އެމްޑީޕީގެ ފެކްޝަންތަކުން ކުރި މަޝްވަރާތަކަށް ފަހު އެއްބަސްވެވުނު ގޮތަށް އެމްޑީޕީގެ ޗެއާޕާސަނަށް ލަފާ ދޭން އެކުލަވާލި އިންތިގާލީ ކޮމިޓީ، އެމްޑީޕީގެ ޕާލިމެންޓަރީ ގްރޫޕު ލީޑަރު އިބްރާހިމް ނާޒިލް ހިމަނައިގެން އެކުލަވާލަން އެ ޕާޓީގެ ގައުމީ މަޖިލީހުން މިރޭ ފާސްކޮށްފި އެވެ.
މި ކޮމިޓީއަކީ އެމްޑީޕީއަށް ޗެއާޕާސަންއަކު އިންތިހާބުކުރެވެންދެން އެ ޕާޓީގެ ވަގުތީ ޗެއާ، އަބްދުލްޢަފޫރު މޫސާއަށް ލަފާދޭ ކޮމިޓީއެކެވެ. ޢަފޫރަށް ލަފާދޭ ކޮމިޓީގައި ނާޒިލްގެ އިތުރުން ތިއްބަވާ މެންބަރުންނަކީ:
- ކުރީގެ ރައީސް މުހައްމަދު ނަޝީދު
- ކުރީގެ ރައީސް އިބްރާހިމް މުހައްމަދު ސޯލިހު
- އެމްޑީޕީގެ ރައީސް އަބްދުﷲ ޝާހިދު
- ކުރީގެ ޗެއާޕާސަން، ފައްޔާޒު އިސްމާއިލް
އެމްޑީޕީގައި އޮންނަނީ ނަޝީދާއި ފައްޔާޒުގެ ފެކްޝަނާއި ސޯލިހުގެ ފެކްޝަނުގެ އިތުރުން ޝާހިދުގެ ފެކްޝަނާއި މަޖިލިސް މެންބަރު އަހުމަދު ޝަމްހީދުގެ ފެކްޝަނަކާއި ކުރީގެ ނައިބު ރައީސް ފައިސަލް ނަސީމުގެ ފެކްޝަނެކެވެ.
ފެކްޝަންތަކުގެ މެދުގައި އޮތް ހިޔާލު ތަފާތުވުންތަކުގެ މައްސަލަ ބޮޑުވީ ލޯކަލް ކައުންސިލް އިންތިހާބުގައި ލިބުނު ކާމިޔާބީ ފާހަގަކުރަން އެމްޑީޕީން ބޭއްވި ޖަލްސާގައި ނަޝީދަށް ވާހަކަ ދެއްކުމުގެ ފުރުސަތު ނުދިނުމުންނެވެ. އެ ހިސާބުން އެ ޕާޓިގެ ތެރޭގައި އޮތް އެންމެ ބޮޑު ދެ ފެކްޝަން ކަމުގައިވާ، ސޯލިހުގެ ފެކްޝަނާއި ނަޝީދާއި ފައްޔާޒުގެ ފެކްޝަނުން ވަނީ ހޫނު ބަހުގެ ހަމަލާތަކެއް ބަދަލުކޮށްފަ އެވެ.
