މޯލްޑިވިއަން ޑިމޮކްރެޓިކް ޕާޓީގެ އެތެރޭގައި އުފެދިފައިވާ ހިިޔާލުތަފާތުވުންތައް ހައްލުކޮށް، ފެކްޝަންތަކެއް އެކުގައި މަސައްކަތް ކުރެވޭނެ ގޮތެއް ހޯދުމަށްޓަކައި ހުރިހާ ލީޑަރުން ހިމެނޭ އިންތިގާލީ ކޮމިޓީއެއް ހަދަން އެއްބަސްވުމަކަށް އައިސްފި އެވެ.
އެމްޑީޕީގެ އެތެރޭގައި އުފެދިފައިވާ މައްސަލައަށް ހައްލު ހޯދައި، ހުރިހާ ލީޑަރުން އެކުގައި މަސައްކަތް ކުރުމަށްޓަކައި އެކުލަވައިލަން ނިންމާފައިވާ އެ ކޮމިޓީގައި ހިމެނޭނީ، ކުރީގެ ރައީސް އިބްރާހިމް މުހައްމަދު ސޯލިހު އާއި ކުރީގެ ރައީސް، މުހައްމަދު ނަޝީދުގެ އިތުރުން، އެކްޓިން ޗެއާޕާސަން، އަބްދުލްޣަފޫރު މޫސާ އާއި އެމްޑީޕީގެ ރައީސް، އަބްދުالله ޝާހިދު އަދި ކުރީގެ ޗެއާޕާސަން، ފައްޔާޒް އިސްމާއިލް ކަމަށް އަދަދު އަށް އެނގިފައިވެ އެވެ.
ހިޔާލުތަފާތުވުންތަކަށް ހައްލު ހޯދުމަށްޓަކައި އެ ޕާޓީގެ ލީޑަޝިޕުގައި ކުރެވުނު މަޝްވަރާތަކަށްފަހު، އެމްޑީޕީގެ ވަގުތީ ޗެއާޕާސަން، ޣަފޫރުގެ އިތުބާރު ނެތްކަމުގެ މައްސަލަ އަނބުރާ ނަގަން ވެސް ވަނީ ނިންމައިފަ އެވެ.
ހަމަ އެހެންމެ، އެމްޑީޕީގެ ޑެޕިއުޓީ ޗެއާޕާސަންގެ މަގާމުން ވަކިކުރި، އިބްރާހިމް ވަހީދު އާއި އެ ޕާޓީގެ ލީގަލް ޑައިރެކްޓަރުގެ މަގާމުން ވަކިކުރި، އަހުމަދު މައުރޫފް ގެ މަގާމުތައް އިއާދަކޮށްދިނުމަށް ވެސް އެ މަޝްވަރާތަކުގެ ތެރެއިން ވަނީ އެއްބަސްވެފަ އެވެ.
އެމްޑީޕީގެ ލީޑާޝިޕަށް އެކީގައި މަސައްކަތް ކުރެވޭނެ ގޮތެއް ހޯދިއްޖެ ކަމަށް ސޯލިހު އިއުލާނު ކުރައްވައިފި
އެމްޑީޕީގެ ލީޑާޝިޕްގެ ހުރިހާ ބޭފުޅުން އެކީގައި މަސައްކަތް ކުރެވޭނެ ގޮތެއް ހޯދިފައިވާ ކަމަށް ކުރީގެ ރައީސް އިބްރާހިމް މުހައްމަދު ސޯލިހު އިއުލާނު ކުރައްވައިފިއެވެ. އެމަނިކުފާނު ވިދާޅުވީ ޕާޓީގެ އަމާޒަކީ އެއްވެސް ލީޑަރަކު ބާކީނުކޮށް، އެންމެން ގުޅިގެން 2028 ވަނަ އަހަރުގެ ރިޔާސީ އިންތިހާބު ކާމިޔާބު ކުރުން ކަމަށެވެ.
