ލަންޑަން (ޖެނުއަރީ 31) - ޗެލްސީ އަށް ކުޅެމުން އަންނަ އިނގިރޭސި ތަރި، ކޯލް ޕާމާ އެ ކްލަބްގައި ހުރީ އުފަލުން ކަމަށާއި އޭނާއާ ގުޅޭގޮތުން ޓްރާންސްފާގެ އެއްވެސް ވާހަކައެއް ނެތް ކަމަށް ޗެލްސީގެ ކޯޗު، ލިއަމް ރޮސެނިއާ ބުނެފި އެވެ.
މެންޗެސްޓާ ސިޓީ ދޫކޮށް، މީގެ ތިން އަަހަރު ކުރިން، 2023 ވަނަ އަހަރު، 50 މިލިއަން ޑޮލަރުގެ ފީ އަކަށް ޗެލްސީން ޕާމާގެ ސޮއި ހޯދިއިރު، ފުރަތަމަ ސީޒަނުގައި އޭނާ ވަނީ، ޕްރިމިއާ ލީގުގައި 22 ގޯލު ޖަހައި، 11 ގޯލު ޖަހަން ފުރުސަތު ތަނަވަސްކޮށްދީފަ އެވެ. އަދި، މިހާތަނަށް ޗެލްސީ އަށް ކުޅެދިން 111 މެޗުން 48 ގޯލު ޖަހައި، 31 ލަނޑު ޖަހަން ފުރުސަތު ހޯދައިދިނެވެ.
ޗެލްސީއާ އެކު، 2033 ގެ ޖޫންގެ ނިޔަލަށް ކޮންޓްރެކްޓް އޮތް ނަމަވެސް، ޕާމާގެ ހިތްހަމަނުޖެހުންތަކެއް ލަންޑަންގައި ދިރިއުޅެން ޖެހޭތީ ހުރި ކަމަށް ބުނެ، އާއިލާ ކައިރީގައި މެންޗެސްޓާގައި އުޅުމަށް އެ ސަރަހައްދުގެ ޓީމަަކަށް ޕާމާ ބަދަލުވެދާނެ ކަމަށް ބުނެ، އިނގިރޭސި އެކި މީޑިއާތަކުން ވަނީ ރިޕޯޓްކޮށްފަ އެވެ.
އެންޒޯ މަރެސްކާ ވަކިކޮށް ޗެލްސީން އެ ޓީމުގެ ކޯޗުކަން ހަވާލުކުރި ރޮސެނިއާގެ އިރުޝާދުގެ ދަށުން އެ ޓީމުން ހަ މެޗުގެ ތެރެއިން ފަސް މެޗުން މޮޅުވިއިރު، އޭނާ އަށް ގިނައިން ޖަވާބު ދޭން ޖެހިފައިވަނީ ޓްރާންސްފާއާ ގުޅޭ ސުވާލުތަކަށެވެ.
އެ ގޮތުން، ޕާމާގެ މުސްތަގުބަލާ ގުޅޭގޮތުން އަމާޒުވި ސުވާލަށް ރޮސެނިއާ ބުނީ، ޕާމާ ހުރީ ޗެލްސީގައި ހިތްހަމަޖެހިގެން ކަމަށާއި ފިޓްނަސް އެންމެ ބޭނުންވާ ވަރަށް ރަނގަޅުކުރުމުގައި މެޗުތަކުގައި ކުޅެ ކުރިއެރުން ވެސް ހޯދަމުން އަންނަ ކަމަށެވެ.
"ޕާމާއާ ގުޅޭ ޓްރާންސްފާގެ ވާހަކައެއް އޮތް ހެނެއް ހިއެއްނުވޭ،" ރޮސެނިއާ ބުންޏެވެ.
އިނގިރޭސި ޕްރިމިއާ ލީގުގައި ވެސްޓް ހޭމްއާ ދެކޮޅަށް ޗެލްސީން ކުޅޭ މެޗުގައި ވެސް ޕާމާ ފެނިގެންދާނެ ކަމަށް ރޮސެނިއާ ވަނީ ބުނެފަ އެެވެ.
