ދުނިޔޭގައި މި ވަގުތު އޮޕަރޭޓުކުރަމުން އަންނަ އެންމެ ބޮޑު ޑްރެޖަރު ގެނެސްގެން މަސައްކަތް ފަށައިގެން ވެސް، މި އޭޕްރިލް މަސް ނިމޭއިރު ވެސް ފުށިދިއްގަރު ފަޅު ހިއްކައިގެން ތަރައްގީކުރާ ރަސްމާލޭގެ ބިން ހިއްކުމުގެ މަސައްކަތް ނުނިމޭނެ ކަން ކަށަވަރުވެއްޖެ އެވެ.
ރަސްމާލެއަކީ މަސައްކަތް ފަށާތާ އަށް މަސް ދުވަހުގެ ތެރޭގައި އެއްކޮށް ހިއްކާ ނިންމާލާނެ ކަމަށް ބުނެ ޑިސެމްބަރު 17، 2023 ގައި ފެށި ފްރޮޖެކްޓެކެވެ. އެ ފަހުން ދިން ދެ ތާރީހަށް ވެސް މަސައްކަތް ނުނިމި އޮއްވާ، މިދިޔަ އަހަރުގެ ނޮވެމްބަރުގައި ރައީސް މުހައްމަދު މުއިއްޒު ވަނީ ފަސް މަސް ތެރޭގައި ރަސްމާލެ ހިއްކާ ނިންމާނެ ކަމަށް ވިދާޅުވެފަ އެވެ.
"ތިބޭފުޅުންނަށް ފެނިވަޑައިގަންނަވާނެ، އަޅުގަނޑު އިހަށް ދުވަހު މިއައީ ރަސްމާލެ ހިއްކާތަން ބަލާލަން ގޮސްފަ. ވަރަށް ބާރަށް އެކަން އެ ދަނީ. މި އަންނަ މަހު އިތުރު ޑްރެޖަރުތައް ގެނެވި، ތިންގުނައަށް ސްޕީޑު ބާރުވީމަ، އިރާދަކުރެއްވިއްޔާ ފަސް ވަރަކަށް މަސް ތެރޭގަ އެތަން އެއްކޮށް ހިއްކާ މި ނިމެނީ،" މުއިއްޒު ވިދާޅުވި އެވެ.
އެ ދުވަހު މުއިއްޒު ވިދާޅުވި، ފަސް މަހުގެ މުއްދަތު ހަމަ ވަނީ މި މަހުގެ 17 ވަނަ ދުވަހަށެވެ. މި ތާރީހަށް މަސައްކަތް ނުނިމޭނެ ކަން އަދަދު ނޫހުން ވަނީ މީގެ ކުރިން ވެސް ރިޕޯޓުކޮށްފަ އެވެ.
ފުށިދިއްގަރު ފަޅު ފެންނަ އެންމެ ފަހުގެ ސެޓެލައިޓް ފޮޓޯތަކުން ދައްކާ ގޮތުގައި، ފަހުން މަސައްކަތް ފެށި ސައިޓުތަކުގެ ތެރެއިން ހިއްކާ ނިމުނީ، އެމްއޭސީއެލްއިން ހަވާލުވެފައިވާ "ސައިޓު އޭ" ގައި އެކަންޏެވެ. މިކަން އެ ކުންފުނިން އިއުލާން ނުކުރި ނަމަވެސް އެ ސައިޓަށް ކަނޑައެޅި ސަރަހައްދު ހިއްކާ ނިންމާ، މިހާރު ހިއްކަމުން އަންނަނީ "ސައިޓު ބީ" އެވެ.
ރަސްމާލެއަށް ބިން ހިއްކަން ފެށިތާ ދެ އަހަރާ ތިން މަހަށް ވުރެ ގިނަ ދުވަސްވެފައިވާއިރު، މިއީ މި ސަރުކާރުން ހިންގާ އެންމެ ބޮޑު ޕްރޮޖެކްޓެވެ. ގާތްގަނޑަކަށް ތިން ލައްކައަށް ވުރެ ގިނަ މީހުންގެ އާބާދީއަކަށް އަމާޒުކޮށްގެން ތަރައްގީކުރާ މި ރަށަކީ، ސަރުކާރުން ބުނާ ގޮތުގައި، ރާއްޖެއަށް ދިމާވެފައިވާ ބޯހިޔާވަހިކަމުގެ މައްސަލައިގެ "ޓޯޓަލް ސޮލިއުޝަން" އެވެ.
މިހެން ނަމަވެސް މި ރިޔާސީ ދައުރުގެ ބާކީ އޮތް މުއްދަތުގެ ތެރޭގައި މި ތަނުގައި ބަޔަކަށް ދިރިއުޅެވޭނެ ވަރު ކުރަން ބޭނުންވާ މަގުތަކާއި، ކަރަންޓާއި ފެނާއި ނަރުދަމާ ފަދަ ވަސީލަތްތައް ގާއިމުކުރަން ވެސް ގިނަ މަސައްކަތްތަކެއް ކުރަން ޖެހެ އެވެ. މިކަމަށް ބޭނުންވާ ފައިސާ ހަމަޖެހުނު ކަމެއް ވެސް ނޭނގެ އެވެ.
ރަސްމާލެ ހިއްކަން ފައިސާ ހަރަދު ކުރާ ގޮތެއް ވެސް މިހާތަނަށް ކަށަވަރެއް ނުވެ އެވެ. މީގެ ކުރިން ކޮންސްޓްރަކްޝަން މިނިސްޓަރު އަބްދުﷲ މުއްތޮލިބު ވިދާޅުވެފައިވާ ގޮތުގައި މި ތަނުގެ ބިން ހިއްކަން 500 މިލިއަން ޑޮލަރަށް ވުރެ ބޮޑު އަދަދެއް ހަރަދު ވާނެ އެވެ.
މިއީ މި ޕްރޮޖެކްޓު ހިންގުމާ ހަވާލުވެގެން އުޅޭ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މާލީ ހާލަތު ހުރި ގޮތުން އެ ކުންފުންޏަށް ލޯނެއް ނަގައިގެން ވެސް ހަރަދު ކުރެވޭނެ ވަރުގެ އަދަދެއް ނޫނެވެ.
އެޗްޑީސީން މި މަސައްކަތް ކުރަމުން އަންނަނީ ތިން ކުންފުންޏަކާ ހަވާލުކޮށްގެންނެވެ. އެއީ މޯހަން މުތާ އެކްސްޕޯޓާއި ޗައިނާ ހާބާ އެންޑް އިންޖިނިއަރިން ކޯޕަރޭޝަން (ސީއެޗްއީސީ) އާއި އެންމެ ފަހުން މަސައްކަތާ ގުޅުނު އެމްއޭސީއެލް އެވެ.
