކްޓަރުގެ ލަފާ ހޯދުން އަދި މެޑިކަލް ޗެކަޕް ހެދުން ހިމެނެ އެވެ.
