އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ފަށާފައިވާ ސިލްސިލާ މަގުމަތީ ހަރަކާތްތަކުގެ ތެރެއިން މިރޭ ދެ މީހުން ފުލުހުންގެ ބެލުމުގެ ދަށަށް ގެންގޮސްފި އެވެ.
ނިމިދިޔަ ކައުންސިލް އިންތިހާބާއި ފެންނަ ނުފެންނަ ވޯޓުގައި ސަރުކާރަށް އިތުބާރު ގެއްލި، ރައްޔިތުންގެ ތާއީދު ނެތްކަން ހާމަވެފައިވާތީ އެމްޑީޕީން އަންނަނީ މުޒާހަރާ ކުރަމުންނެވެ.
ޗާންދަނީ މަގުގައި ހުންނަ ދަނޑިކޮށީ ހަރުގެ ކުރިމަތިން ފެށި މުޒާހަރާގެ ތެރެއިން ހައްޔަރުކުރީ ނައިފަރު ދާއިރާގެ ރައީސް އަބްދުالله ރަޝީދު ހަސަން އާއި އެ ޕާޓީގެ ޒުވާނުންގެ ހިތްވަރުގެ ނައިބު ރައީސް އަހުމަދު މައިމޫން މުހައްމަދު އެވެ.
އެ ދެ މީހުންނަށް ވެސް މިވަގުތު ފަރުވާ ދެމުން އަންނަނީ އައިޖީއެމް ހޮސްޕިޓަލުގައި ކަމަށް އެމްޑީޕީން ބުނެ އެވެ. އެ މީހުން ހައްޔަރުކުރުމުގެ ތެރޭގައި އެކި ވަރުގެ އަނިޔާ ލިބިފައިވާ ކަމަށް އެ ޕާޓީން ބުނެ އެވެ.
ހޮނިހިރު ދުވަހުގެ މުޒާހަރާގެ ތެރެއިން މީޑިއާތަކަށް ވެސް ފުލުހުން ހުރަސް އެޅި އެވެ. އަދި އެމްޑީޕީގެ މުޒާހަރާއާ ކުރީގެ ރައީސް އަބްދުالله ޔާމީންގެ ޕީޕަލްސް ނެޝަނަލް ފްރޮންޓް (ޕީއެންފް) ގެ މެންބަރުން ވެސް ގުޅުނެވެ.
އެމްޑީޕީން އޮތީ ސަރުކާރަށް 12 ޑިމާންޑެއްކޮށްފަ އެވެ. ނަމަވެސް އެ ޑިމާންޑުތަކަށް ސަރުކާރުން މިހާތަނަށް އިޖާބަ ދީފައެއް ނުވެ އެވެ.