ފެކްޝަންތަކުން ކުރި މަޝްވަރާތަކުގެ ތެރެއިން އެމްޑީޕީގެ ގައުމީ މަޖިލީހުގެ ގޮނޑިއެއް ކުރީގެ ރައީސް، މުހައްމަދު ނަޝީދުއަށް ދިނުމަށް އެއްބަސްވެފައިވާކަން ވެސް ވަނީ މި ނޫހަށް އެނގިފައިވެ އެވެ.
އެ ކަންކަމަށް އެއްބަސްވެފައިވީ ނަމަވެސް، އެ ނިންމުންތައް ނިންމާނީ މިރޭ އޮންނަ އެމްޑީޕީގެ ގައުމީ މަޖިލީހުގެ ސިއްރު ބައްދަލުވުމުގަ އެވެ.
އެމްޑީޕީގެ ތެރޭގައި އޮތް އެންމެ ބޮޑު ދެ ފެކްޝަން ކަމުގައިވާ، ސޯލިހުގެ ފެކްޝަނާއި ނަޝީދު ތާއީދުކުރައްވާ ފައްޔާޒުގެ ފެކްޝަނާ ދެމެދު މި ފަހުން ނުތަވަސްކަން އުފެދުނީ، ލޯކަލް ކައުންސިލް އިންތިހާބުން އެމްޑީޕީއަށް ލިބުނު ކާމިޔާބީ ފާހަގަކުރުމަށް އާޓިފިޝަލް ބީޗުގައި އޭޕްރިލް 6، ގައި ބޭއްވި ޖަލްސާގައި ވާހަކަދެއްކުމުގެ ފުރުސަތު ކުރީގެ ރައީސް މުހައްމަދު ނަޝީދުއަށް ނުދިނުމުންނެވެ.
ޣަފޫރުގެ އިތުބާރު ނެތްކަމުގެ މައްސަލަ އަނބުރާ ގެންގޮސް، އިބުރޭ އާއި މައުރޫފްގެ މަގާމު އިއާދަކުރަނީ
އެމްޑީޕީގެ ވަގުތީ ޗެއާޕާސަން އަބްދުލްޣަފޫރު މޫސާގެ އިތުބާރު ނެތްކަމުގެ މައްސަލަ އަނބުރާ ގެންގޮސް، ޕާޓީގެ މަގާމުތަކުން ވަކިކުރި އިބްރާހިމް ވަހީދާއި އަހުމަދު މައުރޫފްގެ މަގާމު އިއާދަކުރަން ވަނީ ނިންމާފަ. މި ނިންމުންތައް ނިންމުމަށް ހަމަޖެހިފައިވަނީ ޕާޓީގެ އެތެރޭގެ ހިޔާލުތަފާތުވުންތަކަށް ހައްލެއް ހޯދުމަށް މިރޭ ބާއްވާ ގައުމީ މަޖިލީހުގެ ބައްދަލުވުމުގައި.
އެ މައްސަލަ ވަރަށް ބޮޑަށް ހޫނުވެ، އެތެރޭގެ ސިޔާސީ ކޯޅުން އާންމުންނާ ހަމައަސް ތިލަވި އެވެ. އަދި އެއް ފެކްޝަނުން އަނެއް ފެކްޝަނުގެ މައްޗަށް ބޮޑެތި ތުހުމަތުތަކެއް އަމާޒުކުރަމުންދިޔަ އެވެ.
ނަޝީދުގެ ފެކްޝަނާއި ސޯލިހުގެ ފެކްޝަނުގެ އިތުރުން ދެން އެމްޑީޕީ ތެރޭގައި އޮންނަނީ އެމްޑީޕީގެ ރައީސް، އަބްދުالله ޝާހިދުގެ ފެކްޝަނާއި މަޖިލިސް މެންބަރު އަހުމަދު ޝަމްހީދުގެ ފެކްޝަނަކާއި ކުރީގެ ނައިބު ރައީސް ފައިސަލް ނަސީމުގެ ފެކްޝަނެކެވެ.
