ރަސްމާލެ ހިއްކަން ގެނައި ދުނިޔޭގެ އެންމެ ބޮޑު ޑްރެޖަރު ފުރައިފި

އެއާޕޯޓުތައް އޮޕަރޭޓުކުރާ، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އާ ހަވާލުކޮށްފައިވާ ބިން ހިއްކުމުގެ މަޝްރޫއުތަކުގެ ބޭނުންކުރަން އެ ކުންފުނިން ބޮޑު އަގުގައި ޗާޓަރުކޮށްގެން ގެނައި ދުނިޔޭގެ އެންމެ ބޮޑު އެއް ޑްރެޖަރު، ކްރިސްޓޮބާލް ކޯލަން ރާއްޖޭން ފުރައިފި އެވެ. 

އެމްއޭސީއެލްގެ  ބިން ހިއްކުމުގެ ޕްރޮޖެކްޓުތަކުގައި ބޭނުންކުރަން ވެގެން އެ ކުންފުނިން ވަނީ ބެލްޖިއަމްގެ ޔަން ޑަ ނަލް ކުންފުނީގެ އިތުރުން ކްރިސްޓޮބާލް ކޯލަންގެ އިތުރުން، ހަމަ އެ  ސައިޒުގެ ލީވް އެރިކްސަން ވަނީ ކުއްޔަށް ނަގާފަ އެވެ. 

މީގެ ތެރެއިން ކޯލަން ރާއްޖެ އައިސްސުރެން ހަރަކާތްތެރިވަމުން އަންނަނީ ރަސްމާލެ ހިއްކުމުގަ އެވެ. އަނެއް ޑްރެޖަރު، އެރިކްސަން، ބޭނުންކުރީ ހއ. ދިއްދޫގެ ބިން ހިއްކާށެވެ. އެ ޕްރޮޖެކްޓު ނިންމާލުމަށް ފަހު އެ ޑްރެޖަރު ވެސް ހަރަކާތްތެރިވަމުން އައީ ރަސްމާލެ ސަރަހައްދުގަ އެވެ.

މިދިޔަ ހަފުތާ ނިމެން އުޅެނިކޮށް އަދަދު އަށް ވަނީ މި ޑްރެޖަރުތަކުން ބިން ހިއްކުމުގެ މަސައްކަތް ހުއްޓާލައި، އެންކަރުކުރި ކަމަށް މައުލޫމާތު ލިބިފަ އެވެ. އެ ދުވަހުން ފެށިގެން މި ނޫހުން ވާނީ ކަނޑު އުޅަނދުފަހަރު ޓްރެކްކުރާ މެރިންޓްރެފިކް އާއި ވެސްލްފައިންޑާ ބޭނުންކޮށްގެން މި ވެސްލްތަކުގެ ލޮކޭޝަން ޓްރެކްކޮށްފަ އެވެ.

އޭރު ބެލިއިރު، ދެ ޑްރެޖަރު ވެސް އޮތީ ފުށިދިއްގަރު ފަޅު ބޭރުގައި އެންކަރުކޮށްފަ އެވެ. އޭރުން ފެށިގެން، އިއްޔެގެ ވަގުތެއްގައި ކްރިސްޓޮބާލް ކޯލަން ރާއްޖޭން ފުރުމާ ހަމައަށް މި ދެ ޑްރެޖަރުން ކުރެ ޑްރެޖަރެއް އެންކަރުން ނުނަގަ އެވެ. ލީވް އެރިކްސަން އޮތީ ޓްރެކް ކުރަން ފެށިއިރު ވެސް އޮތް ސަރަހައްދުގަ އެވެ. 

މި ޑްރެޖަރުތައް ފުރައިގެން ދިޔައިރު، އެމްއޭސީއެލްއާ ހަވާލުކުރި ރަސްމާލޭގެ ސައިޓުތައް ވެސް ހިއްކާ ނުނިމެ އެވެ. އެމްއޭސީއެލްއާ ހަވާލުކުރި ރަސްމާލޭގެ ތިން ސައިޓުގެ ތެރެއިން މިހާތަނަށް އެއްކޮށް ހިއްކާ ނިމުނީ ސައިޓު "އޭ" އެވެ. ޑްރެޖަރުތައް އެންކަރުކުރީ ސައިޓު "ބީ" ހިއްކަން ފެށުމަށް ފަހުގަ އެވެ. 

ފުށިދިއްގަރު ފަޅު މަތިން ނަގާފައިވާ ސެޓެލައިޓް ފޮޓޯތައް ބެލިއިރު، ސައިޓު "ބީ" ހިއްކުން ހުއްޓުނަތާ ދެ ހަފުތާ ވަރު ވެއްޖެ އެވެ.

އެމްއޭސީއެލްއިން ހިއްކަމުން އަންނަ ސައިޓުތައް

• ސައިޓު އޭ - 138 ހެކްޓަރު
• ސައިޓު ބީ - 154 ހެކްޓަރު
• ސައިޓު އެޗް - 12 ހެކްޓަރު
• ސައިޓު އައި - 18 ހެކްޓަރު

އަދަދު އިން ވަނީ އެމްއޭސީއެލްއިން ކުއްޔަށް ނަގައިގެން އުޅޭ ޑްރެޖަރުތައް ފޮނުވާލި ސަބަބު ސާފުކުރަން އެ ކުންފުނީގެ މީޑިއާ އޮފިޝަލަށް ގުޅުމުން، ބަލާފަ ޖަވާބެއް ދޭނެ ކަމަށް ބުންޏެވެ. ނަމަވެސް އަދި އެ ކުންފުނީގެ ބަހެއް ނުލިބެ އެވެ.

އެމްއޭސީއެލްއިން ކުއްޔަށް ނަގައިގެން އުޅޭ ޑްރެޖަރުތަކުގެ ތެރެއިން ބިން ހިއްކުމުގައި އަމަލީ ގޮތުން ހަރަކާތްތެރިވަމުން އަންނަނީ ތ. އަތޮޅުގައި އޮތް ފިލީޕޯ ބުރުނެލޭޝީ އެކަންޏެވެ.